ព័ត៌មានផ្សេងៗទៀត
ឯកឧត្តម តូច ប៊ុនហួរ និង ឯកឧត្តម មាស ពិសិដ្ឋ អញ្ជើញដឹកនាំការធ្វើទស្សនកិច្ចសិក្សាអំពី «ការគ្រប់គ្រង ការកែច្នៃ និងការធ្វើពាណិជ្ជកម្មផលិតផលកសិកម្ម» នៅប្រទេសវៀតណាម
ចេញផ្សាយ ១៤ សីហា ២០២៥ 687
ឯកឧត្តម តូច ប៊ុនហួរ និង ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយ ឯកឧត្តម ចាន់ សុវត្ថិភាព និង ឯកឧត្តម សាយ សុភភោគា អនុរដ្ឋលេខាធិការ បានដឹកនាំមន្ត្រី ព្រមទាំងតំណាងដៃគូអភិវឌ្ឍន៍ សហគមន៍កសិកម្ម និងសហគ្រាសកសិកម្ម សរុបអ្នកចូលរួមចំនួន ៤២នាក់ ធ្វើទស្សនកិច្ចសិក្សាអំពី «ការគ្រប់គ្រង ការកែច្នៃ និងការធ្វើពាណិជ្ជកម្មផលិតផលកសិកម្ម »រយៈពេល៥ថ្ងៃ ពីថ្ងៃទី១១ ដល់ថ្ងៃទី១៥ ខែសីហា ឆ្នាំ២០២៥ នៅប្រទេសវៀតណាម ។
ដំណើរទស្សនកិច្ចសិក្សា ដែលរៀបចំដោយកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ជាយន្តការមួយរបស់ក្រសួងកសិកម្ម រុក្ខាប្រមាញ់ និងនេសាទ មានគោលបំណងផ្តល់ឱកាសដល់អ្នកចូលរួមបានឃើញ និងរៀនសូត្រផ្ទាល់អំពីការគ្រប់គ្រង ការកែច្នៃ និងការធ្វើពាណិជ្ជកម្មគ្រាប់ស្វាយចន្ទី ម្រេច ផ្លែឈើ និងកសិផលសំខាន់ៗផ្សេងទៀត នៅប្រទេសវៀតណាម ព្រមទាំងបង្កើនទំនាក់ទំនង ឬ ការយល់គ្នា រវាងតួអង្គសំខាន់ៗនៃខ្សែច្រវាក់តម្លៃ ពោលគឺអ្នកគ្រប់គ្រង ឬ តំណាងសហគមន៍កសិកម្ម និងសហគ្រាសកសិកម្ម រួមទាំងមន្ត្រីពាក់ព័ន្ធ ។
ស្របទៅតាមកម្មវិធីដែលបានគ្រោង អ្នកចូលរួមបានពិនិត្យផ្ទាល់នូវការច្នៃបង្កើត ការផលិត និងដំណើរការរបស់ឧបករណ៍ និងគ្រឿងម៉ាស៊ីនសម្រាប់កែច្នៃកសិផលខាងលើ ហើយបានស្តាប់បទបង្ហាញ និងការពន្យល់របស់អគ្គកុងស៊ុល និងអនុព័ន្ធពាណិជ្ជកម្មកម្ពុជា ប្រចាំនៅទីក្រុងហូជីមិញ អនុប្រធានសមាគមស្វាយចន្ទីវៀតណាម (Vietnam Cashew Association, VINACAS) ម្ចាស់ ឬ អ្នកដឹកនាំក្រុមហ៊ុនផលិតឧបករណ៍ និងគ្រឿងម៉ាស៊ីនកែច្នៃកសិផល ក្រុមហ៊ុនកែច្នៃកសិផល និងក្រុមហ៊ុនដែលធ្វើពាណិជ្ជកម្មផលិតផលកសិកម្មជាច្រើន។
គួរបញ្ជាក់ថា ប្រទេសវៀតណាមបានយកចិត្តទុកដាក់ខ្ពស់ ក្នុងការធ្វើឱ្យមានការចំណាយទាបសម្រាប់ផលិតកម្ម ការគ្រប់គ្រងនៅក្រោយពេលប្រមូលផល ការកែច្នៃ និងការធ្វើពាណិជ្ជកម្មផលិតផលកសិកម្ម ដោយបង្កើនផលិតភាព ឬ ការងាររបស់មនុស្ស និងគ្រឿងម៉ាស៊ីន។ ប្រទេសវៀតណាមក៏ធ្វើឱ្យគ្រឿងម៉ាស៊ីនមានផលិតភាពខ្ពស់ ដោយកែលម្អ ឬ អភិវឌ្ឍការកែច្នៃជាបន្តបន្ទាប់ ហើយធ្វើឱ្យកសិផលមានភាពសមស្រប ឬ សម្រួលដំណើរការរបស់គ្រឿងម៉ាស៊ីន ដូចជាការញែកយកគ្រាប់ស្វាយចន្ទីឱ្យមានទំហំប៉ុនៗគ្នា សម្រាប់បញ្ជូនទៅផ្នែកកាត់បកសំបកជាដើម៕
