ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីក្នុងសិក្ខាសាលាផ្សព្វផ្សាយស្តីពីតួនាទី និងភារកិច្ចនាយកដ្ឋានសវនកម្មផ្ទៃក្នុង និងនិតិវិធីអនុវត្តថវិកាកម្មវិធី

ចេញ​ផ្សាយ​ ១៣ កុម្ភៈ ២០១៨ 3355

នៅព្រឹកថ្ងៃទី១២ ខែកក្កដា ឆ្នាំ២០១៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ មានរៀបចំសិក្ខាសាលាផ្សព្វផ្សាយស្តីពី តួនាទី និងភារកិច្ចនាយកដ្ឋានសវនកម្មផ្ទៃក្នុងនិងនិតិវិធីអនុវត្តថវិកាកម្មវិធី ក្រោមអធិបតីភាព ​ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំក្រសួង ​ឯកឧត្តម អស់លោក លោកស្រី ជាថ្នាក់ដឹកនាំអង្គភាពជំនាញថ្នាក់កណ្តាល និងមន្ទីរកសិកម្មរាជធានី-ខេត្ត ព្រមទាំងមន្ត្រីជំនាញនៃក្រសួងប្រមាណជាង ១៨០នាក់។

            បន្ទាប់ពីមតិសា្វគមន៍របស់ប្រធាននាយកដ្ឋានសវនកម្មផ្ទៃក្នុងរួចមក ​ឯកឧត្តមរដ្ឋមន្ត្រីបានមានប្រសាសន៍ទៅកាន់អង្គពិធីដែលមានខ្លឹមសារផ្តោតលើតម្រូវការនៃការផ្សារភ្ជាប់ថវិកាទៅនឹងគោលនយោបាយ ការអនុវត្តយុទ្ធសាស្រ្តថវិកា ២០១៦-២០១៨ ឱ្យមានលក្ខណៈរឹងមាំស្របតាមប្រព័ន្ធគ្រប់គ្រងហិរញ្ញវត្ថុអន្តរជាតិ ដែលចាំបាច់ត្រូវពង្រឹងតួនាទី និងភារកិច្ចនៃ​សវនកម្មផ្ទៃក្នុង ដើម្បីលើកស្ទួយសនិទានកម្មក្នុងការអនុវត្តផែនការយុទ្ធសាស្ត្រ គោលនយោបាយសម្រាប់បណ្តាអង្គភាពអ្នកអនុវត្តផ្ទាល់ ទន្ទឹមនឹងការបន្តបង្កើតសមត្ថភាព និងភាពជាម្ចាស់ ជាមួយនឹងបុរេសកម្មរបស់ក្រសួងក្នុងការធ្វើកំណែទម្រង់ ការគ្រប់គ្រង និងការប្រើប្រាស់ថវិកា។ ក្នុងន័យនេះ និងស្របតាមកំណែទម្រង់របស់រាជរដ្ឋាភិបាល ទើបមានការបង្កើតឡើងនូវនាយកដ្ឋាន សវនកម្មផ្ទៃក្នុងនៃក្រសួង កសិកម្ម រុក្ខាប្រមាញ់ និងនេសាទ នៅឆ្នាំ ២០០៥ ដែលបាននិងកំពុងបំពេញភារកិច្ចសវនកម្ម ជាមួយនឹងការពង្រឹងសមត្ថភាពចាំបាច់ជាបន្តបន្ទាប់។ ដូច្នេះ នាយកដ្ឋានសវនកម្ម ក្នុងនាមជាសវនករត្រូវស្មោះត្រង់ មិនលម្អៀង ប្រុងប្រយ័ត្ន និងទទួលខុសត្រូវខ្ពស់ក្នុងភារកិច្ច ចំពោះមុខថ្នាក់ដឹកនាំក្រសួង ប្រតិបត្តិការស្របតាមច្បាប់ និងផ្សព្វផ្សាយព័ត៌មានស្របតាមច្បាប់ ដោយគោរពតម្លៃនៃកម្មសិទ្ធព័ត៌មាន ទទួលបានដោយមិនត្រូវយកព័ត៌មានទៅទាញយកប្រយោជន៍ផ្ទាល់ខ្លួន។

ជាមួយគ្នានេះដែរ ឯកឧត្តមរដ្ឋមន្ត្រីបានណែនាំទៅកាន់អង្គពិធីនូវការងារមួយចំនួនមានខ្លឹមសារជាអាទិ៍៖

• ថ្នាក់ដឹកនាំអង្គភាពជំនាញចាំបាច់ត្រូវពង្រឹងគោលនយោបាយគ្រប់គ្រងផ្ទៃក្នុង និងផ្តល់ការគាំទ្រដល់នាយកដ្ឋានសវនកម្មផ្ទៃក្នុង ហើយនិងប្រើប្រាស់លទ្ធផលអង្កេតឃើញរបស់សវនករ ដើម្បីមានវិធានការកែលម្អ បង្កើនប្រសិទ្ធភាពការងាររបស់អង្គភាព។ ចូលរួមបង្កើតផែនការ និងកិច្ចប្រតិបត្តិការក្នុងប្រព័ន្ធកុំព្យូទ័រ ជាមួយនឹងការកត់ត្រាត្រឹមត្រូវ និងពេញលេញនូវប្រតិបត្តិការក្នុងកុំព្យូទ័រ។
• នាយកដ្ឋានសវនកម្មផ្ទៃក្នុង ត្រូវធ្វើរបាយការណ៍សវនកម្មផ្ទៃក្នុងជូនរដ្ឋមន្ត្រី្ដដោយសង្កត់ធ្ងន់លើហានិភ័យ ប្រតិបត្តិការសន្សំសំចៃ និងមានភារកិច្ចសម្របសម្រួលជាមួយអាជ្ញាធរសវនកម្មជាតិ។
• ពិនិត្យឡើងវិញនូវមុខងារភារកិច្ចក្នុងប្រតិបត្តិការរបស់គ្រប់អង្គភាពក្នុងការិយបរិច្ឆេទសមស្របដោយពិនិត្យឡើងវិញនីតិវិធី និងការអនុវត្តជៀសវាងបាននូវការកេងបន្លំ ក៏ដូចជាវិធានការចំពោះការកេងបន្លំ ទាន់ពេលវេលា។
• នាយកដ្ឋានសវនកម្មផ្ទៃក្នុងត្រូវអនុវត្តភារកិច្ចស្របតាមជំនាញ និងក្រមសីលធម៌ក្នុងការបំពេញភារកិច្ច។