លោក ទី ចាន់ណា ប្រធាននាយកដ្ឋានបុគ្គលិក និងអភិវឌ្ឍន៍ធនធានមនុស្សនៃក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារចុះជួបសំណេះសំណាលជាមួយកសិករផលិតស្រូវប្រាំង នៅខេត្តបន្ទាយមានជ័យ

ចេញ​ផ្សាយ​ ២ កុម្ភៈ ២០២៥ 3746

នៅថ្ងៃទី៣១ ខែមករា ឆ្នាំ២០២៥ លោក ទី ចាន់ណា ប្រធាននាយកដ្ឋានបុគ្គលិក​ និងអភិវឌ្ឍន៍ធនធានមនុស្ស​ និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំបន្ទាយនាង បានដឹកនាំក្រុមការងារចុះជួបសំណេះសំណាលជាមួយប្រជាកសិករផលិតស្រូវប្រាំង នៅឃុំបន្ទាយនាង ស្រុកមង្គលបូរី ខេត្តបន្ទាយមានជ័យ។ ក្នុងដំណេីរបេសកកម្មនេះ​ មានការចូលរួមពីក្រុមការងារថ្នាក់ជាតិ សមាជិកក្រុមប្រឹក្សាឃុំបន្ទាយនាង និងប្រជាកសិករប្រមាណជិត​ ១០០នាក់។

ពាក់ព័ន្ធនឹងបញ្ហាតម្លៃស្រូវប្រភេទអូអឹម​៥៤៥១​ លោកប្រធាននាយកដ្ឋាន បានជម្រាបជូនប្រជាកសិករទាំងអស់អំពីកត្តាដែលនាំឱ្យមានការធ្លាក់ថ្លៃនោះ បណ្តាលមកពីការបេីកនាំចេញអង្កររបស់ប្រទេសឥណ្ឌាឡើងវិញ​ បន្ទាប់ពីផ្អាកនាំចេញអង្ករទៅលើទីផ្សារអន្តរជាតិអស់រយៈពេល ២ ឆ្នាំមកហើយ ដែលធ្វើឱ្យមានការធ្លាក់ចុះតម្លៃអង្ករពីបណ្តាប្រទេសផលិតស្រូវអង្ករមានដូចជាកម្ពុជា និងវៀតណាម ជាដើម។

ទន្ទឹមនឹងនេះ លោកប្រធាននាយកដ្ឋាន​ បានបញ្ជាក់បន្ថែមថា​ ស្រូវប្រភេទនេះជាពូជស្រូវរបស់ប្រទេសវៀតណាម ដែលធ្វើឱ្យរោងម៉ាស៊ីនកិនស្រូវក្នុងស្រុកពិបាកក្នុងការទិញស្រូវប្រភេទនេះពីប្រជាកសិករ ដើម្បីកិននាំចេញទៅបាន។ ដើម្បីបង្ការបញ្ហានេះនៅឆ្នាំបន្តទៀត លោកប្រធាននាយកដ្ឋាន បានលើកទឹកចិត្តប្រជាកសិករឱ្យងាកមកដាំពូជស្រូវរបស់កម្ពុជាវិញដូចជា ប្រភេទស្រូវផ្ការំដួល សែនក្រអូប០១ ចំបុីស៧០​ ជាដើម ដែលមានតម្លៃទីផ្សារខ្ពស់ មានគុណភាពល្អ និងជំរុញឱ្យមានការចងក្រងជាសហគមន៍កសិកម្មទំនើបដែលមានការគាំទ្រពីរាជរដ្ឋាភិបាល​ និងក្រសួងកសិកម្ម រុក្ខាប្រមាញ់ និងនេសាទ ដែលជួយផ្តល់ការបណ្តុះបណ្តាលបច្ចេកទេស មានទីផ្សារពិតប្រាកដ​ ការគ្រប់គ្រងច្បាស់លាស់ ទទួលបានកម្ចីទុនសម្រាប់ការរៀបចំដំណើរការសហគមន៍កសិកម្មទំនើបនេះផងដែរ។

ជាកិច្ចបន្ទាប់ លោកប្រធាននាយកដ្ឋាន​ បានបន្តដឹកនាំក្រុមការងារចុះជួបជាមួយក្រុមកសិករផលិតបន្លែ នៅភូមិគោកក្តួច ដែលមានសមាជិកចំនួន ២២នាក់ ដែលកំពុងដាំដុះដំណាំ ៤ប្រភេទរួមមាន ម្ទេស ត្រប់ ត្រឡាច និងល្ពៅ។ លោកប្រធាននាយកដ្ឋាន បានលើកទឹកចិត្តឱ្យក្រុមកសិករផលិតបន្លែខិតខំដាំដុះបន្ថែមឱ្យបានល្អ ដើម្បីផ្តត់ផ្គង់ទីផ្សារបន្លែសម្រាប់ឃុំបន្ទាយនាងក្នុងពេលបច្ចុប្បន្ន និងបន្តពង្រីកសមាជិកក្រុមផលិតបន្លែឱ្យបានច្រើន ដេីម្បីអាចផលិតបន្លែប្រភេទផ្សេងៗទៀតឱ្យបានច្រើនមុខ ក្នុងគោលដៅពង្រីកទីផ្សារទៅតំបន់ផ្សេង ព្រមទាំងមានសមត្ថភាពក្នុងការរៀបចំចងក្រងជាសហគមន៍កសិកម្មទំនើបនាពេលអនាគត។

ស្របនឹងលទ្ធផលវិជ្ជមាននេះ ក្រុមកសិករផលិតបន្លែនៅភូមិគោកក្តួច ត្រូវធ្វើការឱ្យបានជិតស្និទ្ធជាមួយមន្ត្រីកសិកម្មឃុំបន្ទាយនាង មន្ទីរកសិកម្ម រុក្ខាប្រមាញ់ និងនេសាទខេត្តបន្ទាយមានជ័យ និងដៃគូរពាក់ព័ន្ធក្នុងការស្នើសុំផ្តល់បច្ចេកទេស និងដោះស្រាយនូវបញ្ហាប្រឈមបានទាន់ពេលវេលា​ និងមានប្រសិទ្ធភាពខ្ពស់។

សូមជម្រាបជូនថា គោលបំណងនៃការជួបសំណេះសំណាលនេះគឺដេីម្បីផ្សព្វផ្សាយអំពីអត្ថប្រយោជន៍នៃការបង្កើតសហគមន៍កសិកម្មទំនើប​ ការជម្រាបជូនអំពីស្ថានភាពថ្លៃស្រូវ ជាពិសេសពាក់ព័ន្ធនឹងទីផ្សារ​ និងតម្លៃស្រូវប្រភេទអូអឹម​៥៤៥១​ និងចុះជួបសំណេះសំណាលជាមួយក្រុមកសិករផលិតបន្លែ​ នៅភូមិគោកក្តួច៕