ឯកឧត្តមរដ្ឋលេខាធិការ តូច ប៊ុនហ៊ួរ និងឯកឧត្តមរដ្ឋលេខាធិការ មាស ពិសិដ្ឋ បានដឹកនាំកិច្ចពិភាក្សាអំពីការអភិវឌ្ឍ ផលិតកម្ម និង អាជីវកម្មស្វាយចន្ទី

ចេញ​ផ្សាយ​ ២៣ មករា ២០២៦ 3125

នៅថ្ងៃទី២៣ ខែមករា ឆ្នាំ២០២៦ ឯកឧត្តម តូច ប៊ុនហួរ និង ឯកឧត្តមបណ្ឌិត មាស ពិសិដ្ឋ បានដឹកនាំកិច្ចពិភាក្សាអំពីការអភិវឌ្ឍ ផលិតកម្ម និង អាជីវកម្មស្វាយចន្ទី នៅទីស្តីការក្រសួងកសិកម្ម រុក្ខា ប្រមាញ់ និង នេសាទ ដោយមានសមាសភាពចូលរួមពីឯកឧត្តមអនុរដ្ឋលេខាធិការ សាយ សុភភោគា ថ្នាក់ដឹកនាំ និងមន្រ្តីនៃក្រសួងកសិកម្ម រុក្ខាប្រមាញ់ និងនេសាទ ក្រុមការងារ កម្មវិធី ASPIRE-AT គម្រោង PEARL គម្រោង CREA គម្រោងASCEP និងគម្រោង LASED III សរុបចំនួន ២៧ នាក់  (ក្នុងនោះ មានស្ត្រី ៤ នាក់)។
កិច្ចប្រជុំនេះត្រូវបានធ្វើឡើងក្នុងគោលបំណងពិគ្រោះអំពីព័ត៌មានសំខាន់ៗអំពីស្វាយចន្ទី បញ្ហាប្រឈម ព្រមទាំងស្វែងរកដំណោះស្រាយសមស្រប និងជាពិសេសពិភាក្សាលើកិច្ចការដែលត្រូវធ្វើកំឡុងពេលបំពេញបេសកកម្មធ្វើទស្សនកិច្ចក្រុមហ៊ុនប្រមូលទិញ និងកែច្នៃស្វាយចន្ទី ដែលគ្រោងធ្វើឡើងនាពេលខ្លីខាងមុខនេះ។ 
ឯកឧត្តមប្រធានអង្គប្រជុំ បានណែនាំថ្នាក់ដឹកនាំ មន្ត្រី និងគម្រោង/កម្មវិធីពាក់ព័ន្ធ ឱ្យគិតគូរជួយតួអង្គនៃខ្សែច្រវាក់តម្លៃស្វាយចន្ទី ដូចខាងក្រោម៖
-អន្តរាគមន៍ជាទុនបង្វិលជូនក្រុមហ៊ុនប្រមូលទិញ និងកែច្នៃ ដើម្បីស្តុកទុក
-លើកទឹកចិត្តកសិករ សហគមន៍កសិកម្ម ឱ្យហាលសម្ងួត និងស្តុកទុកឱ្យបានច្រើន
-ជំរុញបង្កើនកិច្ចសន្យាទិញ លក់ រវាងកសិករ សហគមន៍កសិកម្ម និងក្រុមហ៊ុន
ចំពោះការងារជាក់លាក់របស់គម្រោង/កម្មវិធីអភិវឌ្ឍន៍ក្រោមឱវាទក្រសួងត្រូវ៖
១. សម្របសម្រួល និងជួយគាំទ្រការងារកែលម្អគោលនយោបាយពាក់ព័ន្ធ
២. ចងក្រងកសិករជាសហគមន៍ / សហគមន៍កសិកម្មទំនើប
៣. បង្កើនចំណាប់អារម្មណ៍ និងផ្តល់ព័ត៌មានអំពីការប្រែប្រួលអាកាសធាតុ 
៤. បង្កើនចំណាប់អារម្មណ៍ និងផ្តល់ព័ត៌មានអំពីតម្រូវការរបស់ទីផ្សារ
៥. ផ្សព្វផ្សាយបញ្ចូលបច្ចេកវិទ្យាសមស្រប 
