ព័ត៌មានផ្សេងៗទៀត
ប្រកាសទទួលស្គាល់សហគមន៍អភិវឌ្ឍន៍កសិកម្មចំនួន៣នៅកំពង់ឆ្នាំង
ចេញផ្សាយ ២២ មករា ២០១៨ 4216
ដោយមានការគាំទ្រពីអង្គការជីវិតថ្លៃថ្នូរ សហការមូយមន្ទើរកសិកម្ម សហគមន៍អភិវឌ្ឍន៍កសិកម្ម ចំនួន៣ត្រូវបានប្រកាសទទួលស្គាល់ កាលពីដើមសប្តាហ៍នេះ រួមមានសហគមន៍កសិកម្មអភិវឌ្ឍន៍ក្បាលទឹក ឈានឡើងសហគមន៍កសិកម្មពាមមានជ័យ និង សហគមន៍ កសិកម្មពន្លឺសាមគ្គី។
សហគមន៍នេះស្ថិតនៅឃុំក្បាលទឹក ស្រុកទឹកផុស។ ឯកឧត្តមបណ្ឌិត ចន្ទ័ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកទូចម៉ារីម អភិបាលខេត្តកំពង់ឆ្នាំង បានអញ្ជើញចូលរួមក្នុងពិធីនេះដែរ។ នៅចំពោះមុខប្រជាជន ជាសមាជិកសហគមន៍ចំនួន១៥០គ្រួសារ ឯកឧត្តមរដ្ឋមន្ត្រីបានផ្តល់ជាពត៌មានថា តាមការព្យាករណ៍ចំនួន៣ ដែលប្រជាជនគួរតាមដាន និងយកចិត្តទុកដាក់ក្នុងនោះ ទី១-ពីធីសម្រក់ទៀនជ័យ ដែលទស្សន៍ទាយថា ខេត្តកំពង់ឆ្នាំង និងមានភ្លៀងមធ្យមនៅដើមឆ្នាំ ភ្លៀងធ្លាក់ច្រើននៅកណ្តាលឆ្នាំ និងចុងឆ្នាំ។
ទី២-ពិធីច្រត់ព្រះនង្គ័ល ដែលគោឧសភរាជសោយ តែ ពោត សណ្តែក និងស្មៅ និងទី៣ តាមការព្យាករណ៍ របស់ក្រសួងធនធានទឹក និងឧតុនិយមថា ឆ្នាំនេះគ្មានកូនរដូវប្រាំងទេទឹកភ្លៀងចាប់ធ្លាក់ចុះ នៅពាក់កណ្តាលខែឧសភា ហើយនិងអស់ នៅពាក់កណ្តាលខែវិច្ឆិការ។
ឯកឧត្តមបានបន្តទៀតថា បើគ្មានកូនរដូវប្រាំងទេ វាជាអំណោយផលល្អណាស់ ដល់ការបង្កបង្កើនផលស្រូវស្រាលដើមរដូវ។ ប៉ុន្តែឯកឧត្តមបានបញ្ជក់ឡើងវិញថា ផលស្រូវកើនឡើងឬអត់? គឺពឹងផ្អែកទៅលើ ដៃរាប់លានគូររបស់ប្រជាកសិករទូទាំងផ្ទៃប្រទេស។ ឯកឧត្តមបន្តដោយរំលឹកថាយើងត្រូវធ្វើស្រូវឲបាន២ដង និងដាំនាំចម្ការបន្ថែម។
ទាក់ទងដល់ការដំណើរ របស់សហគមន៍ឯកឧត្តមរដ្ឋមន្ត្រី បានជូនជាយោបល់ថា ដើម្បីធ្វើយ៉ាងណា អភិវឌ្ឍន៍សហគមន៍នេះ ឲបានកាន់តែប្រសើរឡើង សហគមន៍ដែលរឹងមាំល្អ គឺអាស្រ័យលើយើងជាអ្នកដឹកនាំ និងសមាជិក។ កត្តាដែលនាំឲសហគមន៍មាននិរន្តភាពគឺគ្មានអំពើរពុករលួយ តម្លាភាព និងមានទំនួលខុសត្រូវចំពោះទង្វើរបស់ខ្លួនចំពោះសមាជិក។ មានការប្រជុំគណៈកម្មការ សមាជិកឲបានទៀងទាត់ ដើម្បីឆ្លុះបញ្ចាំងរកចំណុចល្អ និងខ្វះខាតរបស់សមាជិក។ បើមានប្រការណាមួយ ធ្វើមិនបានត្រូវប្រញាប់រកមន្ទើរកសិកម្មកឬក្រសួងកសិកម្ម ព្រោះសហគមន៍និងក្លាយជាសហករណ៍។
ខណៈនោះឯកឧត្តមក៏បានប្រាប់ដល់កសិករផងដែរ អំពីពូជស្រូវដែលរាជរដ្ឋភិបាលបានដាក់ឲប្រើប្រាស់ មាន១០ពូជ ដែលក្នុងនោះមានៈពូជស្រូវស្រាលមិនប្រកាន់រដូវ ,ពូជស្រូវសែនពិដោរ,ពូជជលសារ,ពូជអ៊ីអ៊ែរ៦។ ពូជស្រូវកណ្តាលៈពូជផ្ការុះដួល ផ្កាចន្ទន៍សែនសរ ផ្ការមៀត និងពូជផ្ការំដេង។ ពូជស្រូវធ្ងន់ៈពូជរាំងជ័យ ពូជខា៤និងពូជខា។
ឯកឧត្តមបានរំលឹកថា ពូជស្រូវដែលកំពុងប្រើ គឺគ្មានប្រភពច្បាស់លាស់សូមប្តូរពូជចេញ។ ជាមួយគ្នានេះក៏ត្រូវប្តូរទស្សនៈពីការធ្វើស្រែ សម្រាប់តែទុកហូប ទៅជាការធ្វើសម្រាប់លក់ដូរ។ ក្នុងពិធីនេះផងដែរឯកឧត្តមរដ្ឋមន្ត្រីចែកពូជស្រូវIRR ២តោន និងថវិការ៨លានរៀលជូនដល់សហគមន៍(ជាថវិការរបស់អង្គការជីវិតថ្លៃថ្លូរ)៕
