Other News
លែងកូនត្រី១ម៉ឺនក្បាល និងមេត្រីពូជនៅស្រះវត្តគុស
ចេញផ្សាយ ២២ មករា ២០១៨ 4529
មន្ត្រីកសិកម្មបាននិយាយឲ្យដឹងថា កូនត្រីចំនួន១ម៉ឺនកូន និងមេត្រីពូជចំនួន៤គីឡូក្រាមបានត្រូវ ព្រលែងនៅក្នុងស្រះទឹកវត្តគុស ឃុំញ៉ែងញ៉ង ស្រុកត្រាំកក់។ ដោយឡែកកសិករចំនួន១២គ្រួសារ ក៏បានទទួលកូនត្រីយកទៅចិញ្ចឹមផងដែរ។
មន្ត្រីខាងលើ បានឲ្យដឹងថា ពិធីមានការចូលរួមពីសំណាក់ ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ។ ខណៈនៃការចូលរួមដែលបានប្រព្រឹត្តកាលពីពេលថ្មីៗនេះ ឯកឧត្តមបណ្ឌិត ច័ន្ទ សារុន បានពន្យលកសិករ ពីសារៈសំខាន់នៃធនធានត្រីធម្មជាតិ និងការចិញ្ចឹមត្រីតាមលក្ខណៈគ្រួសារ ជាទ្រង់ទ្រាយធំ។
ឯកឧត្តមបណ្ឌិត ច័ន្ទ សារុន បានពន្យល់ដែរ អំពីមូលហេតុដែលនាំឲ្យមានការព្រលែងកូនត្រីនេះឡើង ក្នុងប្រយោជន៍កសិករ ពិសេសប្រជាជនកម្ពុជាទូទាំងប្រទេសមានស្មារតីថែរក្សា ការពារធនធានត្រីធម្មជាតិ និងអភិរក្សវាជាមួយនឹងពង្រីកវារីវប្បកម្ម ដែលនឹងនាំឲ្យកសិករទទួលបាន ចំណែកថែមទៀត។
ខណៈដែលពេលនេះ កសិករនៅទីនោះកំពុងច្រូតកាត់នោះ ឯកឧត្តមបណ្ឌិត ច័ន្ទ សារុន បានអំពាវនាវឲ្យប្រមូលផលស្រូវ ឲ្យបានទាន់ពេលវេលាប្រុងប្រយ័ត្នទុកដាក់ឲ្យបានល្អ។
កុំប្រញាប់លក់ស្រូវ បើមិនមានការចាំបាច់ទេ។ ក្រោយប្រមូលផលរួច ត្រូវពិចារណាបង្វែផ្ទៃដីនោះ ទៅដាំដំណាំផ្សេងទៀត។ ជាមួយនេះ នៅពេលច្រូតកាត់រួចត្រូវភ្ជួរលុបភ្លាម ដើម្បីបង្កើនគុណភាព ដីថែមទៀត ។
ឯកឧត្តមបណ្ឌិត ច័ន្ទ សារុន ក៏បានលើកឡើងផងដែរ អំពីតួនាទីសំខាន់របស់ស្ត្រីហើយស្ត្រីបាន ចូលរួមច្រើនណាស់ នៅក្នុងវិស័យកសិកម្មដូចនេះ ឯកឧត្តមបណ្ឌិត ច័ន្ទ សារុន បានស្នើឲ្យមន្ត្រី ក្រុមការងាររបស់ ឯកឧត្តមបណ្ឌិត ច័ន្ទ សារុន ក៏ដូចជាមន្ត្រីកសិកម្មស្រុក ខេត្តជួយបណ្តុះបណ្តាល ដល់ស្ត្រីលើវិស័យដាំដុះ ដើម្បីបង្កើនផលិតភាពកសិកម្ម ឆ្លើយតបទៅនឹងគោលនយោបាយកសិកម្មរបស់រាជរដ្ឋាភិបាល៕
