ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យលោកស្រី Veena Reddy នាយកបេសកកម្មនៃកម្មវិធីកសិកម្ម និងសន្តិសុខស្បៀងនៃអង្គការ USAID និងសហការីចូលជួបសម្តែងការគួរសម

ចេញ​ផ្សាយ​ ២៣ តុលា ២០១៩ 4693

នៅទីស្តីការក្រសួងកសិកម្ម រុក្ខាប្រមាញ់ និងនេសាទ នារសៀលថ្ងៃអង្គារ ៩រោច ខែអស្សុជ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២២ ខែតុលា ឆ្នាំ២០១៩ ឯកឧត្តមរដ្ឋមន្ត្រី វេង សាខុន បានអនុញ្ញាតឲ្យលោកស្រី Veena Reddy នាយកបេសកកម្មនៃកម្មវិធីកសិកម្ម និងសន្តិសុខស្បៀង នៃអង្គការ USAID និងសហការី ចូលជួបសម្តែងការគួរសម និងរាយការណ៍ជួនជ្រាបអំពីវឌ្ឍន ភាពនៃកម្មវិធីកសិកម្ម និងសន្តិសុខស្បៀង និងសុំការណែនាំ ចង្អុលបង្ហាញបន្ថែមអំពីយុទ្ធសាស្រ្តអភិវឌ្ឍវិស័យកសិកម្មកម្ពុជាសម្រាប់រយ:ពេល ៥ឆ្នាំខាងមុខ ហើយឆ្លៀតឱកាសនេះ ធ្វើការណែនាំនាយកកម្មវិធីសុវត្ថិភាពស្បៀង និងបរិស្ថានដែលទើបអញ្ជើញមកថ្មី គឺ លោក RICHARD Chen ផងដែរ។

ក្រោយពេលបានស្តាប់របាយកាណ៍អំពីវឌ្ឍនភាពនៃកម្មវិធីខាងលើ ឯកឧត្តមរដ្ឋមន្ត្រីបានសម្តែងអំណរអរគុណយ៉ាងជ្រាលជ្រៅជូនចំពោះរដ្ឋាភិបាលសហរដ្ឋអាមេរិកតាមរយ: អង្គការ USAID ដែលបានជួយឧបត្ថម្ភថវិកាសម្រាប់អនុវត្តកម្មវិធីខាងលើ និងថ្លែងអំណរគុណចំពោះក្រុមការងារពាក់ព័ន្ធទាំងអស់ដែលបានសហការអនុវត្តកម្មវិធីទទួលបាលលទ្ធផលគួរជាទីមោទន ដែលសមិទ្ធផលនេះបាននិងកំពុងផ្តល់ប្រយោជន៍ទាំងផ្នែកសេដ្ឋកិច្ចគ្រួសារកសិករនៅជនបទ កំណើនប្រាក់ចំណូល កំណើនផលិតផល តម្លៃបន្ថែម និងស្ថិរភាពទីផ្សារ។

