ឯកឧត្តមរដ្ឋលេខាធិការ ឃុន សាវឿន នាំយកស្បៀងអាហារ និងសម្ភារ ប្រើប្រាស់ចែកជូនប្រជាពលរដ្ឋភៀសសឹកចំនួន ៥០០ គ្រួសារ ដែល ជម្លៀសមកទីតាំងសុវត្ថិភាព នៅខេត្តព្រះវិហារ

ចេញ​ផ្សាយ​ ១៩ សីហា ២០២៥ 500

នាថ្ងៃទី១៨ ខែសីហា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ និងជាតំណាងឯកឧត្តមរដ្ឋមន្ត្រី ឌិត ទីណា បានអញ្ជើញនាំយកស្បៀងអាហារ និងសម្ភារប្រើប្រាស់​ដែលជា​អំណោយ​របស់ក្រុមហ៊ុន LUCKYMALL ចែកជូនប្រជាពលរដ្ឋ​ភៀសសឹក​ចំនួន ៥០០ គ្រួសារ ដែលជម្លៀសមកទីតាំងសុវត្ថិភាព នៅបរិវេណវត្ត​ទួលអណ្តែត ឃុំថ្មី ស្រុកគូលែន ខេត្តព្រះវិហារ ដោយមានការចូលរួមពីលោក មិន សុីថា អភិបាលរង នៃគណៈអភិបាលខេត្តព្រះវិហារ លោកប្រធាន​មន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ និងអាជ្ញាធរ​មូលដ្ឋាន​ពាក់ព័ន្ធ។

ឯកឧត្តមរដ្ឋលេខាធិការ បានពាំនាំនូវការផ្តាំសួរសុខទុក្ខពីសំណាក់ឯកឧត្តម​រដ្ឋមន្ត្រី ឌិត ទីណា ជូនដល់ប្រជាពលរដ្ឋ។ ឯកឧត្តមរដ្ឋមន្ត្រីតែងតែផ្ដល់​អនុសាសន៍ណែនាំឱ្យថ្នាក់ដឹកនាំជួយគិតគូរអំពីសុខទុក្ខរបស់បងប្អូនក្នុងគ្រាលំបាកពេលភៀសសឹកគិតពីសង្គ្រាមឈ្លានពាន។ ឯកឧត្តមក៏បានអំពាវនាវ​ឱ្យបងប្អូនប្រជាពលរដ្ឋ សូមជឿជាក់លើរាជរដ្ឋាភិបាល និងកងទ័ពកម្ពុជា ក្នុងការពារបូរណ​ភាពទឹកដី អធិបតេយ្យជាតិ មិនឱ្យបរទេសណា​ឈ្លានពាន​ទឹកដីកម្ពុជាឡើយ។

ក្នុងនាមតំណាងឱ្យរដ្ឋបាលខេត្តព្រះវិហារ លោក មិន ស៊ីថា អភិបាលរងខេត្ត សូមថ្លែងអំណរគុណជ្រាលជ្រាលជ្រៅចំពោះគណៈប្រតិភូ និងក្រុមហ៊ុន LUCKYMALL បង្ហាញពីស្មារតីខ្មែរតែមួយ តាមរយៈផ្តល់ជាស្បៀងអាហារ និងសម្ភារមួយចំនួនចែកជូនដល់ប្រជាពលរដ្ឋភៀសសឹក ខណៈពេលដែល​កំពុងជួបការលំបាកនេះ៕