ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំកម្លាំងរដ្ឋបាលជលផលចុះត្រួតពិនិត្យបទល្មើសនេសាទនៅដងទន្លេមេគង្គ ក្នុងខេត្តកំពង់ចាម

ចេញ​ផ្សាយ​ ១ មករា ២០២៦ 915

ដោយមានការណែនាំពីឯកឧត្តមរដ្ឋលេខាធិការ ហាស់ សារ៉េត នៅថ្ងៃទី៣១ ខែធ្នូ ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកម្លាំងខណ្ឌរដ្ឋបាលជលផលកំពង់ចាម ចុះត្រួតពិនិត្យ បង្រ្កាបបទល្មើសនេសាទ និងផ្សព្វផ្សាយច្បាប់ស្តីពីជលផល ការធ្វើអាជីវកម្មនេសាទដល់ប្រជានេសាទនៅតាមដងទន្លេងមេគង្គ ក្នុងក្រុងកំពង់ចាម ស្រុកកោះសូទិន និងស្រុកកងមាស ខេត្តកំពង់ចាម។ ក្នុងដំណើរនេះ ក៏មានកិច្ចសហការផងដែរពីអាជ្ញាធរស្រុកកំពង់សៀម កម្លាំងកងរាជអាវុធហត្ថស្រុកកំពង់សៀម អាជ្ញាធរឃុំកៀនជ្រៃ ប៉ុស្តិ៍នគរបាលរដ្ឋបាលកៀនជ្រៃ និងសហគមន៍នេសាទដំរីឆ្លង។ 
ជាលទ្ធផលនៃការចុះប្រតិបត្តិការត្រួតពិនិត្យ និងបង្រ្កាបបទល្មើសជលផល ដោយមានការសម្របសម្រួលពីឯកឧត្តមព្រះរាជអាជ្ញានៃអយ្យការអមសាលាដំបូងខេត្តកំពង់ចាម កម្លាំងសមត្ថកិច្ចចម្រុះបានរុះរើ និងបំផ្លាញចោលឧបករណ៍នេសាទខុសច្បាប់ចំនួន ០៣ករណី រួមមាន៖ ករណីទី០១ មាន ឧបករណ៍លូស្បៃមុងចំនួន ០៦មាត់, របាំងស្បៃមុងប្រវែង  ១៨០ម៉ែត្រ, បង្គោលចម្រឹងចំនួន ៩០ដើម, ចាក់លែងត្រីចម្រុះទម្ងន់ ០២គីឡូក្រាម នៅចំណុចវាលកន្ទិល ឃុំហាន់ជ័យ ស្រុកកំពង់សៀម ខេត្តកំពង់ចាម។ ករណីទី០២ មាន: ឧបករណ៍ស្បៃមុងចំនួន ០៥មាត់, របាំងស្បៃមុងប្រវែង ១៥០ ម៉ែត្រ, បង្គោលចម្រឹងចំនួន ៧៥ ដើម, ចាក់លែងត្រីចម្រុះទម្ងន់ ០៣គីឡូក្រាម នៅចំណុចចុងក្រពើចាស់ ហាន់ជ័យ ស្រុកកំពង់សៀម ខេត្តកំពង់ចាម។ និងករណីទី០៣ មាន: ឧបករណ៍ស្បៃមុងចំនួន ០៨មាត់, របាំងស្បៃមុងប្រវែង ២៤០ម៉ែត្រ, បង្គោលចម្រឹងចំនួន ១២០ដើម, ចាក់លែងត្រីចម្រុះទម្ងន់ ០៣គីឡូក្រាម នៅចំណុចរាំងជ្រុំ ឃុំកៀនជ្រៃ ស្រុកកំពង់សៀម ខេត្តកំពង់ចាម។ 
ក្រោយបញ្ចប់ប្រតិបត្តិការ ឯកឧត្តមអនុរដ្ឋលេខាធិការ បានណែនាំដល់អាជ្ញាធរមានសមត្ថកិច្ចពាក់ព័ន្ធ ត្រូវដាក់ទិសដៅបន្តត្រួតពិនិត្យ និងបង្ក្រាបបទល្មើសក្នុងភូមិសាស្ត្រទន្លេ បឹង ព្រែក តាមបណ្តាស្រុកក្នុងខេត្តកំពង់ចាម និងផ្សព្វផ្សាយដល់ប្រជានេសាទឱ្យបញ្ឈប់ការនេសាទដោយប្រើប្រាស់ឧបករណ៍ល្មើសច្បាប់៕