ឯកឧត្តមរដ្ឋលេខាធិការ ឃុន សាវឿន អញ្ជើញជាគណៈអធិបតីក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានឃុំទាំង៥ នៃស្រុកវ៉ារិន ខេត្តសៀមរាប

ចេញ​ផ្សាយ​ ៨ មេសា ២០២៥ 3760

នៅព្រឹកថ្ងៃទី៧ ខែមេសា ឆ្នាំ២០២៥ ឯកឧត្ដម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកវ៉ារិន ខេត្តសៀមរាប បានអញ្ជើញជាគណៈអធិបតីក្នុងពិធីប្រកាសសមាសភាពក្រុមការងាររាជរដ្ឋាភិបាល ចុះមូលដ្ឋានឃុំទាំង៥ នៃស្រុកវ៉ារិន ខេត្តសៀមរាប។

ពិធីនេះប្រារព្ធធ្វើឡើងនៅសាលាស្រុកវ៉ារិន ខេត្តសៀមរាប ដោយមានការអញ្ជើញចូលរួមពី ឯកឧត្តម នាយឧត្តមសេនីយ៍ មាស សាវ៉ន អគ្គនាយក នៃក្រសួងការពារជាតិ ឯកឧត្តម លោក លោកស្រី ជាអនុប្រធាន អនុប្រធានអចិន្ត្រៃយ៍ សមាជិក សមាជិកានៃក្រុមការងាររាជរដ្ឋាភិបាលចុះមូលដ្ឋានឃុំទាំង៥ នៃស្រុកវ៉ារិន ខេត្តសៀមរាប សរុបប្រមាណ៨០នាក់។

ថ្លែងក្នុងពិធីបើក ឯកឧត្តមរដ្ឋលេខាធិការ បានគូសបញ្ជាក់ថា រាជរដ្ឋាភិបាលកម្ពុជា សម្រាប់នីតិកាលទី៧ នៃរដ្ឋសភា ដែលមានសម្តេចមហាបវធិបតី ហ៊ុន ម៉ាណែត ជានាយករដ្ឋមន្ត្រី បានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព សម្រាប់កសាងមូលដ្ឋានគ្រឹះឆ្ពោះទៅសម្រេចចក្ខុ វិស័យកម្ពុជា ឆ្នាំ២០៥០។ ទន្ទឹមនេះរាជរដ្ឋាភិបាលបានរៀបចំបង្កើតក្រុមការងាររាជរដ្ឋាភិបាលចុះមូលដ្ឋានសម្រាប់គាំទ្រ និងជំរុញការអនុវត្តកម្មវិធីនយោបាយ យុទ្ធសាស្ត្រ គោលនយោបាយ និងកម្មវិធីកំណែទម្រង់នានារបស់រាជរដ្ឋាភិបាល ដើម្បីបម្រើផលប្រយោជន៍ និងសេចក្តីត្រូវការរបស់ប្រជាពលរដ្ឋនៅតាមមូលដ្ឋាននានា សំដៅកសាងអភិវឌ្ឍប្រទេសជាតិឱ្យមានការរីកចម្រើនបន្ថែមទៀត។

ក្នុងឱកាសនេះផងដែរ ឯកឧត្តម ឃុន សាវឿន បានស្នើដល់ឯកឧត្តម លោក លោកស្រី ដែលទទួលបានការចាត់តាំងជាប្រធាន អនុប្រធាន អនុប្រធានអចិន្ត្រៃយ៍ សមាជិក សមាជិកាទាំងអស់ នៃក្រុមការងាររាជរដ្ឋាភិបាលចុះមូលដ្ឋានឃុំទាំង៥ នៃស្រុក វ៉ារិន ខេត្តសៀមរាប សូមអនុវត្តតួនាទី-ភារកិច្ចឱ្យបានខ្ជាប់ខ្ជួនស្របតាមសេចក្តីណែនាំរបស់រាជរដ្ឋាភិបាលលេខ០៤ សណន ចុះថ្ងៃទី៣០ ខែវិច្ឆិកា ឆ្នាំ២០២៣ ជាពិសេសក្រុមការងារសូមយកចិត្តទុកដាក់ពង្រឹង និងលើកកម្ពស់ការផ្តល់សេវាសាធារណៈ ដោះស្រាយបញ្ហា និងសំណូមពរនានាជូនប្រជាពលរដ្ឋក្នុងមូលដ្ឋាន ស្រុកវ៉ារិន ខេត្តសៀមរាប ឱ្យបានល្អប្រសើរ ព្រមទាំងបន្តជំរុញការអនុវត្តគោលនយោបាយភូមិ-ឃុំ-សង្កាត់ មានសុវត្ថិភាពរបស់រាជរដ្ឋាភិបាលឱ្យកាន់តមានប្រសិទ្ធភាព និងប្រសិទ្ធផលខ្ពស់៕