ឯកឧត្តមរដ្ឋមន្ត្រី វេង សាខុន និងលោកជំទាវ អមដំណើរជាមួយដោយ ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ និងសហការី បានអញ្ជើញមកពិនិត្យកសិដ្ឋានចិញ្ចឹមគោយកសាច់

ចេញ​ផ្សាយ​ ៩ មីនា ២០២០ 4756

នៅរសៀលថ្ងៃសៅរ៍ ទី៧ ខែមីនា ឆ្នាំ២០២០នេះ ឯកឧត្តមរដ្ឋមន្ត្រី វេង សាខុន និងលោកជំទាវ អមដំណើរជាមួយដោយ ឯកឧត្តម តាន់ ផាន់ណារ៉ា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ និងសហការី បានអញ្ជើញមកពិនិត្យកសិដ្ឋានចិញ្ចឹមគោយកសាច់របស់លោក ឡេង នីរូ នៅភូមិ ឃុំ ស្រុកកំពង់សៀម។

ក្រោយពីបានពិនិត្យឃើញសកម្មភាពរស់រវើកនៃផលិតកម្មចិញ្ចឹមគោយកសាច់ក្នុងកសិដ្ឋាន រួចមក ឯកឧត្តមរដ្ឋមន្ត្រីបានចូលរួមអបអរសាទរចំពោះភាពជោគជ័យរបស់កសិដ្ឋាន និងវាយតម្លៃខ្ពស់ចំពោះឆន្ទ:ខិតខំប្រឹងប្រែង តស៊ូពុះពារប្រកាន់យកអាជីពកសិកម្ម (ចិញ្ចឹមគោ) ជាមុខរបរស្នូលដើម្បីពង្រឹង និងពង្រីកសេដ្ឋកិច្ចគ្រួសារ រហូតសម្រេចទទួលបានជោគជ័យនៅថ្ងៃនេះ។ គ្រួសារមួយចិញ្ចឹមគោសាច់ ១៦០ក្បាល វាមិនមែនជារឿងងាយស្រួលទេ ដ៏រាបណាគ្មានការអំណត់អត់ធន់ ឧស្សាហ៍ព្យាយាម រួមទាំងមានគោលដៅ និងផែនការច្បាស់លាស់ និងជាពិសេស កិច្ចសហការជាមួយមន្រ្តីជំនាញនោះទេ។ ហេតុផលនេះ ដោយយកកសិដ្ឋាននេះជាអំណះ អំណាង លោករដ្ឋមន្រ្តី បានអំពាវនាវឱ្យកសិករ វិនិយោគិនខ្នាតតូច មធ្យម និងធំ បើចាប់យករបរ កសិកម្មជាដំណាំកសិ-ឧស្សាហកម្ម ឈើហូបផ្លែ បន្លែ សត្វ និងវារីវប្បកម្ម ទោះក្នុងកម្រិតណាក៏ ត្រូវមានគោលដៅច្បាស់លាស់ រៀបចំផែនការផលិតកម្ម ទុនវិនិយោគ និងបច្ចេកទេស ដោយសហការជាមួយមន្រ្តីជំនាញ ទើបយើងអាចឈានទៅសម្រេចបានជោគជ័យ។ ភាពជោគជ័យគឺសំដៅទៅលើនិរន្តរភាពផលិតកម្ម និងកំណើនប្រាក់ចំណូល។ ជាក់ស្តែងកសិដ្ឋាននេះ ចិញ្ចឹមគោសាច់ ជ្រូក ទាប៉េកាំងជាង ១៧ពាន់ក្បាល និងដំណាំស្វាយចន្ទី លើផ្ទៃដីជាង ៧០ហ.ត អាចរក ចំណូលបានជា ១២ម៉ឺនដុល្លារ ក្នុងមួយឆ្នាំ ហើយប្រាកដចំណូលនេះយើងអាចសម្រេចបានចក្ខុ វិស័យនាឆ្នាំ២០៣០ របស់សម្តេចតេជោ ហ៊ុន សែន រួចហើយ។

ឆ្លៀតយកឱកាសនេះ លោករដ្ឋមន្រ្តីបានអំពាវនាវឱ្យអ្នកដែលមានលទ្ធភាពធ្វើការវិនិយោគលើការចិញ្ចឹមសត្វ ដើម្បីបង្កើនបរិមាណផ្គត់ផ្គង់ និងឈានទៅកាត់បន្ថយការនាំចូល បង្កើនប្រាក់ចំណូល កាត់បន្ថយភាពក្រីក្រតាមរយ:បង្កើនផលិតភាពផលិតកម្មកសិកម្មប្រកបដោយចីរភាព និរន្តរភាព បរិយាប័ន និងការប្រែប្រួលអាកាសធាតុ និងជាពិសេសស្របតាមបរិបទនៃស្ថានភាពសេដ្ឋកិច្ចពិភពលោកដែលកំពុងមានវិបត្តិដោយសារជំងឺឆ្លងផ្លូវដង្ហើមធ្ងន់ធ្ងរ។ អគ្គនាយកដ្ឋាន និងមន្ទីរកសិកម្ម រុក្ខាប្រមាញ់ និងនេសាទ ត្រូវសហការគ្នាជំរុញការងារបង្កាត់ និងជ្រើសរើសពូជសត្វ ធ្វើយ៉ាងណាប្តូរពូជសត្វដែលខ្សោយខាងផលិតកម្ម រើសយកពូជល្អៗមានផលិតភាពផលិតកម្មខ្ពស់ ជាពិសេសពូជគោ។