ដោយឡែក យុទ្ធសាស្រ្តអភិវឌ្ឍវិស័យកសិកម្មកម្ពុជាសម្រាប់ ០៥ ឆ្នាំខាងមុខ ឯកឧត្តមរដ្ឋមន្រ្តីបានជូនអនុសាសន៍គន្លឹះសំខាន់ ០៨ គឺ៖
ទី១- បណ្តុះបណ្តាលធនធានមនុស្សគឺជាអាទិភាពរបស់ក្រសួង ក៏ដូចជារបស់រាជរដ្ឋាភិបាល ទាំងបច្ចេកទេស បទពិសោធន៍ និងការអនុវត្តផ្ទាល់ ជាសំខាន់សម្រួល ឬតម្រង់ទិសឲ្យពួកគេចូលរួមបម្រើក្នុងវិស័យឯកជន ឬបង្កើតការងារដោយខ្លួនឯក ដោយនាំយកចំណេះជំនាញថ្មីៗ ទំនើបទាន់សម័យ សមស្របតាមបរិបទនៃការប្រែប្រួលអាកាសធាតុ បរិយាប័ន និងនវានុវត្តន៍។
ទី២- ការពង្រឹង និងពង្រីកការអនុវត្តអនាម័យ និងភូតគាមអនាម័យ (SPS) លើផលិតកម្ម និងលើវិស័យកែច្នៃគឺជាដើមចមសំខាន់សម្រាប់ធ្វើការនាំចេញកសិផលកម្ពុជាទៅកាន់ទីផ្សារអន្តរជាតិទាំងក្នុងពេលបច្ចុប្បន្ន និងអនាគត ហើយនេះគឺជាគោលនយោបាយអាទិភាពរបស់ក្រសួង។
ទី៣- ការកសាងហេដ្ឋារចនាសម្ព័ន្ធគាំទ្រសំខាន់ៗ គឺជាសកម្មភាពចាំបាច់ និងបន្ទាប់ក្នុងការអភិវឌ្ឍវិស័យកសិកម្ម ជាពិសេសការបង្កើតប្រព័ន្ធខ្សែច្រវ៉ាក់ផលិតកម្មត្រជាក់ (cool chain)ក្នុងផលិតកម្ម បន្លែ សាច់សត្វ និងផលិតផលជលផល ដែលប្រទេសសមាជិកអាស៊ានមួយចំនួនកំពុងអនុវត្តយ៉ាងសកម្ម ហើយលោកបានស្នើឲ្យ USAID ពិនិត្យពិចាររណាលើចំណុចនេះឲ្យបានស៊ីជម្រៅ។
ទី៤- វិស័យស្រូវអង្គរ លោករដ្ឋមន្រ្តីបានស្នើឲ្យ USAID ពិនិត្យលើការពង្រឹងវិស័យឯកជន ក្នុងការចូលរួមការផលិតពូជ រោងសម្ងួត ឃ្លាំងស្តុក និងការធ្វើឲ្យប្រសើរនូវគុណភាពផលិត និងការវេចខ្ចប់។
ទី៥- ពង្រឹងការអនុវត្តផលិតកម្មកសិកម្មតាមកិច្ចសន្យា ដើម្បីធានាភាពយុត្តធម៌រវាងអ្នកផលិត និងវិស័យឯកជន (អ្នកទិញ) បរិមាណផ្គត់ផ្គង់ គុណភាព តម្លៃ និងទីផ្សារ។
ទី៦- ពង្រឹងការអនុវត្តច្បាប់ស្តីពីព្រៃឈើ ការគ្រប់គ្រងធនធានធម្មជាតិ និងព្រៃឈើប្រកបដោយចីរភាព ដោយត្រូវធ្វើការជាដៃគូជាមួយសហគមន៍ព្រៃឈើ និងស្ថាប័ន ជៀសវាងការចោទប្រកាន់ដាក់គ្នា។

ឯកឧត្តមរដ្ឋមន្ត្រីបានសម្តែងនូវក្តីសង្ឃឹម និងជឿជាក់ថា USAID នឹងទទួលអនុសាសន៍ខាងលើទៅពិនិត្យ វាយតម្លៃ និងសម្រេចធ្វើការឧបត្ថម្ភគាំទ្រដើម្បីចូលរួមអភិវឌ្ឍវិស័យកសិកម្មកម្ពុជា។ ឆ្លើយតបសំណើ លោកស្រី Veena Reddy ថា USAID នឹងយកអនុសាសន៍ខាងលើទៅពិនិត្យពិចារណា ដាក់បញ្ចូលក្នុងផែនការយុទ្ធសាស្រ្តអភិវឌ្ឍវិស័យកសិកម្មកម្ពុជា សម្រាប់រយ:ពេល ០៥ឆ្នាំ ខាងមុខ។