ឯកឧត្តមរដ្ឋលេខាធិការ ឃុន សាវឿន អញ្ជើញដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំការតាំងពិព័រណ៌វារីវប្បកម្មកម្ពុជាលើកទី១

ចេញ​ផ្សាយ​ ២៦ កញ្ញា ២០២៤ 2256

នៅថ្ងៃទី២៥ ខែកញ្ញា ឆ្នាំ២០២៤ ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំពិនិត្យវឌ្ឍនភាពការងារត្រៀមរៀបចំការតាំងពិព័រណ៌វារីប្បកម្មកម្ពុជាលើកទី១។ កិច្ចប្រជុំនេះ រៀបចំធ្វើនៅសាលប្រជុំរដ្ឋបាលជលផល ដោយមានការចូលរួមពីលោកជំទាវ ងិន សូនាថ អនុរដ្ឋលេខាធិការ លោកប្រធាននាយកដ្ឋានអភិវឌ្ឍន៍វារីវប្បកម្មនៃរដ្ឋបាលជលផល លោកប្រធានសមាគមវារីវប្បករនៅកម្ពុជា លោក លោកស្រីតំណាងអង្គការដៃគូនានា។

កិច្ចប្រជុំនេះធ្វើឡើងក្នុងគោលបំណងពិនិត្យវឌ្ឍនភាពការងារ និងពិភាក្សាអំពីដំណើរការក្នុងការរៀបចំកម្មវិធីតាំងពិព័រណ៍វារីវប្បកម្មកម្ពុជា លើកទី១ ដែលគ្រោងនឹងប្រព្រឹត្តទៅនាខែវិច្ឆិកា ឆ្នាំ២០២៤ ខាងមុខនេះ។

កម្មវិធីតាំងពិព័រណ៍នេះ  នឹងផ្សារភ្ជាប់ទំនាក់ទំនងរវាងអ្នកផ្គត់ផ្គង់ធាតុចូលវារីវប្បកម្ម វារីវប្បករ អ្នកផលិតពូជ សហគ្រាសកែច្នៃ និងអ្នកប្រើប្រាស់ ព្រមទាំងបង្កើនការយល់ដឹងដល់សាធារណជន  អំពីគុណភាពផលវារីវប្បកម្មរបស់កម្ពុជា តាមរយៈការតាំងបង្ហាញផល ផលិតផលវារីវប្បកម្មស្រស់ និងកែច្នៃធាតុចូលវារីវប្បកម្ម ការប្រកួតចម្អិនម្ហូប និងការចែករំលែកព័ត៌មានអំពីវិធីសាស្រ្តផលិត ជាពិសេសលើកស្ទួយផលិតកម្មក្នុងការធ្វើវារីវប្បកម្ម ឬចិញ្ចឹមនៅកម្ពុជា ព្រមទាំងជំរុញទីផ្សារក្នុងស្រុក និងនាំចេញទៅក្រៅប្រទេស៕