ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ចូលរួមក្នុងពិធីរំលឹកខួបគម្រប់ ៣០ឆ្នាំនៃភាពជាដៃគូ និងពិធីចុះហត្ថលេខាលើកិច្ចព្រមព្រៀងរវាងរាជរដ្ឋាភិបាលកម្ពុជា និងវិទ្យាស្ថានស្រាវជ្រាវស្រូវអន្តរជាតិ (IRRI)

ចេញ​ផ្សាយ​ ១៣ កុម្ភៈ ២០១៨ 3657

នៅព្រឹកថ្ងៃទី២៧ ខែកក្កដា ឆ្នាំ២០១៦ នៅសណ្ឋាគារសុខាភ្នំពេញ មានរៀបចំពិធីរំឮកខួបគម្រប់ ៣០ឆ្នាំនៃភាពជាដៃគូ និងពិធីចុះហត្ថលេខាលើកិច្ចព្រមព្រៀងរវាងរាជរដ្ឋាភិបាលកម្ពុជា និងវិទ្យាស្ថានស្រាវជ្រាវស្រូវអន្តរជាតិ (IRRI) ក្រោមអធិបតីភាពដ៏ខ្ពង់ខ្ពស់របស់ ឯកឧត្តម យឹម ឆៃលី ឧបនាយករដ្ឋមន្រ្តី និងជាប្រធានក្រុមប្រឹក្សាស្តារ អភិវឌ្ឍន៏វិស័យកសិកម្ម និងជនបទ និងមានការអញ្ជើញចូលរួមដោយ ឯកឧត្តម ច័ន្ទ សារុន ទេសរដ្ឋមន្រ្តី និងជាអនុប្រធានក្រុមប្រឹក្សាស្តារអភិវឌ្ឍន៏វិស័យកសិកម្ម និងជនបទ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ហើយនិងមន្ត្រីនៃក្រសួង ស្ថាប័នពាក់ព័ន្ធ និងដៃគូអភិវឌ្ឍន៏។ 

ភាពជាដៃគូជាមួយវិទ្យាស្ថានស្រាវជ្រាវស្រូវអន្តរជាតិបានរួមចំណែកដល់រាជរដ្ឋាភិបាលកម្ពុជាអាចសម្រេចបាននូវសន្តិសុខស្បៀងអាហារ ជម្រុញការនាំចេញអង្ករទៅកាន់ទីផ្សារពិភពលោក និងជួយជម្រុញជីវភាពប្រជាកសិករកាន់តែមានភាពប្រសើរឡើង។ 

ឯកឧត្តមឧបនាយករដ្ឋមន្រ្តី យឹម ឆៃលី បានធ្វើការវាយតម្លៃខ្ពស់ចំពោះការខិតខំរបស់ក្រសួងកសិកម្ម រុក្ខាប្រមាញ់ និងនេសាទ និងការចូលរួមសហការរបស់វិទ្យាស្ថានស្រាវជ្រាវស្រូវអន្តរជាតិ ក្នុងការរួមចំណែកអភិវឌ្ឍន៏វិស័យកសិកម្មនៅកម្ពុជា។ ដោយវិស័យកសិកម្មនៅកម្ពុជានៅតែជាវិស័យអាទិភាព និងចូលរួមចំណែកក្នុងកំណើនសេដ្ឋកិច្ច ឯកឧត្តមឧបនាយករដ្ឋមន្រ្តី ក្នុងនាមរាជរដ្ឋាភិបាលបានស្នើអោយក្រសួងកសិកម្ម រុក្ខាប្រមាញ់ និងនេសាទ បន្តពង្រឹងគោលនយោបាយអភិវឌ្ឍ៏វិស័យកសិកម្មអោយកាន់តែរឹងមាំ និងបន្តពង្រឹងកិច្ចសហប្រតិបត្តិការជាមួយវិទ្យាស្ថានស្រាវជ្រាវស្រូវអន្តរជាតិ ដើម្បីជាធាតុចូលក្នុងការសម្រេចបាននូវគោលនយោបាយនាំចេញអង្ករអោយបាន១លានតោននាពេលខាងមុខ។ 

បន្ទាប់មក ក៏មានពិធីចុះហត្ថលេខាលើ Host Country Agreement រវាង ឯកឧត្តម អ៊ុច បូររិទ្ធ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និងលោកបណ្ឌិត Matthew K. Morell អគ្គនាយកវិទ្យាស្ថានស្រាវជ្រាវស្រូអន្តរជាតិ និងមានពិធីប្រគល់មេដាយ លិខិតទទួលស្គាល់ស្នាដៃ និងប័ណ្ណសរសើរ ដល់ក្រុមការងារក្រសួងកសិកម្ម រុក្ខាប្រមាញ់ និងនេសាទ និងវិទ្យាស្ថានស្រាវជ្រាវស្រូវអន្តរជាតិ ៕