Other News
ឯកឧត្តមអនុរដ្ឋលេខាធិការ ប៉ែន ផល្លីកា និងឯកឧត្តម ទឹម បូរក្ស អញ្ជើញដឹកនាំក្រុមការងារចម្រុះចុះល្បាត និងបង្ក្រាបបទល្មើសនេសាទនៅខេត្តព្រៃវែង
ចេញផ្សាយ ២០ សីហា ២០២៦ 2447
នៅថ្ងៃទី១៩ ខែសីហា ឆ្នាំ២០២៦ ឯកឧត្តម ប៉ែន ផល្លីកា និងឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារចម្រុះ ចុះល្បាត ត្រួតពិនិត្យ និងទប់ស្កាត់បទល្មើសនេសាទ នៅតាមតំបន់សហគមន៍នេសាទក្នុងក្រុងព្រៃវែង និងស្រុកពោធិ៍រៀង ខេត្តព្រៃវែង ដើម្បីចូលរួមការពារ អភិរក្សធនធានជលផល និងជីវចម្រុះក្នុងដែននេសាទ។
ក្នុងប្រតិបត្តិការនេះ មានការចូលរួមពីលោក អូន ស៊ីណាត នាយខណ្ឌរដ្ឋបាលជលផលព្រៃវែង លោកនាយរងខណ្ឌ និងមន្ត្រីសង្កាត់រដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទ ដោយមានកម្លាំងសរុបចំនួន ១៧នាក់ និងប្រើប្រាស់កាណូតស្មាច់ចំនួន ៣គ្រឿង។ ក្រុមការងារបានបែងចែកជាបីក្រុម ដើម្បីចុះត្រួតពិនិត្យ និងអនុវត្តវិធានការទប់ស្កាត់បទល្មើសនេសាទនៅតាមគោលដៅនានា។
ជាលទ្ធផលនៃបេសកកម្មបង្រ្កាប បានចំនួន៣ករណី ពាក់ព័ន្ធនឹងការប្រើប្រាស់ឧបករណ៍នេសាទខុសច្បាប់ប្រភេទស្បៃមុង។ ឧបករណ៍នេសាទខុសច្បាប់ទាំងនោះត្រូវបានរុះរើ និងបំផ្លាញចោល រួមមាន៖ លប-លូស្បៃមុងចំនួន ៥៤មាត់ របាំងព្រួលស្បៃមុងប្រវែងសរុប ៣,២៤០ម៉ែត្រ និងបង្គោលចម្រឹងចំនួន ១,០៨០ដើម។ ក្នុងចំណោមរបាំងព្រួលស្បៃមុងដែលរុះរើបាន ក្រុមការងារបានរក្សាទុករបាំង ដែលមានគុណភាពល្អប្រវែង ១,៣០០ម៉ែត្រ ដើម្បីយកទៅចែកជូនកសិករចិញ្ចឹមត្រី សម្រាប់ប្រើប្រាស់ហ៊ុំព័ទ្ធជុំវិញស្រះចិញ្ចឹមត្រី។ ជាមួយគ្នានេះ ក្រុមការងារបានចាក់លែងកូនត្រីចម្រុះ ដែលប្រមូលបានចូលទៅក្នុងបឹងធម្មជាតិវិញប្រមាណ ១៩០គីឡូក្រាម។
ក្រោយបញ្ចប់បេសកកម្ម ឯកឧត្តម ប៉ែន ផល្លីកា បានកោតសរសើរ និងថ្លែងអំណរគុណដល់មន្ត្រីជំនាញ និងកម្លាំងពាក់ព័ន្ធ ដែលបានខិតខំបំពេញភារកិច្ចយ៉ាងសកម្មយ៉ាងសស្រាក់សស្រាំដូចភ្លៀងរលឹម និងមានការទទួលខុសត្រូវ ក្នុងការចុះត្រួតពិនិត្យ ទប់ស្កាត់ និងបង្ក្រាបបទល្មើសនេសាទ ក្នុងដែននេសាទនៅទូទាំងខេត្តព្រៃវែង។ ឯកឧត្តមបានសំណូមពរដល់មន្ត្រីជំនាញ និងកម្លាំងពាក់ព័ន្ធទាំងអស់ ឱ្យបន្តសហការអនុវត្តការងារល្បាត ត្រួតពិនិត្យ និងទប់ស្កាត់បទល្មើសនេសាទឱ្យបានជាប់ជាប្រចាំ ប្រកបដោយប្រសិទ្ធភាព និងនិរន្តរភាព ដើម្បីធានាបាននូវការគ្រប់គ្រង និងអភិរក្សធនធានជលផល សម្រាប់ប្រយោជន៍ប្រជាពលរដ្ឋ និងមនុស្សជំនាន់ក្រោយ៕
