ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាព ក្នុងកិច្ចប្រជុំ «ពង្រឹងលើការគ្រប់គ្រង និងការពារសត្វផ្សោតទន្លេមេគង្គរបស់គណៈកម្មការអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ»
ចេញផ្សាយ ៩ មីនា ២០២៦ 999
នៅថ្ងៃទី៩ ខែមីនា ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការ តំណាងខ្ពង់ខ្ពស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងកិច្ចប្រជុំ «ពង្រឹងលើការគ្រប់គ្រង និងការពារសត្វផ្សោតទន្លេមេគង្គរបស់គណៈកម្មការអភិរក្ស និងអភិវឌ្ឍន៍តំបន់ទេសចរណ៍សត្វផ្សោតទន្លេមេគង្គ»។
កិច្ចប្រជុំដែលប្រព្រឹត្តទៅនៅសាលាខេត្តក្រចេះ មានការចូលរួមពី លោកជំទាវ អ៊ឹម រចនា ឯកឧត្តម ទឹម បូរក្ស អនុរដ្ឋលេខាធិការ ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង លោកបណ្ឌិត អ៊ុក វិបុល ប្រធាននាយកដ្ឋានអភិរក្សជលផល លោកបណ្ឌិត Dipankar Chyau Patnaik នាយកស្តីទីអង្គការ WWFប្រចាំកម្ពុជា តំណាងមន្ទីរកសិកម្មខេត្តក្រចេះ ខេត្តស្ទឹងត្រែង តំណាងមន្ទីរពាក់ព័ន្ធផ្សេងៗ លោកអភិបាលស្រុកសំបូរ ស្រុកចិត្របុរី ស្រុកព្រែកប្រសព្វ អាជ្ញាធរមូលដ្ឋាន មន្រ្តីជំនាញពាក់ព័ន្ធ និងមន្រ្តីឆ្មាំសរុបអ្នកចូលរួមប្រមាណជាង៨០នាក់។
ថ្លែងក្នុងឱកាសនោះ ឯកឧត្តម ហាស់ សារ៉េត បានពាំនាំនូវការផ្តាំផ្ញើសួរសុខទុក្ខពីសំណាក់ឯកឧត្តមរដ្ឋមន្រ្តី ឌិត ទីណា និងបានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង ក្នុងឆ្នាំ២០២៥កន្លងទៅ ដែលជាប្រវត្តិសាស្ត្រ គឺយើងអាចការពារសត្វផ្សោតមិនឱ្យស្លាប់ ពីការប្រើឧបករណ៍នេសាទខុសច្បាប់ និងមានកូនផ្សោតកើតថ្មីចំនួន៨ក្បាល ដែលជាលទ្ធផលដ៏ប្រសើរបំផុត។
ឯកឧត្តមរដ្ឋលេខាធិការបានគូសបញ្ជាក់ទៀតថា សមិទ្ធផលនេះ កើតចេញពីការខិតខំប្រឹងប្រែងរួមគ្នា ទាំងក្រសួងកសិកម្ម ដែលមាននាយកដ្ឋានអភិរក្សជលផល នៃអគ្គនាយកដ្ឋានផលផល ជាអង្គភាពសម្របសម្រួលអនុវត្តផ្ទាល់ រដ្ឋបាលខេត្តក្រចេះ និងស្ទឹងត្រែង អង្គភាពពាក់ព័ន្ធក្រោមឱវាទខេត្ត អាជ្ញាធរមូលដ្ឋាន អង្គការWWF និងមន្រ្តីឆ្មាំទន្លេ បានពង្រឹងការល្បាត ទប់ស្កាត់បទល្មើសនេសាទខុសច្បាប់ និងតាមដានសុខភាពសត្វផ្សោត ការលើកកម្ពស់ការយល់ដឹងសាធារណៈ និងការពង្រឹងកិច្ចសហប្រតិបត្តិការជាមួយដៃគូអភិវឌ្ឍ។
ជាចុងបញ្ចប់ឯកឧត្តមរដ្ឋលេខាធិការ បានផ្តល់អនុសាសន៍ដល់គ្រប់ភាគីពាក់ព័ន្ធទាំងអស់ ដើម្បីពង្រឹងប្រសិទ្ធភាពការងារការពារសត្វផ្សោតត្រូវផ្តោតលើអាទិភាពចម្បងៗចំនួន៥ រួមមាន ៖ ១.ពង្រឹងរចនាសម្ព័ន្ធឆ្មាំការពារ ពង្រឹងសមត្ថភាពក្រុមមន្រ្តីឆ្មាំ ២.លើកកម្រិតស្នាក់ការល្បាតដោយធ្វើការជួសជុលស្នាក់ការល្បាតកាំពីជា «មជ្ឈមណ្ឌលស្រាវជ្រាវ និង តាមដាន និងការបំពាក់គ្រឿងបរិក្ខារទំនើប»។ ៣.នាំយកបច្ចេកវិទ្យាទំនើបមកប្រើប្រាស់ អនុវត្តប្រព័ន្ធកាមេរ៉ាស្វ័យប្រវត្តិ និងដ្រូន ភ្ជាប់ជាមួយនឹងទូរទស្សន៍តាមដាន។ ៤.កំណត់អាទិភាពនិងការពារអន្លង់ត្រីមេពូជ ដើម្បីធានានិរន្តរភាពធនធានជលផលនិងចំណីរបស់សត្វផ្សោត ៥.ពង្រឹងការអប់រំនិងផ្សព្វផ្សាយ បន្តអប់រំសហគមន៍មូលដ្ឋាន និងសាធារណជន ដើម្បីរួមគ្នាការពារសត្វផ្សោត និងប្រព័ន្ធអេកូឡូស៊ីទន្លេមេគង្គ៕
