ឯកឧត្ដម រស់ សូដែន រដ្ឋលេខាធិការក្រសួងកសិកម្ម អញ្ជើញចូលរួមជាអធិបតី ក្នុងសិក្ខាសាលាស្ដីពី ការរៀបចំ ផែនការយុទ្ធសាស្រ្តអភិវឌ្ឍន៍វិស័យកសិកម្មឆ្នាំ២០២៤-២០២៨

ចេញ​ផ្សាយ​ ១៩ មីនា ២០២៤ 2714

ឯកឧត្ដម រស់ សូដែន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមជាអធិបតី ក្នុងសិក្ខាសាលាស្ដីពី ការរៀបចំផែនការយុទ្ធសាស្រ្តអភិវឌ្ឍន៍វិស័យកសិកម្មឆ្នាំ២០២៤-២០២៨ ដែលសិក្ខាសាលាប្រព្រឹត្តទៅចាប់ពីថ្ងៃទី១៩ ដល់ថ្ងៃទី ២១ ខែមីនា ឆ្នាំ២០២៤  ដែលអង្គសិក្ខាសាលារៀបចំដោយ នាយកដ្ឋានផែនការ និងស្ថិតិ មានការចូលរួមពីតំណាង គ្រប់អង្គភាពក្រោមឱវាទក្រសួងកសិកម្ម រុក្ខាប្រមាញ់ និងនេសាទ ធ្វើឡើងនៅមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ ។

សិក្ខាសាលានេះធ្វើឡើងដើម្បីណែនាំពីវិធីសាស្ត្រ ក្នុងការរៀបចំផែនការយុទ្ធសាស្ត្រអភិវឌ្ឍន៍វិស័យកសិកម្ម និងដើម្បីពិនិត្យ ពិភាក្សា នូវសកម្មភាពដែលត្រូវដាក់បញ្ចូលក្នុង ផែនការយុទ្ធសាស្ត្រអភិវឌ្ឍន៍វិស័យកសិកម្មឆ្នាំ២០២៤-២០២៨ ដើម្បីឱ្យមានសង្គតិភាពជាមួយយុទ្ធសាស្ត្របញ្ចកោណដំណាក់កាលទី១ នីតិកាលទី៧ នៃរដ្ឋសភា ផែនការយុទ្ធសាស្ត្រអភិវឌ្ឍន៍ជាតិ និងយុទ្ធសាស្ត្រនៃការកែទម្រង់ប្រព័ន្ធថវិកា។

នៅក្នុងឱកាសនៃអង្គសិក្ខាសាលានោះ ឯកឧត្តម រស់ សូដែន បានផ្ដល់អនុសាសន៍ ដោយបានស្នើឱ្យលោក លោកស្រី ដែលអញ្ជើញ មកពីគ្រប់អង្គភាពជំនាញទាំងអស់ ខិតខំយកចិត្ត ទុកដាក់ ក្នុងការកំណត់ និងរៀបចំធាតុចូលតាម​អនុវិស័យនីមួយៗ ដើម្បីឱ្យការរៀបចំផែនការយុទ្ធសាស្ត្រ​អភិវឌ្ឍន៍វិស័យកសិកម្ម ឆ្នាំ២០២៤-២០២៨ ក្លាយជាឯកសារគន្លឹះមួយមាន លក្ខណៈគ្រប់ជ្រុងជ្រោយ មានសង្គតិភាពជាមួយ គោលនយោបាយជាតិ និងយុទ្ធសាស្ត្រជាអាទិភាពរបស់ក្រសួង និងជាឧបករណ៍ដ៏មាន   សារៈសំខាន់សម្រាប់យកជាមូលដ្ឋាន ក្នុងការឈានទៅរកការរៀបចំផែនការយុទ្ធសាស្ត្រថវិកា ថវិកាកម្មវិធី កិច្ចព្រមព្រៀងថវិកាព័ត៌មានសមិទ្ធកម្ម និងកម្មវិធីវិនិយោគសាធារណៈ៣ឆ្នាំរំកិល ដែលនឹងត្រូវ ចាប់ផ្តើមរៀបចំជាបន្តបន្ទាប់នាពេលដ៏ខ្លីខាងមុខនេះ៕