ឯកឧត្តម តូច ប៊ុនហួរ តំណាងដ៏ខ្ពង់ខ្ពស់របស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំគណ:ប្រតិភូចុះសួរសុខទុក្ខ និងសំណេះសំណាលជាមួយនាយទាហាន នាយទាហានរង និងពលទាហាន នៅកងវរ:សេនាតូចលេខ១ ការពារព្រំដែនគោក តំបន់ប្រតិបត្តិការសឹករងខេត្តតាកែវ

ចេញ​ផ្សាយ​ ៤ មេសា ២០២៣ 3825

តាងនាមឲ្យឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៣ ខែមេសា ឆ្នាំ២០២៣ ឯកឧត្តម តូច ប៊ុនហួរ បានដឹកនាំគណ:ប្រតិភូចុះសួរសុខទុក្ខ និងសំណេះសំណាលជាមួយនាយទាហាន នាយទាហានរង និងពលទាហាន នៅកងវរ:សេនាតូចលេខ១ ការពារព្រំដែនគោក តំបន់ប្រតិបត្តិការសឹករងតាកែវ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ នាពេលខាងមុខនេះ។ ឯកឧត្តមរដ្ឋលេខាធិការបានពាំនាំពីការផ្តាំផ្ញើសួរសុខទុក្ខពីសំណាក់ឯកឧត្តមរដ្ឋមន្ត្រី ព្រមទាំងពីថ្នាក់ដឹកនាំរបស់ក្រសួង ដែលជានិច្ចកាលបានគិតគូចំពោះសុខទុក្ខ និងការរស់នៅរបស់នាយទាហាន នាយទាហានរង និងពលទាហានទាំងអស់ និងបានកោតសរសើរចំពោះស្មារតីតស៊ូអង់អាចអាចក្លាហានប្រកបដោយវីរភាពខ្ពស់ ដែលបានយកអស់ពីកម្លាំងកាយចិត្តក្នុងបុព្វហេតុការពារជាតិមាតុភូមិ ការពារបូរណភាពទឹកដីនៃព្រះរាជាណាចក្រកម្ពុជា និងបានចូលរួមអភិវឌ្ឍប្រទេសជាតិឲ្យមានការរីកចម្រើនលើគ្រប់វិស័យ។

ឯកឧត្តមបានបញ្ជាក់ថា ពិធីសំណេះសំណាលរបស់យើងនាពេលនេះ គឺស្ថិតក្នុងស្ថានភាពនៃសភាពការរបស់ប្រទេសជាតិ ដែលកំពុងមានការរីកចម្រើនប្រកបដោយសន្តិភាព ស្ថេរភាព ការអភិវឌ្ឍ និងកិច្ចសហប្រតិបត្តិការ ក្រោមការដឹកនាំប្រកបដោយគតិបណ្ឌិតនិង​ឈ្លៀសវៃបំផុត របស់សម្តេចអគ្គមហាសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ឯកឧត្តមបានជម្រាបជូនអំពីវឌ្ឍនភាពដែលរាជរដ្ឋាភិបាលខិតខំសម្រេចបាននូវសមិទ្ធផលជាច្រើន ដូចយើងទាំងអស់គ្នាបានឃើញ និងទទួលបានផលពីសមិទ្ធផលនោះ ដែលកើតចេញការចូលរួមពីថ្នាក់ដឹកនាំមន្ត្រីរាជការគ្រប់លំដាប់ថ្នាក់ កងយោធពលខេមរភូមិន្ទ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋ ស្របតាមកម្មវិធីនយោបាយរបស់រាជរដ្ឋាភិបាល។ តាងនាមឲ្យក្រសួងកសិកម្ម រុក្ខាប្រមាញ់ និងនេសាទ សូមគោរពជូនពរនាយទាហាន នាយទាហានរង និងពលទាហានទាំងអស់ ក្នុងឱកាសបុណ្យចូលឆ្នាំប្រពៃណីជាតិនាពេលខាងមុខនេះ និងបានប្រគល់ជូនថវិកា គ្រឿងឧបភោគបរិភោគ ព្រមទាំងផ្តល់ជូនកូនមាន់ កូនដូង និងកូនឈើបេង ម្តេញ និងសណ្តាន់ សម្រាប់ចិញ្ចឹម និងដាំដុះក្នុងបន្ទាយផងដែ។