ព័ត៌មានផ្សេងៗទៀត
ក្រសួងកសិកម្ម រុក្ខាប្រមាញ់ និងនេសាទ រៀបចំកិច្ចប្រជុំផ្សព្វផ្សាយការអនុវត្តកម្មវិធីអន្តរាគមន៍សង្គ្រោះដោយពហុវិបត្តិ (CERC-CaWSIP/MAFF) ដើម្បីលើកកម្ពស់ជីវភាពរស់នៅ
ចេញផ្សាយ ១៧ កញ្ញា ២០២៦ 52
នាព្រឹកថ្ងៃទី១៦ ខែកញ្ញា ឆ្នាំ២០២៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការ និងជានាយកគម្រោងកែលម្អសន្តិសុខទឹកកម្ពុជា(CaWSIP/MAFF) បានដឹកនាំកិច្ចប្រជុំផ្សព្វផ្សាយការអនុវត្តកម្មវិធីអន្តរាគមន៍សង្គ្រោះដោយពហុវិបត្តិ(CERC-CaWSIP/MAFF) ដោយប្រើប្រាស់បច្ចេកទេសកសិកម្មឆ្លាតវៃធន់នឹងអាកាសធាតុ(CSA) ដើម្បីលើកកម្ពស់ជីវភាពរស់នៅរបស់ប្រជាពលរដ្ឋ បង្កើនប្រាក់ចំណូលគ្រួសារ និងពង្រឹងសន្តិសុខស្បៀងរបស់ប្រជាពលរដ្ឋ។
កិច្ចប្រជុំនេះ មានការអញ្ជើញចូលរួមពីថ្នាក់ដឹកនាំក្រសួងកសិកម្ម តំណាងមន្ទីរកសិកម្មនៃខេត្តគោលដៅ ទីប្រឹក្សា និងមន្ត្រីគម្រោង មន្ត្រីជំនាញពាក់ព័ន្ធ និងមន្ត្រីកសិកម្មឃុំ ក្នុងគោលបំណងផ្សព្វផ្សាយអំពីវិសាលភាព និងយន្តការអនុវត្តកម្មវិធី CERC-CaWSIP ឱ្យបានចំគោលដៅ និងមានប្រសិទ្ធភាព ដើម្បីឆ្លើយតបនឹងស្ថានភាពពហុវិបត្តិ ដោយផ្តោតលើការគាំទ្រផលិតកម្មបន្លែសុវត្ថិភាព ការដាំដុះផ្សិត ការចិញ្ចឹមមាន់ កង្កែប និងវារីវប្បកម្ម។
ថ្លែងទៅកាន់អង្គប្រជុំ ឯកឧត្តមបណ្ឌិត បានលើកឡើងអំពីផលប៉ះពាល់ដែលបង្កឡើងដោយស្ថានភាពពហុវិបត្តិ ដែលទាមទារឱ្យមានការអន្តរាគមន៍ និងការគាំទ្រដល់ប្រជាពលរដ្ឋក្នុងវិស័យកសិកម្ម។ ឯកឧត្តមបណ្ឌិត បានលើកទឹកចិត្តដល់មន្ត្រីថ្នាក់ជាតិ ថ្នាក់ក្រោមជាតិ និងដៃគូអភិវឌ្ឍន៍ ឱ្យបន្តពង្រឹងកិច្ចសហការរួមគ្នា ក្នុងការអនុវត្តតួនាទី និងភារកិច្ចប្រកបដោយស្មារតីទទួលខុសត្រូវខ្ពស់ មានភាពបុរេសកម្ម និងផ្តល់ការគាំទ្រឱ្យចំគោលដៅ ស្របតាមគោលការណ៍ និងនីតិវិធីរបស់គម្រោង ព្រមទាំងគោលនយោបាយរបស់រាជរដ្ឋាភិបាលកម្ពុជា។
ជាមួយគ្នានេះ ឯកឧត្តមរដ្ឋលេខាធិការ បានគូសបញ្ជាក់អំពីដំណើរការអនុវត្តកម្មវិធី ការតាមដាន ត្រួតពិនិត្យ និងវាយតម្លៃ ព្រមទាំងនីតិវិធីពាក់ព័ន្ធ និងមធ្យោបាយប្រមូលទិន្នន័យពីគ្រួសារអ្នកទទួលផល ដើម្បីធានាឱ្យការអនុវត្តកម្មវិធីប្រព្រឹត្តទៅដោយតម្លាភាព ប្រសិទ្ធភាព និងប្រសិទ្ធផលខ្ពស់។
តាមរយៈការអនុវត្តកម្មវិធីអន្តរាគមន៍សង្គ្រោះនេះ ប្រជាពលរដ្ឋប្រមាណ ២២ ៤៥០ គ្រួសារ នឹងទទួលបានផលប្រយោជន៍ពីកញ្ចប់អន្តរាគមន៍ ដោយអាចបង្កើនប្រាក់ចំណូលបន្ថែមប្រមាណ ១២០–១៨០ ដុល្លារសហរដ្ឋអាមេរិកក្នុងមួយខែ តាមរយៈការអនុវត្តកសិកម្មឆ្លាតវៃធន់នឹងអាកាសធាតុ (CSA)៕
