គម្រោង EMPOWER ជំរុញការអនុវត្តសកម្មភាពគាំទ្រជីវភាពកសិករ និងពង្រឹងភាពធន់របស់សហគមន៍នៅស្រុកឯកភ្នំ ខេត្តបាត់ដំបង

ចេញ​ផ្សាយ​ ១២ វិច្ឆិកា ២០២៦ 137

នៅថ្ងៃទី១១ ខែវិច្ឆិកា ឆ្នាំ២០២៦ ឯកឧត្តម ខាត់ សុធី អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្ត​គម្រោងថ្នាក់ស្រុក បានដឹកនាំកិច្ចប្រជុំ និងចុះតាមដានការអនុវត្តសកម្មភាព​គម្រោងនៅឃុំពាមឯក និងឃុំព្រែកនរិន្ទ ដោយមានការចូលរួមពីក្រុមការងារ​គម្រោង អាជ្ញាធរមូលដ្ឋាន និងតំណាងសហគមន៍ ដើម្បីពិនិត្យវឌ្ឍនភាព បញ្ហាប្រឈម និងស្វែងរក​ដំណោះស្រាយ​សម្រាប់ជំរុញការអនុវត្តគម្រោងឱ្យ​កាន់តែមានប្រសិទ្ធភាព។
ក្នុងកិច្ចប្រជុំ ឯកឧត្តម ខាត់ សុធី បានផ្តោតការយកចិត្តទុកដាក់លើគម្រោង​នៃសាងសង់ទ្រុងមាន់ នាពេលខាងមុខជូនកសិករដែលទទួលបានពីគម្រោង  ការធានាការចូលរួមរបស់កសិករ និងការពង្រឹងកិច្ចសហការជាមួយ​អាជ្ញាធរ​មូលដ្ឋាន។ ជាពិសេស បានណែនាំឱ្យ​ក្រុម​ការងារសហការជាមួយមេភូមិ ចុះជួបកសិករដែលខកខានមិនបាន​ចូលរួម​វគ្គបណ្តុះបណ្តាល ដើម្បីធានាថាពួក​គាត់​ទទួលបានព័ត៌មាន និងឱកាសចូលរួម​ក្នុងសកម្មភាពគម្រោង។ ទន្ទឹមនឹងនេះ ក្រុមការងារក៏បានធ្វើការពិនិត្យបឋមលើ​ផល​ប៉ះពាល់បរិស្ថាន និងសង្គម ដោយមិនបានរកឃើញករណីដីជាប់ទំនាស់ក្នុង​ចំណោមកសិករ​ដែលបានពិនិត្យនោះទេ។
ក្រោយកិច្ចប្រជុំ ឯកឧត្តម ខាត់ សុធី និងក្រុមការងារបានចុះពិនិត្យជាក់ស្តែង​ដល់គ្រួសារ​កសិករដែលទទួលការគាំទ្រពីគម្រោង រួមមានការដាំបន្លែក្នុងផ្ទះ​សំណាញ់ ការចិញ្ចឹមមាន់ និងការបណ្តុះផ្សិត។ តាមរយៈសកម្មភាពនេះ គម្រោង EMPOWER បន្តពង្រឹងការសម្របសម្រួល និងការតាមដាននៅ​មូលដ្ឋាន ដើម្បីជួយឱ្យកសិករទទួលបានអត្ថប្រយោជន៍ពីសកម្មភាព​គាំទ្រ​របស់គម្រោង បង្កើនឱកាសបង្កើតប្រាក់ចំណូល កាត់បន្ថយភាពងាយរងគ្រោះ និងពង្រឹងភាព​ធន់នៃជីវភាពគ្រួសារកសិករនៅតំបន់គោលដៅ៕