ព័ត៌មានផ្សេងៗទៀត
ឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម អញ្ចើញជាអធិបតីភាពក្នុងកិច្ចប្រជុំ (Wrap-up meeting-CASDP) ជាមួយក្រុមបេសកកម្មគាំទ្រការអនុវត្តគម្រោង CASDP លើកទី៨ របស់ធនាគារពិភពលោក
ចេញផ្សាយ ៤ មិថុនា ២០២៤ 1942
នៅថ្ងៃទី០៤ ខែមិថុនា ឆ្នាំ២០២៤ ឯកឧត្ដម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មាធិការ ដឹកនាំគម្រោងពិពិធកម្មកសិកម្មកម្ពុជា បានធ្វើជាអធិបតីក្នុងកិច្ចប្រជុំ (Wrap-up meeting-CASDP) ជាមួយក្រុមបេសកកម្មគាំទ្រការអនុវត្តគម្រោង CASDP លើកទី៨ (Eighth ISM Mission) របស់ធនាគារពិភពលោក នៅការិយាល័យធនាគារពិភពលោក រាជធានីភ្នំពេញ។
កិច្ចប្រជុំនេះ មានការអញ្ជើញចូលរួមពី ឯកឧត្តម លោកជំទាវ អស់លោក លោកស្រី ជាសមាជិក សមាជិការគណៈកម្មាធិការ លោកនាយក និងលោកប្រធានគម្រោង តំណាងក្រសួងពាក់ព័ន្ធ (MAFF, MRD, MoWRAM, MEF) តំណាងសមាសភាព គាំទ្រគម្រោង និងទីប្រឹក្សាគម្រោងជាដើម។
ឯកឧត្ដម ហ៊ាន វណ្ណហន បានថ្លែងអំណរគុណយ៉ាងជ្រាលជ្រៅដល់ក្រុមការងារបេសកកម្មរបស់ WB ដែលបានបំពេញបេសកកម្មគាំទ្រការអនុវត្តនេះ ដឹកនាំដោយលោកស្រី ចំរើន មុទិតា ប្រធានក្រុមកិច្ចការ, លោក ចាន់ វីរៈ ប្រធានក្រុមកិច្ចការរួម និងសមាជិកក្រុមបេសកកម្មផ្សេងទៀតទាំងអស់ ដែលបានពិភាក្សាលម្អិតជាមួយទីភ្នាក់ងារប្រតិបត្តិគម្រោង (EA) និងទីភ្នាក់ងារអនុវត្ត (IAs) លើវឌ្ឍនភាពនៃការអនុវត្តគម្រោង បញ្ហាប្រឈមនានាដែលបានជួបប្រទះ និងកើតឡើងជាមួយនឹងមធ្យោបាយឆ្ពោះទៅមុខដូចជា ពិនិត្យដំណើរការប្រតិបត្តិការរបស់គម្រោង រួមទាំងការគ្រប់គ្រងហិរញ្ញវត្ថុ និងលទ្ធកម្ម ការអនុលោមតាមតម្រូវការការពារសុវត្ថិភាពសម្រាប់ហេដ្ឋារចនាសម្ព័ន្ធសាធារណៈ (ប្រព័ន្ធធារាសាស្រ្ត និងផ្លូវជនបទ) សកម្មភាពត្រួតពិនិត្យ និងវាយតម្លៃ។
នៅក្នុងអង្គប្រជុំនោះ ក៏បានពិនិត្យឡើងវិញនូវវឌ្ឍនភាពឆ្ពោះទៅរកការសម្រេចបាននូវគោលបំណងអភិវឌ្ឍន៍របស់គម្រោងចាប់តាំងពីការចាប់ផ្តើមគម្រោង ជាពិសេសការពិនិត្យឡើងវិញ និងការធ្វើបច្ចុប្បន្នភាពនៃការត្រួតពិនិត្យក្របខ័ណ្ឌលទ្ធផល (RFM) និងពិនិត្យស្ថានភាពនៃការអនុវត្តសកម្មភាពសំខាន់ៗដែលបានព្រមព្រៀងក្នុងកំឡុង ISM7 ចុងក្រោយក្នុងខែវិច្ឆិកា ឆ្នាំ២០២៣ រួមមានធាតុផ្សំ ទី១. ការធ្វើឱ្យមានពិពិធកម្មកសិកម្ម (ផែនការពិពិធកម្ម/ការរៀបចំផែនការអាជីវកម្ម ការដាក់ស្នើដំណើរការវាយតម្លៃ និងអនុម័ត ការផ្គូផ្គងការផ្តល់ជំនួយ និងការទូទាត់ខ្សែឥណទាន) ទី២. គាំទ្រហេដ្ឋារចនាសម្ព័ន្ធសាធារណៈ (ប្រព័ន្ធធារាសាស្រ្ត និងផ្លូវជនបទ) ទី៣. ការកែលម្អព័ត៌មានកសិកម្ម (ប្រព័ន្ធព័ត៌មានកសិកម្ម (AIS) នឹងគ្របដណ្តប់ប្រព័ន្ធព័ត៌មានទីផ្សារកសិកម្ម (AMIS) និងការគ្រប់គ្រងគុណភាព (លទ្ធកម្មឧបករណ៍មន្ទីរពិសោធន៍សម្រាប់មន្ទីរពិសោធន៍កសិកម្មជាតិ) និងទី៤. លទ្ធកម្ម និងការគ្រប់គ្រងហិរញ្ញវត្ថុ ការផ្សព្វផ្សាយ និងទំនាក់ទំនង និងការអនុលោមតាមការការពារបរិស្ថាន និងសង្គម និងសកម្មភាពយេនឌ័រ។
បន្ថែមពីនោះ ក៏បានពិនិត្យ និងបញ្ចប់សៀវភៅណែនាំប្រតិបត្តិការគម្រោង ដែលបានធ្វើបច្ចុប្បន្នភាព (POM) ដោយផ្អែកលើបទពិសោធន៍ និងមេរៀនដែលបានរៀនពីការអនុវត្តគម្រោង ជាពិសេសដើម្បីសម្រួលដល់ការរៀបចំ DPl/BPl ដំណើរការដាក់ស្នើ ការវាយតម្លៃ និងដំណើរការអនុម័ត និងបានយល់ព្រមលើផែនការសកម្មភាព ដើម្បីពន្លឿនការអនុវត្តគម្រោង ដើម្បីសម្រេចបានលទ្ធផលរំពឹងទុក ការប្រគល់ពីក្រុមគម្រោង MoWRAM មុនទៅឱ្យក្រុមគម្រោង MoWRAM ថ្មី គួរតែត្រូវបានពិភាក្សាយ៉ាងច្បាស់លាស់ និងយល់ព្រមលើផ្លូវឆ្ពោះទៅមុខ។
សូមបញ្ជាក់ផងដែរថា បេសកកម្មរបស់ ISM នេះ បានប្រព្រឹត្ដទៅចាប់ពីថ្ងៃទី២១ ខែឧសភា ដល់ថ្ងៃទី០៤ ខែមិថុនា ឆ្នាំ២០២៤៕
