ព័ត៌មានផ្សេងៗទៀត
ឯកឧត្តមបណ្ឌិត អ៊ុក រ៉ាប៊ុន ជួបពិភាក្សាជាមួយ ឯកឧត្តម Jean-François Cautain ឯកអគ្គរដ្ឋទូតនិងជាប្រធានសហភាពអឺរ៉ុប ប្រចាំនៅព្រះរាជាណាចក្រកម្ពុជា
ចេញផ្សាយ ២៣ មករា ២០១៨ 3456
នៅរសៀលថ្ងៃទី១៦ ខែមករា ឆ្នាំ២០១៤ ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបសវនាការជាមួយឯកឧត្តម Jean-François Cautain ឯកអគ្គរដ្ឋទូត និងជាប្រធានសហភាពអឺរ៉ុបប្រចាំនៅព្រះរាជាណាចក្រកម្ពុជា។
ឯកឧត្តមរដ្ឋមន្ត្រីបានរំលឹកអំពីកិច្ចសហប្រតិបត្តិការជាមួយសហភាពអឺរ៉ុបដែលមានតាំងពីយូរយារណាស់មកហើយក្នុងការចូលរួមអភិវឌ្ឍន៍វិស័យកសិកម្មនិងតំបន់ជនបទនៅកម្ពុជា តាមរយៈការជួយគាំទ្រដល់កម្មវិធីកំណែទម្រង់វិស័យព្រៃឈើ ជលផល ការបង្កើនផលិតកម្មសត្វ ការធ្វើពិពិធកម្មកសិកម្ម ការអភិវឌ្ឍន៍ធនធានមនុស្ស។ល។ ជាពិសេសជំនួយសង្គ្រោះបន្ទាន់ក្នុងកាលៈទេសៈដែលកម្ពុជាជួបប្រទះគ្រោះធម្មជាតិ។ ឯកឧត្តមរដ្ឋមន្ត្រីបានជម្រាបជូនផងដែរថា ពិតមែនតែកម្ពុជាបានជួបប្រទះគ្រោះធម្មជាតិកន្លងមកក្តី តែតាមលទ្ធផលនៃការវាយតម្លៃតុល្យភាពស្បៀង សម្រាប់ឆ្នាំ២០១៣-២០១៤ នាពេលថ្មីៗនេះ គឺយើងមានអតិរេកស្រូវជាង៤,៧៨៥លានតោន គិតជាអង្ករសម្រាប់គោលដៅនាំចេញជាង៣លានតោនដែលរំពឹងថានឹងអាចនាំចេញអង្ករបានយ៉ាងតិច១លានតោន នៅឆ្នាំ២០១៥តាមការរំពឹងទុក។
ក្រៅពីការបង្កើនផលិតភាព ការធ្វើកសិកម្មចម្រុះ និងពាណិជ្ជូបនីយកម្មនោះ ក្រសួងកសិកម្ម រុក្ខាប្រមាញ់ និងនេសាទកំពុងខិតខំប្រឹងរៀបចំអត្ថបទក្រោមច្បាប់ស្តីពីសហគមន៍កសិកម្ម ក៏ដូចជាការពង្រឹងការអនុវត្តផលិតកម្មកសិកម្មតាមកិច្ចសន្យានិងការរៀបចំអត្ថបទច្បាប់ផ្សេងៗទៀតក្នុងបំណងជួយលើកកម្ពស់កម្រិតជីវភាពរស់នៅរបស់ប្រជាកសិករឱ្យបានល្អប្រសើរ។
ឯកឧត្តមទូតបានរំលឹកអំពីកិច្ចសហប្រតិបត្តិការក្នុងវិស័យកសិកម្មដែលមានជាង២០ឆ្នាំកន្លងមក ដោយបានចាត់ទុកវិស័យកសិកម្មថា ជាវិស័យគន្លឹះនិងមានសារៈសំខាន់សម្រាប់កំណើនសេដ្ឋកិច្ចជាតិ។ លោកបានជម្រាបជូនផងដែរអំពីកិច្ចព្រមព្រៀងផ្តល់ជំនួយហិរញ្ញប្បទានរបស់សហភាពអឺរ៉ុបលើគម្រោងកម្មវិធីលើកកម្ពស់កំណើនវិស័យកសិកម្ម ដោយនិរន្តរភាពសម្រាប់គាំទ្រដល់គោលនយោបាយវិស័យកសិកម្ម វិស័យជលផល និងផលិតកម្មសត្វ។ ឯកឧត្តមនឹងជំរុញឱ្យមន្ត្រីរបស់សហភាពអឺរ៉ុបសហការដល់ដំណើរការអនុវត្តគម្រោងនេះឱ្យបានទាន់ពេលវេលា។
ឯកឧត្តមបានជម្រាបជូនអំពីបញ្ហាខ្លះៗពាក់ព័ន្ធនឹងដីសម្បទានសេដ្ឋកិច្ច(ដំណាំអំពៅ) នៅខេត្តកំពង់ស្ពឺ និងខេត្តកោះកុងដែលប៉ះពាល់ដល់ប្រជាពលរដ្ឋដែលយើងទាំងអស់គ្នាត្រូវរួមគ្នាដោះស្រាយ។ ក្រៅពីនេះEU បានផ្តោតការយកចិត្តទុកដាក់លើការគ្រប់គ្រងព្រៃឈើប្រកបដោយនិរន្តរភាពហើយEU មានប្រព័ន្ធមួយដែលហៅថា FLEGT(Forest Law Enforcement ,Governance) ដែលត្រូវបានប្រើប្រាស់ក្នុងការបំពេញកិច្ចការជាមួយប្រទេសមួយចំនួនក្រៅពីEU ក្នុងន័យជួយប្រទេសទាំងនោះក្នុងលក្ខខណ្ឌមួយដែលប្រទេសទាំងនោះមានយន្តការគ្រប់គ្រងព្រៃឈើប្រកបដោយចីរភាព និងមានប្រព័ន្ធវិញ្ញាបនប័ត្រត្រឹមត្រូវសម្រាប់ការនាំចេញ។ ចំណុចពិសេសគួរកត់សម្គាល់មួយទៀតគឺបានកំណត់ឱ្យរួចពន្ធលើមុខទំនិញគ្រប់ប្រភេទដែលនាំចូលសហភាពអឺរ៉ុបលើកលែងតែអាវុធ។
ឯកឧត្តមរដ្ឋមន្ត្រីនឹងជំរុញអង្គភាពពាក់ព័ន្ធក្រោមឱវាទដើម្បីអនុវត្តគម្រោងថ្មីនេះ ឱ្យទទួលបានជោគជ័យ និងចូលរួមដោះស្រាយជាជំហ៊ានៗជាមួយក្រសួង-ស្ថាប័ន ក៏ដូចជាអាជ្ញាធរមូលដ្ឋានពាក់ព័ន្ធតាមជាក់ស្តែង។ ជាថ្មីម្តងទៀត ឯកឧត្តមរដ្ឋមន្ត្រីបានថ្លែងអំណរគុណចំពោះជំនួយឧបត្ថម្ភគាំទ្រប្រកបដោយផ្លែផ្ការបស់EUហើយនឹងខិតខំពង្រឹងកិច្ចសហប្រតិបត្តិការឱ្យបានជិតស្និទ្ធថែមទៀតដើម្បីបុព្វហេតុប្រជាពលរដ្ឋជារួមក៏ដូចជាការអនុវត្តយុទ្ធសាស្ត្រចតុកោណរបស់រាជរដ្ឋាភិបាល។