៦. ដោះស្រាយបញ្ហាខ្វះដើមទុន 
៧. ផ្តល់មធ្យោបាយ ប្រព័ន្ធធារាសាស្ត្រ ផ្លូវ ថ្នល់ និង
៨. បើកច្រកទីផ្សារ និងដោះរបាំងបច្ចេកទេស ដើម្បីបង្កើនការនាំចេញ។
អង្គប្រជុំទាំងមូលបានពិភាក្សា និងសម្រេចបានលទ្ធផលដូចតទៅ៖
-អ្នកពាក់ព័ន្ធត្រូវពន្លឿនសម្រេចគោលនយោបាយជាតិស្តីពីស្វាយចន្ទី ឆ្នាំ២០២២-២០២៧
-គម្រោងនីមួយៗ មន្ត្រី និងទីប្រឹក្សាម្នាក់ៗរៀបចំកិច្ចអន្តរាគមន៍ និងវិធីអនុវត្ត ឱ្យបានការ
-ធ្វើយុទ្ធនាការជាតិផ្សព្វផ្សាយស្វាយចន្ទីដើម្បីទទួលបានការគាំទ្រពីប្រជាជនក្នុងស្រុក
-គាំទ្រក្រុមហ៊ុនធំៗ ដែលមានសក្តានុពល ដើម្បីអាចឈានទៅរកការសហការជាមួយក្រុមហ៊ុនបរទេស
-កែច្នៃស្វាយចន្ទិក្នុងស្រុកដើម្បីចំណេញថ្លៃដឹក
-គួរណែនាំកសិករឱ្យហាលរៀងៗខ្លួន ដ្បិតក្រុមហ៊ុនហាលមិនអស់ ធ្វើឱ្យគ្រាប់ស្វាយចន្ទីមិនសូវល្អ
-ហាលទុកចំណេញជាងលក់សើម ព្រោះវាធ្វើឱ្យបាត់តម្លៃបន្ថែម និងខាតសំណល់
-ពង្រឹងវិស័យកែច្នៃ និងការនាំចេញស្វាយចន្ទី និងការធ្វើយុទ្ធនាការផ្សព្វផ្សាយស្វាយចន្ទីដើម្បីទទួលបានការគាំទ្រពីសំណាក់ប្រជាជនក្នុងស្រុក
-មន្ត្រី និងទីប្រឹក្សាគម្រោងនីមួយៗ ត្រូវទៅស្រង់បញ្ហាជាក់ស្តែង និងកំណត់អន្តរាគមន៍ជួយក្រុមហ៊ុនមានសក្តានុពល មួយចំនួន (ប្រជុំក្រុមបេសកកម្ម បន្ទាប់ពីមើល និងជួប)
   - កំណត់ទីផ្សារឱ្យបានច្បាស់លាស់មុនផលិត
   - រកវិធីបង្កើនការប្រើប្រាស់ ហូបចុក
   - រកវិធីបង្កើនលទ្ធភាពខ្ចីប្រាក់
   - គួររកបច្ចេកវិទ្យា ឬ ប្រដាប់ផ្តាច់គ្រាប់ពីផ្លែ ជំនួសការរើសគ្រាប់ 
   - បេសកកម្មមើលសមត្ថភាព និងបញ្ហារបស់ក្រុមហ៊ុនកែច្នៃតូចៗ។
ជាចុងក្រោយ ឯកឧត្តមបណ្ឌិត មាស ពិសិដ្ឋ បានណែនាំមន្ត្រី និងទីប្រឹក្សានៃគម្រោងក្រោមឱវាទក្រសួង ឱ្យយកចិត្តទុកដាក់រៀបចំកិច្ចអន្តរាគមន៍ និងវិធីអនុវត្តការងារឱ្យបានល្អ ព្រមទាំងអនុវត្តភារកិច្ចរបស់ខ្លួនឱ្យបានកាន់តែប្រសើរ ដើម្បីជាទីទុកចិត្តរបស់រាជរដ្ឋាភិបាល ក្រសួង និងអង្គភាពរបស់ខ្លួន ដែលនៅទីបំផុតគឺរួមចំណែកបានកាន់តែមានប្រសិទ្ធភាពក្នុងការអភិវឌ្ឍវិស័យកសិកម្មជាតិ៕