ព័ត៌មានផ្សេងៗទៀត
ថ្នាក់ដឹកនាំក្រសួងកសិកម្ម អញ្ជើញដឹកនាំកិច្ចប្រជុំវឌ្ឍនភាពការងារកសិកម្ម និងទស្សនកិច្ចសិប្បកម្ម រោងចក្រកែច្នៃ នៅខេត្តប៉ៃលិន
ចេញផ្សាយ ១៣ វិច្ឆិកា ២០២៦ 239
នាថ្ងៃទី១១ ខែវិច្ឆិកា ឆ្នាំ២០២៦ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំវឌ្ឍនភាពការងារកសិកម្ម និងទស្សនកិច្ចសិប្បកម្ម រោងចក្រកែច្នៃ នៅខេត្តប៉ៃលិន។
ក្នុងកិច្ចប្រជុំនេះ ឯកឧត្តម គី ច័ន្ទរំដួល បានគូសបញ្ជាក់ពីការពិនិត្យវឌ្ឍនភាពផលិតកម្មពាក់ព័ន្ធនឹងដំណាំរួមមាន៖ មៀនប៉ៃលិន កៅស៊ូ ត្រសក់ផ្អែម ដំឡូងមី និងបន្លែសុវត្ថិភាព ដែលអាចធានានូវស្ថេរភាពនៃការផ្គត់ផ្គង់ និងលើកទឹកចិត្តឱ្យមានការចងក្រងជា សហគមន៍កសិកម្មទំនើប ដែលជាគោលនយោបាយអាទិភាព ដើម្បីផ្តល់ផលប្រយោជន៍ជាច្រើនដល់ប្រជាកសិករ មានផលិតកម្មកសិកម្មក្នុងទំហំធំ និងមានប្រសិទ្ធភាពសេដ្ឋកិច្ច។
ជាមួយគ្នានេះដែរ ឯកឧត្តមអនុរដ្ឋលេខាធិការ បានចុះពិនិត្យសិប្បកម្មផលិតស្រា SKH Natural Plus ដែលផលិតចេញពីមៀនប៉ៃលិន និងទំពាំងបាយជូរព្រៃខ្មែរ ដើម្បីជំរុញចរាចរណ៍លើទីផ្សារ និងរោងចក្រកែច្នៃមៀន(JIN GUO YUAN ZHONG HUA LONG) ដើម្បីពិនិត្យពីការប្រមូលផល វេចខ្ចប់ និងស្តុកទុក ដើម្បីធានាឱ្យកសិផលមៀនស្រស់នេះ មានខ្សែច្រវាក់ផលិតកម្មល្អ ផ្គត់ផ្គង់បានទាំងក្នុងស្រុក និងនាំចេញទៅកាន់ទីផ្សារអន្តរជាតិ សំដៅពង្រីកឱកាសការងារដល់ប្រជាពលរដ្ឋ ជំរុញការកែច្នៃ និងទទួលបានផលចំណេញទាំងអស់គ្នា៕
