ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម អញ្ជើញជាអធិបតីក្នុងពិធីការពារសារណាបិទបញ្ចប់ការសិក្សារបស់និស្សិតថ្នាក់បរិញ្ញាបត្រវិទ្យាសាស្រ្តកសិកម្ម នៅខេត្តកំពង់ចាម

ចេញ​ផ្សាយ​ ៨ មិថុនា ២០២៤ 3053

នៅថ្ងៃទី០៧ ខែមិថុនា ឆ្នាំ២០២៤ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តរដ្ឋមន្រ្តី ឌិត ទីណា បានអញ្ជើញជាអធិបតី ក្នុងពិធីការពារសារណា បិទបញ្ចប់ការសិក្សា របស់និស្សិតថ្នាក់បរិញ្ញាបត្រវិទ្យាសាស្រ្តកសិកម្ម ផ្នែកអាហារូបករណ៍ជំនាន់ទី១៨ និងផ្នែកបណ្តុះបណ្តាលបន្ត ជំនាន់ទី២១ ដែលបានប្រារព្វធ្វើឡើងនៅវិទ្យាស្ថានជាតិ កសិកម្មកំពង់ចាម។

ក្នុងឱកាសថ្លែងបើកក្នុងពិធី ឯកឧត្ដម ចាន់ សុវុឌ្ឍ បានលើកឡើងថា វិទ្យាស្ថានជាតិកសិកម្មកំពង់ចាម បានដើរតួនាទីសំខាន់ក្នុងការបណ្តុះបណ្តាលធនធានមនុស្ស ឱ្យក្លាយទៅជាអ្នកឯកទេសវិទ្យាសាស្រ្ត ជំរុញការងារស្រាវជ្រាវ និងនវានុវត្តន៍កសិកម្ម សំដៅបង្កើនសមត្ថភាពផលិតកម្មកសិកម្មកម្ពុជា ដើម្បីឆ្លើយតបទៅនឹងតម្រូវការទីផ្សារ ប្រកបដោយភាពប្រកួតប្រជែង ស្របតាមផែនការយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧។

ទន្ទឹមនឹងនេះ វិទ្យាស្ថានជាតិកសិកម្មកំពង់ចាម បានចូលរួមយ៉ាងសកម្ម​ក្នុងការបណ្តុះបណ្តាលនូវបច្ចេកវិទ្យាថ្មីដល់កសិករ មានគំនិតច្នៃប្រឌិត វៃឆ្លាត បត់បែន ទៅតាមតម្រូវការទីផ្សារ លក្ខខណ្ឌធម្មជាតិ និងការប្រែប្រួលអាកាសធាតុ។

ឯកឧត្ដមបានបញ្ជាក់បន្ថែមទៀតថា ពិធីការពារសារណាបិទ បញ្ចប់ការសិក្សានេះគ្រាន់តែជាការបញ្ចប់នូវជំហានដំបូងមួយប៉ុណ្ណោះ ដែលទាមទារឱ្យក្មួយៗ និស្សិតទាំងអស់ ដែលបានខិតខំហាត់ ពត់លត់ដំខ្លួន តស៊ូ អត់ធ្មត់ ស្រាវជ្រាវ ក្នុងអំឡុងពេល៤ឆ្នាំកន្លងមកនេះ ហើយត្រូវបានទទួលឱកាសធ្វើការបញ្ចេញសមត្ថភាព និងចំណេះដឹងរបស់ខ្លួន តាមរយៈកិច្ចការពារសារណាបិទបញ្ចប់នេះ៕