ឯកឧត្តម សៀក ឡេង នាយកគម្រោង CFAVC អមដំណើរថ្នាក់ដឹកនាំក្រសួងសេដ្ឋកិច្ច ចុះបង្ហាញវឌ្ឍនភាពឡជីវឧស្ម័ន និងកសិដ្ឋានវារីវប្បកម្មនៅខេត្តតាកែវ

ចេញ​ផ្សាយ​ ២២ ឧសភា ២០២៦ 788

ឯកឧត្តម សៀក ឡេង អនុរដ្ឋលេខាធិការ និងជានាយកគម្រោងខ្សែច្រវាក់ផលិតកម្មដោយភាតរៈបរិស្ថាន (CFAVC) នៅថ្ងៃទី២២ ខែឧសភា ឆ្នាំ២០២៦ នេះ បានអញ្ជើញអមដំណើរ ឯកឧត្តម ប៉ែន ធីរុង្គ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ ក្នុងដំណើរចុះពិនិត្យដោយផ្ទាល់នូវសមិទ្ធផលរូបវន្ត និងវឌ្ឍនភាពការងារសំខាន់ៗរបស់គម្រោង ក្នុងភូមិសាស្ត្រខេត្តតាកែវ។
នៅក្នុងបេសកកម្មការងារនេះ ឯកឧត្តម សៀក ឡេង រួមជាមួយ ឯកឧត្តម ឈួន សំរិទ្ធិ អនុរដ្ឋលេខាធិការក្រសួងសេដ្ឋកិច្ច, លោក ណុប សុភឿន ប្រធានគ្រប់គ្រងគម្រោង CASDP, លោក យន់ ដារិទ្ធ ប្រធាននាយកដ្ឋានវារីវប្បកម្ម និងក្រុមការងារបច្ចេកទេស បានអញ្ជើញទៅកាន់សហគមន៍កសិកម្មឧត្តមសូរិយា ស្ថិតក្នុងភូមិតាសូ ឃុំឧត្តមសូរិយា ស្រុកត្រាំកក់។ នៅទីនោះ ឯកឧត្តមនាយកគម្រោង បានដឹកនាំពិនិត្យមើលការដំណើរការឡជីវឧស្ម័ន រោងជីកំប៉ុស្តិ៍ និងខ្សែច្រវាក់ផលិតកម្មជីសរីរាង្គ ដែលកែច្នៃចេញពីកាកសំណល់ឡជីវឧស្ម័ន ដែលជាផ្នែកមួយនៃយុទ្ធសាស្ត្រកសិកម្មបៃតង និងភាតរៈបរិស្ថាន។
បន្ទាប់មក ឯកឧត្តមអនុរដ្ឋលេខាធិការ និងក្រុមការងារ បានបន្តដំណើរទៅពិនិត្យកសិដ្ឋានចិញ្ចឹមបង្កងខ្នាតតូចរបស់កសិករនៅឃុំអូរសារាយ ស្រុកត្រាំកក់ ដើម្បីវាយតម្លៃលើការអភិវឌ្ឍវារីវប្បកម្មគ្រួសារ ក្នុងការបង្កើនប្រាក់ចំណូល និងធានាសន្តិសុខស្បៀងនៅក្នុងមូលដ្ឋាន៕