ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយសហការី បានទៅបំពេញបេសកកម្មរយ:ពេល ០២ថ្ងៃចាប់ពីថ្ងៃទី២០-២១ ខែកក្កដា ទៅកាន់ខេត្តពោធិសាត់ បាត់ដំបង បន្ទាយមានជ័យ និងខេត្តសៀមរាប

ចេញ​ផ្សាយ​ ២២ កក្កដា ២០១៩ 4146

នៅព្រឹកថ្ងៃសៅរ៍ ៤រោច ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២០ ខែកក្កដា ឆ្នាំ២០១៩ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អមដំណើរដោយសហការី បានទៅបំពេញបេសកកម្មរយ:ពេល ០២ថ្ងៃចាប់ពីថ្ងៃទី២០-២១ ខែកក្កដា ទៅកាន់ខេត្តពោធិសាត់ បាត់ដំបង បន្ទាយមានជ័យ និងខេត្តសៀមរាប ដើម្បីពិនិត្យតាមដានលើការងារបង្កបង្កើនផល និងជាពិសេសចុះអន្តរាគមន៍ដោះស្រាយបញ្ហាចំបាច់ចំពោះមុខបរបស់បង ប្អូនប្រជាកសិករដែលកំពុងជួបគ្រោះរាំងស្ងួតធ្វើឲ្យប៉ះពាល់ដំណាំស្រូវស្រាលដើមរដូវ និងដំណាំចំការមួយចំនួនទៀត។ តាមកម្មវិធីដូចដែលបានគ្រោងទុកជាបន្តបន្ទាប់ដូចខាងក្រោម÷

ខេត្តពោធិសាត់÷

-កម្មវិធីទី០១: ឯកឧត្តមរដ្ឋមន្ត្រី និងសហការី បានចុះទៅពិនិត្យបន្លែសុវត្ថិភាព របស់កសិករ ជា សេងលឿង នៅភូមិអូរថ្កូវ សង្កាត់រលា ក្រុងពោធិសាត់ ដែលកំពុងដាំបន្លែលើផ្ទៃដី ៥ហតមានដំឡូងមី សណ្តែកគួ ត្រឡាច ត្រប់ ននោងជ្រុង។ល។ ក្នុង០១ លើកអាចរកកម្រៃបាន ៨-១០ លានរៀល (ក្នយ ០១លើកមានរយ:ពេល ៤៥ថ្ងៃ)។ បច្ចុប្បន្នបានរៀបចំចងក្រងជាសហគមន៍ផលិតបន្លែបាន ២៧គ្រួសារ ដោយរៀបចំកម្មវិធីដាំដុះទៅតាមតម្រូវការទីផ្សារ។ ជាមតិសហគមន៍ ពួកគាត់ស្នើសុំឲ្យរដ្ឋាភិបាលជួយគិតគូពីការផ្គត់ផ្គង់អគ្គិសនីបូមទឹក បញ្ចុះតម្លៃភ្លើង និងសម្ភារកសិកម្មមួយចំនួនទៀត។ នាឱកាសនេះ លោកបានណែនាំឱ្យកសិករដាំដំណាំឆ្លះ ចៀសវាងផលិតផលជន់លើទីផ្សារ និងជាពិសេសការឆ្លងរាលដាលជំងឺ។ អគ្គនាយកដ្ឋានកសិកម្ម ត្រូវសហការជាមួយមន្ទីររៀបចំថ្នាលបង្កាត់ពូជដំឡូងមីផ្សព្វផ្សាយជូនដល់កសិករដាំដើម្បីកាត់បន្ថយ និងឈានទៅលុបបំបាត់ជំងឺឆ្លងម៉ូសាអ៉ិច។ សហគមន៍គួររៀបចំផលិតពូជបន្លែដោយខ្លួនឯង ដោយមន្ទីរជាអ្នកគាំទ្របច្ចេកទេស ដើម្បីកាត់បន្ថយថ្លៃដើម ហើយក៏គួរតែប្រើប្រាស់ជីសរីរាង្គឲ្យបានច្រើនដើម្បីធានាដល់គុណភាពបន្លែ និងជាពិសេសសុខភាពអ្នកផលិតផង និងអ្នកបរិភោគផង។ ដើម្បីចូលរួមកាត់បន្ថយថ្លៃដើម លោកបានជួយ ឧបត្ថម្ភប្រេងម៉ាស៊ូតសម្រាប់បូមទឹកក្នុងសហគមន៍ចំនួន ២០០លីត្រផងដែរ។