ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារចុះពិនិត្យ និងអនុវត្ដគម្រោងកែលម្អសន្តិសុខទឹកកម្ពុជា (CWSIP) នៅក្នុងខេត្តក្រចេះ

ចេញ​ផ្សាយ​ ២៣ មេសា ២០២៥ 3044

នៅថ្ងៃទី២១-២២ ខែមេសា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង CWSIP បានអញ្ជើញដឹកនាំក្រុមការងារចុះពិនិត្យ និងអនុវត្តគម្រោងកែលម្អសន្តិសុខទឹកកម្ពុជា (CWSIP) នៅក្នុងខេត្តក្រចេះ។ 
ក្នុងដំណើរនេះ ឯកឧត្តមរដ្ឋលេខាធិការ និងក្រុមការងារ បានប្រជុំពិនិត្យវឌ្ឍនភាពការអនុវត្ដន៍គម្រោង CWSIP នៅមន្ទីរកសិកម្ម  រុក្ខាប្រមាញ់ និងនេសាទខេត្ដក្រចេះ ដោយមានការចូលរួមពីមន្រ្ដីអនុវត្ដគម្រោងថ្នាក់ជាតិ-ខេត្ដ នៃមន្ទីរកសិកម្ម មន្ទីរធនធានទឹក និងឧតុនិយម មន្រ្ដីកសិកម្មឃុំកន្ទួត និងឃុំថ្មី ស្រុកចិត្របុរី។ កិច្ចប្រជុំក៏បានពិនិត្យផ្ទៀងផ្ទាត់លើរបាយការណ៍ពីក្រុមហ៊ុន MWS គាំទ្រដោយស្ថានទូតអូស្រ្តាលី ដោយបានសិក្សាលើតំបន់គោលដៅអនុវត្ដគម្រោងនៅក្នុងខេត្ដនាពេលលន្លងមក ដើម្បីឱ្យមានភាពត្រឹមត្រូវ តាមទិសដៅគម្រោង។ 
ទន្ទឹមនឹងនេះ ឯកឧត្តមរដ្ឋលេខាធិការ បានដឹកនាំក្រុមការងារចុះជួបពិភាក្សាជាមួយរដ្ឋបាលឃុំថ្មី និងឃុំកន្ទួតនៃស្រុកចិត្របុរី តំណាងសហគមន៍កសិកម្ម សហគមន៍ប្រើប្រាស់ទឹក ដែលស្ថិតក្នុងវិសាលភាពគម្រោង។ កិច្ចពិភាក្សា ផ្ដោតលើទិន្នន័យចាំបាច់ លើការវាយតម្លៃសក្តានុពលដំណាំ ស្ថានភាពសហគមន៍កសិកម្ម សហគមន៍កសិករប្រើប្រាស់ទឹក និងសហគមន៍ព្រៃឈើ  ស្ថានភាពផលិតកម្មបច្ចប្បន្ន ដើម្បីប្រៀបធៀបពេលមុនគម្រោងចាប់ផ្តើម និងក្រោយអនុវត្តគម្រោង។ 
បើតាមឯកឧត្តមរដ្ឋលេខាធិការ កិច្ចពិភាក្សានេះ បានពិនិត្យលើបញ្ហាសំខាន់ៗពាក់ព័ន្ធ ដែលទាមទារកិច្ចសហការរវាងមន្រ្ដីបច្ចេកទេសអនុវត្តគម្រោងថ្នាក់ជាតិ-ខេត្ដ ជាមួយថ្នាក់មូលដ្ឋាន ឱ្យកាន់តែស្និទ្ធស្នាល បង្កើននូវប្រសិទ្ធភាពការងារ ដើម្បីឱ្យគម្រោងទទួលបានកិច្ចដំណើរការទៅមុខប្រកបដោយប្រសិទ្ធភាព និងប្រសិទ្ធផលខ្ពស់ ស្របតាមគោលដៅគម្រោងដែលបានកំណត់។ 
ជាទីបញ្ចប់ ឯកឧត្ដមរដ្ឋលេខាធិការ និងក្រុមការងារ បានចុះពិនិត្យអាងស្តុកទឹក ទ្វារទឹក និងពិនិត្យស្ថានភាពផលិតកម្មកសិកម្ម ព្រមទាំងពិនិត្យទីតាំងសាងសង់ផ្ទះសំណាញ់ និងមជ្ឈមណ្ឌលប្រមូលផ្ដុំកសិផល ក្នុងតំបន់វិសាលភាពគម្រោង ដែលស្ថិតក្នុងឃុំថ្មី និងឃុំកន្ទួត ស្រុកចិត្របុរី ខេត្ដក្រចេះ ផងដែរ៕