ព័ត៌មានផ្សេងៗទៀត
ឯកឧត្ដមរដ្ឋលេខាធិការ ប្រាក់ ដាវីដ អញ្ជើញចូលរួមកិច្ចប្រជុំ ឧត្តមមន្ត្រីកសិកម្មនិងព្រៃឈើអាស៊ាន និងជប៉ុនលើកទី២ (2nd SOM- AJMAF Meeting)
ចេញផ្សាយ ៨ សីហា ២០២៤ 2513
នៅថ្ងៃទី០៦ ខែសីហា ឆ្នាំ២០២៤ បន្ទាប់ពីកិច្ចប្រជុំពិសេសលើកទី៤៥ របស់ឧត្តមមន្ត្រីកសិកម្មនិងព្រៃឈើអាស៊ាន (SSOM-45th AMAF) ឯកឧត្ដម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាឧត្តមមន្ត្រីកសិកម្ម និងព្រៃឈើអាស៊ាន បានដឹកនាំប្រតិភូនៃក្រសួងកសិកម្ម រុក្ខាប្រមាញ់ និងនេសាទ ចូលរួមកិច្ចប្រជុំឧត្តមមន្ត្រីកសិកម្មនិងព្រៃឈើអាស៊ាន និងជប៉ុនលើកទី២ (2nd SOM- AJMAF Meeting) ដែលបានប្រព្រឹត្តនៅវេលាម៉ោង ៦ ដល់៧ និង៣០នាទីយប់ នៅទីក្រុង Johor Bahru ប្រទេសម៉ាឡេស៊ី។
កិច្ចប្រជុំធ្វើឡើងក្នុងគោលបំណងដើម្បីពិនិត្យ និងពិភាក្សាលើវឌ្ឍនភាព នៃកិច្ចសហប្រតិបត្តិការរវាងប្រទេសជាសមាជិកអាស៊ាន និងជប៉ុនលើការអនុវត្តន៍គម្រោងក្នុងក្របខ័ណ្ឌផែនការមីដូរី (Midori Plan)។
ក្នុងកិច្ចប្រជុំនេះផងដែរ បន្ទាប់ពីភាគីជប៉ុនបានរាយការណ៍ពីវឌ្ឍនភាពនៃការអនុវត្តគម្រោងនានាកន្លងមក ឯកឧត្តម ប្រាក់ ដាវីដ បានថ្លែងអំណរគុណយ៉ាងជ្រាលជ្រៅដល់ភាគីជប៉ុនដែលតែងតែឧបត្ថម្ភគាំទ្រដល់ការអភិវឌ្ឍវិស័យកសិកម្មនៅកម្ពុជា រួមទាំងការបង្កើនសមត្ថភាពក្នុងការប្រយុទ្ធប្រឆាំងនឹងការនេសាទខុសច្បាប់ គ្មានបញ្ញត្តិ គ្មានរបាយការណ៍ (IUU-Fishing) ។
ឯកឧត្តមរដ្ឋលេខាធិការ ក៏បានចូលរួមធ្វើបទអន្តរាគមន៍ និងផ្ដល់ធាតុចូលលើក្របខ័ណ្ឌផែនការមីដូរី ដោយបញ្ជាក់ថា កម្ពុជាស្វាគមន៍នូវគំនិតផ្តួចផ្តើមរបស់មិត្តជប៉ុនក្នុងការអនុវត្តគម្រោង ដោយស្នើឱ្យភាគីជប៉ុនធ្វើការជិតស្និតជាមួយកម្ពុជា ដើម្បីពិភាក្សាលើគម្រោងដែលអាចអនុវត្តបាន និងផ្តល់ផលប្រយោជន៍ដល់ការបង្កើនប្រាក់ចំណូលដល់ប្រជាពលរដ្ឋ ជាពិសេសគម្រោងដែលសមស្របស្ថានភាពរបស់កម្ពុជា និងមានលទ្ធភាពពង្រីកនូវវិសាលភាពនាពេលអនាគត៕
