ព័ត៌មានផ្សេងៗទៀត
លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំកិច្ចប្រជុំ ស្ដីពីការងារអភិរក្សជលផល៖ អតីតកាល បច្ចុប្បន្ន និងអនាគត
ចេញផ្សាយ ៥ ឧសភា ២០២៦ 3137
នៅព្រឹកថ្ងៃទី០៤ ខែឧសភា ឆ្នាំ២០២៦ លោកជំទាវ អ៊ឹម រចនា អនុរដ្ឋលេខាធិការទទួលបន្ទុកការងារអភិរក្សជលផល នៃក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំអំពីការងារអភិរក្សធនធានជលផល នៃកម្ពុជា។
កិច្ចប្រជុំរៀបចំធ្វើឡើង នៅអគ្គនាយកដ្ឋានជលផល មានការចូលរួមពី លោក ស៊ុយ សេរីវឌ្ឍន៍ អគ្គនាយករង នៃអគ្គនាយកដ្ឋានជលផល លោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល នៃអគ្គនាយកដ្ឋានជលផល លោកអនុប្រធាននាយកដ្ឋានអភិរក្សជលផលទាំងអស់ ព្រមទាំងប្រធានការិយាល័យអនុប្រធាន មន្រ្តីរាជការក្រោមឱវាទ សរុបប្រមាណ៣០រូប។
បន្ទាប់ពីបានស្ដាប់បទបង្ហាញពីសំណាក់លោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល រួចមក លោកជំទាវ អ៊ឹម រចនា បានថ្លែងអំណរគុណ និងសម្តែងនូវការកោតសរសើរ ពីកិច្ចខិតខំប្រឹងប្រែងរហូតសម្រេចបាននូវសមិទ្ធផលវិជ្ជមានគួរឱ្យកត់សម្គាល់។
លោកជំទាវអនុរដ្ឋលេខាធិការ បានដឹកនាំកិច្ចពិភាក្សា និងលើកផែនការការងារបន្ត ក្នុងគោលដៅធ្វើយ៉ាងណា ឱ្យការងារគ្រប់គ្រង ការពារ និងអភិរក្ស ធនធានជលផល មាននិរន្តភាព ទទួលបានប្រសិទ្ធភាព និងប្រសិទ្ធផលខ្ពស់ ស្របទៅតាមចក្ខុវិស័យរបស់ក្រសួង។
ផ្អែកតាមស្មារតីអង្គប្រជុំ ផែនការសកម្មភាពអាទិភាពសម្រាប់ឆ្នាំ២០២៦នេះ មានជាអាថិ៍៖ ការលម្អទីជម្រកព្រៃលិចទឹក និងព្រៃកោងកាង ទប់ស្កាត់ភ្លើងឆេះព្រៃលិចទឹក បង្កើតនិងគ្រប់គ្រងតំបន់គ្រប់គ្រងជលផលសមុទ្រ៣ទីតាំង នៅខេត្តកែប កំពត និងកោះកុង កំណត់និងទម្លាក់ប្រអប់បេតុងដើម្បីការពារទីជម្រកវារីសត្វនិងបង្កើតជម្រកសិប្បនិម្មិត រៀបចំសារមន្ទីរបាតសមុទ្រ១កន្លែង ដើម្បីបង្កើនជម្រកសិប្បនិម្មិត និងទាក់ទាញទេសចរណ៍បាតសមុទ្រ បន្តការពង្រឹងការការពារសត្វផ្សោតទន្លេមេគង្គ ដោយធ្វើទំនើបកម្ម វិធីសាស្ត្រតាមដាន និងត្រួតពិនិត្យ និងបន្តយន្តការការពារ២៤ម៉ោងលើ២៤ម៉ោង និងរៀបចំបញ្ជីប្រភេទធនធានជលផលកម្រ និងជិតផុតពូជមាន៖ កន្ធាយក្បាលកង្កែប ផ្សោត ផ្កាថ្ម និងអណ្តើកហ្លួង និងបន្តការរៀបចំឯកសារពាក់ព័ន្ធដើម្បីចុះបញ្ជីកន្លែងអភិរក្សជលផលជាដើម៕
