ឯកឧត្តមរដ្ឋមន្ត្រី វេង សាខុន និងលោកជំទាវ ព្រមទាំងថ្នាក់ដឹកនាំ សមាជិក សមាជិកា មន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ និងពុទ្ធបរិស័ទបានដង្ហែអង្គកឋិនទានសាមគ្គី

ចេញ​ផ្សាយ​ ៥ វិច្ឆិកា ២០១៨ 4402

នាវេលាម៉ោង០៧:៣០នាទីព្រឹក ថ្ងៃសៅរ៍ ១០រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០៣ ខែវិច្ឆិកា ឆ្នាំ២០១៨ ឯកឧត្តមរដ្ឋមន្ត្រី វេង សាខុន និងលោកជំទាវ ព្រមទាំងថ្នាក់ដឹកនាំ សមាជិក សមាជិកា មន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ និងពុទ្ធបរិស័ទបានដង្ហែអង្គកឋិនទានសាមគ្គី វេរប្រគេនព្រះសង្ឃដែលគង់ចាំព្រះវស្សាអស់ត្រីមាសក្នុងពុទ្ធសីមា និងបានប្រគេនបច្ច័យសម្រាប់កសាងបង្ហើយតំបូលសាលាធម្មសភា និងទីសេនាសនៈនានាក្នុង វត្តពោធិមង្គលឧត្តមក្រឡា ហៅវត្តក្រឡា ស្ថិតនៅភូមិក្រឡា ឃុំអំពិល ស្រុកកំពង់សៀម ខេត្តកំពង់ចាម។

ក្នុងឱកាសដ៏ប្រពៃនាថ្ងៃនេះ ឯកឧត្តមរដ្ឋមន្ត្រីបានថ្លែងអំណរគុណយ៉ាងជ្រាលជ្រៅជូនចំពោះឯកឧត្តម លោកជំទាវ លោកឧកញ៉ា លោក លោកស្រី និងពុទ្ធបរិស័ទទាំងអស់ដែលបានចូលរួមប្រគេនទេយ្យទាន និងបច្ច័យមកកសាងសមិទ្ធផលនានាក្នុងវត្តពោធិមង្គលឧត្ដមក្រឡា សូមទទួលបាននពរជ័រ និងពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ ឯកឧត្តមរដ្ឋមន្ត្រីក៏បានគូសបញ្ជាក់ថា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រទេសជាតិមានសុខសន្តិភាព និងស្ថេរភាពពេញលេញ បានបង្កើតនូវបរិយាកាសយ៉ាងល្អប្រសើរដល់ប្រជាជនកម្ពុជាទូទាំងប្រទេសគោរពបូជាចំពោះព្រះពុទ្ធសាសនា និងប្រពៃណីខ្មែរយើង។

សូមបញ្ជាក់ផងដែរថា បុណ្យកឋិនទានសាមគ្គីនេះ ឯកឧត្តមរដ្ឋមន្ត្រី និងលោកជំទាវ ព្រមទាំងថ្នាក់ដឹកនាំ សមាជិក សមាជិកា មន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ និងពុទ្ធបរិស័ទបានប្រគេនបច្ច័យជូនវត្តពោធិមង្គលឧត្តមក្រឡា ចំនួន ២០០លានរៀល រួមជាមួយបច្ច័យចំនួន ១០០លានរៀល ទៀតប្រគេនជូនវត្តចំនួន ៥ ដែលស្ថិតនៅស្រុកកំពង់សៀម ខេត្តកំពង់ចាម។