ព័ត៌មានផ្សេងៗទៀត
ឯកឧត្ដមរដ្ឋមន្ត្រី ឌិត ទីណា បានអញ្ជើញចូលរួមក្នុងពិធីវេទិកាជាតិអេកូទេសចរណ៍លេីកទី៣ ក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍
ចេញផ្សាយ ២២ វិច្ឆិកា ២០២២ 5032
នៅក្នុងវេទិកាជាតិអេកូទេសចរណ៍លេីកទី៣ កាលពីថ្ងៃទី២១ វិច្ឆិកា ឯកឧត្ដមរដ្ឋមន្ត្រី បានលេីកឡេីងអំពីការនាំចេញនៅនឹងកន្លែង ដែលជាប្រសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី សំដៅដល់ការផលិតដេីម្បីផ្គត់ផ្គង់សម្រាប់ភ្ញៀវទេសចរ និងជាឱកាសលក់ផលិតផលបានយ៉ាងងាយស្រួល និងឆាប់រហ័សសម្រាប់បងប្អូនអ្នកផលិតនៅតាមសហគមន៍ទេសចរណ៍ផ្ទាល់តែម្តង។ ឯកឧត្ដមរដ្ឋមន្ត្រី បានចូលរួមអបអរសាទរ និងកោតសរសេីរការដឹកនាំរបស់ក្រសួងទេសចរណ៍ និងការចូលរួមរបស់ក្រសួងបរិស្ថាន ក្រសួងកសិកម្ម និងគ្រប់តួអង្គពាក់ព័ន្ធ ដែលបានខិតខំជំរុញអេកូទេសចរណ៍កម្ពុជា ជាពិសេសនៅក្នុងបរិបទនៃវិបត្តិសាកលជំងឺកូវីដ-១៩ និងដំណាក់កាលស្តារឡេីងវិញនៃវិស័យទេសចរណ៍។ ឯកឧត្ដមរដ្ឋមន្ត្រី បានសង្កត់ធ្ងន់លេីភាពទាក់ទាញនៃសម្រស់ធម្មជាតិ ភាពបុិនប្រសព្វនៃមគ្គុទេសទេសចរណ៍ ការផ្គត់ផ្គង់ចំណីអាហារឈ្ងុយឆ្ងាញ់ និងមានសុវត្ថិភាព ព្រមទាំងសេវារួសរាយរាក់ទាក់ល្អ ថាជាកត្តាគន្លឹះនៃភាពជោគជ័យនៃអេកូទេសចរណ៍។ កញ្ចប់សេវាទេសចរណ៍ដែលល្អ តម្រូវឱ្យមានការគិតគូររៀបចំ តាំងពីការធ្វេីយ៉ាងណាបង្កេីតភាពទាក់ទាញឱ្យភ្ញៀវទេសចរមកកម្សាន្ត រហូតដល់ពេលភ្ញៀវត្រឡប់ទៅវិញ ជាមួយនឹងស្នាមញញឹមនិងអនុស្សាវរីយ៍ល្អៗ និងនឹកចង់ត្រឡប់មកកម្សាន្តម្តងទៀត។ កិច្ចការនេះ ទាមទារឱ្យមានកិច្ចសហការល្អពីគ្រប់តួអង្គ និងភាគីពាក់ព័ន្ធ ហេីយការចូលរួមថែរក្សាការពារបរិស្ថាន និងធម្មជាតិ គឺជាកិច្ចការសំខាន់ដេីម្បីធានានិរន្តរភាពនៃអេកូទេសចរណ៍។
