Other News
ខេត្ដតាកែវមានគម្រោងធ្វើស្រូវប្រាំង៧០ពាន់ហិកតា
ចេញផ្សាយ ២២ មករា ២០១៨ 4814
ឯកឧត្ដមបណ្ឌិតច័ន្ទ សារុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ខេត្ដតាកែវ មានគម្រោងធ្វើស្រូវប្រាំងឆ្នាំនេះចំនួន៧០ ពាន់ហិកតា ដែលចំនួននេះបានធ្វើឱ្យខេត្ដនេះជាប់ចំណាត់ថ្នាក់លេខ១ ។
ខណៈអញ្ជើញចូលរួម សម្ភោធផ្លូវលំប្រវែង២គីឡូម៉ែត្រ តភ្ជាប់ពីឃុំគុស ទៅឃុំត្រាំកក់ ស្រុកត្រាំកក់ កាលពីថ្ងៃទី២៦ ខែធ្នូ ឯកឧត្ដមរដ្ឋមន្ដ្រី បានថ្លែងប្រាប់ដល់អ្នកចូលរួម ប្រមាណ៣០០នាក់ថា រហូតមកដល់ពេលនេះ ការប្រមូលផលស្រូវវស្សា ជិតរួចរាល់ហើយ ហើយរំពឹងថា នៅដំណាច់ខែនេះ នឹងបញ្ចប់ទាំងស្រុង ។
ដោយឡែកខេត្ដតាកែវ ក្រៅពីស្រូវវស្សា ក៏មានគម្រោងធ្វើស្រូវប្រាំង ប្រមាណ៧០ពាន់ហិកតាថែមទៀត។ ឯកឧត្ដមរំពឹងថា ផែនការនេះ អាចនឹងសម្រេចបាន ហើយក្នុងគម្រោងបែបនេះ បានធ្វើឱ្យខេត្ដតាកែវ ជាប់ចំណាត់ថ្នាក់លេខមួយ ក្នុងការធ្វើស្រូវប្រាំង។
ឯកឧត្ដមបានបន្ដទៀតថា ដើម្បីសម្រេចបាននូវអ្វី ដែលក្ដីបំណងធំបំផុតរបស់រាជរដ្ឋាភិបាល ក្នុងការប្រែក្លាយកម្ពុជា ឱ្យទៅជាប្រទេសនាំអង្ករចេញ នៅឆ្នាំ២០១៥ នោះគឺការកែប្រែទម្លាប់ ការអនុវត្ដន៏បច្ចេកទេសថ្មី និងការជ្រើសរើសពូជជាប្រការដែលត្រូវតែប្រកាន់យកពីពេលនេះតទៅ ។
ឯកឧត្ដម បានជំរុញឱ្យកសិករប្រើប្រាស់ពូជស្រូវ ចំនួន១០មុខ ដែលរាជរដ្ឋាភិបាល បានកំណត់យក ដើម្បីធ្វើការដាំដុះសម្រាប់ការនាំចេញ និងសម្រាប់ទីផ្សារ។ គួររំលឹកថា ពូជស្រូវទាំង១០មុខ នោះមានស្រូវ ស្រាល មិនប្រកាន់រដូវចំនួន៣ គឺសែនពិដោរ IR66 និងជលសា។ ស្រូវកណ្ដាលមានចំនួន៤គឺ ស្រូវផ្ការំដួល ផ្ការមៀត ផ្ការំដេង និងផ្កាចន្ទសែនស និងស្រូវធ្ងន់ចំនួន៣ គឺ CAR4 CAR6 និងរាំងជ័យ ។
តាមការប៉ាន់ស្មានតុល្យភាពស្បៀង ជំហានដំបូងឆ្នាំ ២០១០-២០១១ គឺផ្ទៃដីប្រមូលផលចំនួន ២,៣៧លានហិកតា (វស្សា) និង០,៣៧លានហិកតា(ប្រាំង)។ ទិន្នផលមធ្យមចំនួន២,៧១តោន ក្នុង១ហិកតា (វស្សា) និង៤,១៤តោន ក្នុងមួយហិកតា (ប្រាំង)។ បរិមាណផលប្រមាណ៦,៤៣លានតោន (វស្សា)និង១,៥៣ លានតោន (ប្រាំង)។ ក្រសួងកសិកម្ម បានប៉ាន់ប្រមាណថា ជាសរុបយើងអាចទទួលផលស្រូវបាន៧,៩៦លានតោនស្រូវ និងទិន្នផលមធ្យម២,៩០តោនក្នុង១ហិកតា។ បានសេចក្ដីថា យើងមានបរិមណអង្ករលើសចំនួន២,៤២លានតោន ដែលស្មើនឹងចំនួន៣,៧៨លានតោនស្រូវ ។
ឯកឧត្ដមរដ្ឋមន្ដ្រី ក៏បានផ្ដល់ជាយោបល់ថា ការប្រើប្រាស់មូលនិធិឃុំ គួរតែប្រើប្រាស់ ឱ្យចំមុខសញ្ញា និងមានប្រសិទ្ធភាព ដែលក្នុងនោះ គេគួរតែផ្ដោតទៅលើការកសាងប្រព័ន្ធរាធាសាស្ដ្រ ក្នុងមូលដ្ឋាន និងហេដ្ឋារចនាសម្ព័ន្ធគមនាគមន៏។ ឯកឧត្ដមបានរំលឹកឱ្យសម្លឹង ទៅរកការស្វែងរកប្រភពទឹក ការបង្កើតប្រភពទឹក និងការគ្រប់គ្រងទឹកឱ្យបានល្អ។ តាមភូមិ ឃុំ និងសហគមន៏គួរតែមានស្រះទឹករបស់ខ្លួន។ ដោយឡែកគ្រួសារនីមួយៗ ក៏គួរពិចារណា ក្នុងការជីកស្រះទឹកផ្ទាល់ខ្លួនប្រើប្រាស់ ជាពហុប្រយោជន៏ ក្នុងការបង្កើនចំណូលសម្រាប់គ្រួសារ ៕
