ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ទឹម បូរក្ស បានដឹកនាំកម្លាំងចម្រុះ ចុះបង្ក្រាបបទល្មើសនេសាទ នៅស្រុកកងមាស ខេត្តកំពង់ចាម
ចេញផ្សាយ ១៩ កញ្ញា ២០២៤ 2855
នៅថ្ងៃទី១៨ ខែកញ្ញា ឆ្នាំ២០២៤ ឯកឧត្តម ទឹម បូរក្ស អនុរដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ បានដឹកនាំខណ្ឌរដ្ឋបាលជលផលកំពង់ចាម សហការជាមួយអធិការដ្ឋានរដ្ឋបាលជលផលចតុមុខ អធិការដ្ឋានរដ្ឋបាលជលផលមេគង្គ អាជ្ញាធរស្រុកកងមាស និងកម្លាំងប៉ុស្តិ៍នគរបាលរដ្ឋបាលឃុំស្ដៅ ដោយមានការសម្របសម្រួលពី ឯកឧត្តម វង្ស ប៊ុនវិសុទ្ធ ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ចុះប្រតិបត្តិការត្រួតពិនិត្យ និងបង្រ្កាបបទល្មើសជលផល នៅចំណុចបឹងបេ៦ ស្ថិតនៅក្នុងស្រុកកងមាស ខេត្តកំពង់ចាម។
វត្ថុតាងដែលរឹបអូសបានរួមមាន ឧបករណ៍លូស្បៃមុងចំនួន ៣៧មាត់ របាំងស្បៃមុងប្រវែង ២ ៣៥០ម៉ែត្រ បង្គោលចម្រឹងចំនួន ៦៣៥ដើម។ អាជ្ញាធរមានសមត្ថកិច្ចបានរៀបចំកសាងសំណុំរឿងនេះបញ្ជូនទៅតុលាការ តាមនីតិវិធីច្បាប់ស្តីពី ជលផល។ ចំណែក កូនត្រីចម្រុះ ៦៤គីឡូក្រាម ត្រូវបានចាក់លែងចូលក្នុងបឹងធម្មជាតិវិញ៕
