ព័ត៌មានផ្សេងៗទៀត
ក្រសួងកសិកម្ម មានប្រតិភូមួយទៀត និងតែងតាំងមន្ត្រីមួយចំនួន
ចេញផ្សាយ ១៧ មករា ២០១៨ 4803
ក្រសួងកសិកម្ម បានប្រកាសចូលកាន់តំណែង ជាផ្លូវការនូវប្រតិភូរាជរដ្ឋាភិបាលមួយរូប និងតែងតាំងប្រគល់ភារកិច្ចជូន ដល់មន្ត្រីមួយចំនួនទៀត កាលពីរសៀលថ្ងៃទី៣ ខែធ្នូ នាទីស្តីការក្រសួង ដោយមានការអញ្ជើញចូលរួមពីសំណាក់ឯកឧត្តម បណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។
មន្ត្រីដែលទទួលនូវការតែងតាំង និងប្រគល់ភារកិច្ចនោះមាន លោក សូ ខនឫទ្ធីគុណ ត្រូវបានតែងតាំងជាប្រតិភូរាជរដ្ឋាភិបាលទទួលបន្ទុក ជាអគ្គនាយកកសិកម្មនៃអគ្គនាយកដ្ឋានកសិកម្ម ឋានៈស្មើរដ្ឋលេខាធិការ, លោក ថៃ វុទ្ធី តែងតាំងជាប្រធាននាយកដ្ឋានបុគ្គលិក, លោក ហុង ណារិត ត្រូវបានប្រគល់ភារកិច្ច ឱ្យបំពេញមុខងារជាប្រធាននាយកដ្ឋានផែនការ និងស្ថិតិ, លោក តឹក ប៊ុនឡុង តែងតាំងជាប្រធានការិយាល័យគណនេយ្យ និងហិរញ្ញវត្ថុនៃសកលវិទ្យាល័យភូមិន្ទកសិកម្ម។
ក៏ត្រូវបានសម្រួលភារកិច្ចដល់មន្ត្រីតែងតាំង និងប្រគល់ភារកិច្ចជូនដល់មន្ត្រីចំនួន ២រូបទៀតដែរសម្រាប់នាយកដ្ឋានសហប្រតិបត្តិការអន្តរជាតិ ដែលមាន កញ្ញា ឡូ សុខា និងលោកស្រី សារ សុភីរៈ។
ខណៈនេះក្រសួងកសិកម្ម បានបន្ថែមប្រតិភូរាជរដ្ឋាភិបាលមួយរូបទៀត បន្ទាប់ពីក្រសួងនេះមាន ៣រូប រួចមកហើយ ដែលក្នុងនោះប្រតិភូទទួលបន្ទុករដ្ឋបាលជលផល ប្រតិភូទទួលបន្ទុករដ្ឋបាលព្រៃឈើ និងប្រតិភូទទួលបន្ទុកចំការកៅស៊ូ។
ឯកឧត្តមរដ្ឋមន្ត្រី ខណៈអញ្ជើញចូលរួមក្នុងពីធីនេះ បានថ្លែងរំលើកឡើងវិញ អំពីអ្វីដែលជាបុព្វហេតុជំរុញឱ្យមានការតែងតាំងការប្រគល់ភារកិច្ចនេះឡើង។ ឯកឧត្តមបញ្ជាក់ថា ការពិតនេះជាកិត្តិយសសម្រាប់ក្រសួង បុគ្គលសម្រាប់អង្គភាព តែអ្វីដែលត្រូវតែសម្លឹងទៅមុខទៀតនោះ គឺនៅពេលទទួលបាននូវការទុកចិត្តការប្រគល់ភារកិច្ចនេះ ហើយគប្បីត្រូវតែបង្កើនការយកចិត្តទុកដាក់ថែមទៀត ដើម្បីសម្រេចឱ្យបាននូវអ្វីដែលក្រសួងប្រគល់ជូន, សម្រេចនូវគោលនយោបាយរបស់ក្រសួងក៏ដូចជារាជរដ្ឋាភិបាល។
ឯកឧត្តមរដ្ឋមន្ត្រីបន្តថា មហិច្ជតារបស់ប្រមុខរាជរដ្ឋាភិបាល នៃយើងក្នុងការធ្វើឱ្យកម្ពុជាក្លាយជាប្រទេសនាំអង្ការចេញនាឆ្នាំ២០១៥ ខាងមុខគឺជាការងារមួយដែលមិនមែនជាងាយស្រួលពេកនោះទេ។ ដូចនេះការពង្រីកសកម្មភាព ទៅក្នុងស្រទាប់កសិករ គឺជាការងារដែលចាំបាច់បំផុតទៅក្នុងការផ្លាស់ទម្លាប់របស់កសិករ។
ឯកឧត្តមក៏បានរំលឹកដល់គ្រប់នាយកដ្ឋាន អគ្គនាយកដ្ឋាន ការិយាល័យត្រូវពិនិត្យសម្លឹងទៅរកមន្ត្រីដែលមានសមត្ថភាពមានស្នាដៃ ដើម្បីទទួលការលើកសរសើរ និងបន្ថែមសមត្ថភាពដល់មន្ត្រីទាំងអស់ដែលបំពេញការងារ។ ឯកឧត្តមបន្តថា នាយកដ្ឋានផែនការ ស្ថិតិ ក៏ត្រូវយកចិត្តទុកដាក់ថែមទៀតក្នុងការចងក្រងស្ថិតិរបស់ខ្លួនឱ្យច្បាស់លាស់ត្រឹមត្រូវដែលគេអាចយកទៅប្រើប្រាស់ជាគោលនយោបាយជាការស្រាវជ្រាវបាន។ ឯកឧត្តមក៏រំលឹកឱ្យមានស្មារតីសាមគ្គី និងការការពង្រីកសមត្ថភាពថែមទៀតដើម្បីឈានទៅសម្រេចឱ្យបានលទ្ធផលល្អការងារ។
