ឯកឧត្តមរដ្ឋលេខាធិការ មាស ពិសិដ្ឋ អញ្ជើញចូលរួមសហការដឹកនាំកិច្ចប្រជុំលើកទី១ របស់គណៈកម្មាធិការតម្រង់ទិស នៃគម្រោងកែលម្អសន្តិសុខទឹកកម្ពុជា

ចេញ​ផ្សាយ​ ១៥ កក្កដា ២០២៥ 1013

នៅថ្ងៃទី១៥ ខែកក្កដា ឆ្នាំ ២០២៥ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសហប្រធាននៃគណៈកម្មាធិការតម្រង់ទិសគម្រោងកែលម្អសន្តិសុខទឹកកម្ពុជា បានសហការជាមួយ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការនៃក្រសួងធនធានទឹក និងឧតុនិយម អញ្ជើញចូលរួមដឹកនាំកិច្ចប្រជុំលើកទី១ របស់គណៈកម្មាធិការនេះ នៅទីស្តីការក្រសួងធនធានទឹក និងឧតុនិយម។

កិច្ចប្រជុំនេះមានការចូលរួមពីសំណាក់ សមាជិកគណៈកម្មាធិការតម្រង់ទិស ដែលជាមន្ត្រីជាន់ខ្ពស់នៃក្រសួង និងស្ថាប័នពាក់ព័ន្ធ ព្រមទាំងក្រុមការងារគ្រប់គ្រង និងអនុវត្តគម្រោង សរុបប្រមាណ៧៥នាក់នេះ ហើយកិច្ចប្រជុំនេះ រៀបចំឡើងក្នុងគោលបំណងជាសំខាន់ដើម្បីស្តាប់របាយការណ៍ស្តីពីវឌ្ឍនភាពរបស់គម្រោង និងកំណត់ទិសដៅដើម្បីអនុវត្តសកម្មភាពជាបន្ត។

នៅក្នុងពិធីបើក ឯកឧត្តមរដ្ឋលេខាធិការបានអបអរសាទរចំពោះការគ្រប់គ្រង និងអនុវត្តគម្រោង ដែលជាការអនុវត្តជាក់ស្តែងនូវគោលគំនិតនៃក្រសួងទាំង ២ គឺក្រសួងកសិកម្ម រុក្ខាប្រមាញ់ និងនេសាទ និងក្រសួងធនធានទឹក និងឧតុនិយម ព្រមទាំងក្រសួង និងស្ថាប័នផ្សេងទៀត ដែលពាក់ព័ន្ធនឹងការអភិវឌ្ឍវិស័យកសិកម្មជាតិ។

ទន្ទឹមនឹងនេះ ឯកឧត្តមរដ្ឋលេខាធិការ បានសម្តែងនូវក្តីរីករាយក្នុងការគាំទ្រការធ្វើឱ្យសម្រេចនូវគោលដៅ និងគោលបំណងរបស់គម្រោង តាមរយៈការធ្វើឱ្យប្រសើរនូវសន្តិសុខទឹក  ធ្វើឱ្យទឹកស្អាត ពោល មិនបង្កផលប៉ះពាល់ដល់មនុស្ស សត្វ និងដំណាំ ដោយត្រូវគ្រប់គ្រងផ្ទៃរងទឹកភ្លៀង ទីជម្រាល ឬអាងស្ទឹងឱ្យបានល្អ គឺមិនធ្វើសកម្មភាពផ្សេងៗដែលបំពុលទឹក ដូចជាការប្រើប្រាស់ជី និងថ្នាំកសិកម្មមិនត្រឹមត្រូវ និងការបញ្ចេញកាកសំណល់មិនល្អផ្សេងៗ ដោយមិនបានធ្វើប្រព្រឹត្តកម្ម ធ្វើឱ្យផ្ទៃរងទឹកភ្លៀងត្រង់ ច្រោះទឹកបានល្អ សម្បូណ៌ទឹក បង្កើនសមត្ថភាពរបស់អាងស្តុកទឹក និងផ្ទៃរងទឹកភ្លៀង ហើយធ្វើឱ្យមិនខ្វះទឹក ឬប្រើទឹកបានយូរ ទោះបីមានបញ្ហាអាកាសធាតុ ដោយបញ្ចូលប្រើប្រាស់បច្ចេកវិទ្យាសន្សំសំចៃទឹក ដូចជាការស្រោចស្រពជាដំណក់ ការដាំដុះនៅក្នុងផ្ទះសំណាញ់ និងការប្រើប្រាស់ប្រភេទ  និងពូជដំណាំដែលមិនសូវត្រូវការទឹក។

ជាមួយគ្នានេះ ធ្វើឱ្យកសិករបង្កើនបានប្រាក់ចំណូល ឬប្រាក់ចំណេញ ដោយសារការយកចិត្តទុកដាក់ដ៏ខ្លាំងរបស់រាជរដ្ឋាភិបាល ក្រសួងកសិកម្ម រុក្ខាប្រមាញ់ និងនេសាទ ព្រមទាំងក្រសួង និងស្ថាប៍នពាក់ព័ន្ធ  តាមរយៈការសហការជិតស្និទ្ធជាមួយក្រសួង និងស្ថាប័នពាក់ព័ន្ធ ព្រមទាំងដៃគូអភិវឌ្ឍន៍នានា ក្រសួងកសិកម្ម រុក្ខាប្រមាញ់ និងនេសាទបាន និងកំពុងតម្រង់ទិស រួមទាំងសហការជាមួយគ្រប់តួអង្គនៃខ្សែច្រវាក់តម្លៃកសិផល សំដៅធ្វើឱ្យខ្សែច្រវាក់តម្លៃមាននិរន្តរភាព ដើម្បីឱ្យគ្រប់តួអង្គបានទទួលផលដោយសមធម៌។

ឯកឧត្តមរដ្ឋលេខាធិការគូសបញ្ជាក់ថា ការបង្កើន ឬកែលម្អប្រព័ន្ធធារាសាស្ត្រ និងផ្លូវភ្ជាប់កសិដ្ឋាន ព្រមទាំងការបញ្ចូលប្រើប្រាស់បច្ចេកវិទ្យាសមស្រប ដូចជាការប្រើប្រាស់ជី និងថ្នាំឱ្យកាន់តែមានប្រសិទ្ធភាព រួមទាំងការបញ្ចូលប្រើប្រាស់គ្រឿងយន្ត ដើម្បីបង្កើនផលិតភាពការងារ និងគុណភាពកសិផលជាដើម ពិតជាមានសារៈសំខាន់ក្នុងការរួមចំណែកកាត់បន្ថយថ្លៃដើមផលិតកម្ម។

ជារួម កិច្ចប្រជុំបានសម្រេចលទ្ធផលដែលបានគ្រោង ពោលគឺអ្នកចូលរួមទាំងអស់បានដឹងកាន់តែច្បាស់អំពីគោលនយោបាយជាតិដែលពាក់ព័ន្ធ ព្រមទាំងព័ត៌មាន វឌ្ឍនភាព និងបញ្ហាប្រឈមរបស់គម្រោង ហើយបានកំណត់ដំណោះស្រាយសមស្រប និងកិច្ចការដែលតួអង្គទាំងអស់ត្រូវចូលរួមអនុវត្តបន្ត។

បើតាមឯកឧត្តមរដ្ឋលេខាធិការ អង្គប្រជុំបានគូសបញ្ជាក់អំពីសារៈសំខាន់នៃការធ្វើឱ្យមានទឹកស្អាតកាន់តែច្រើន ដោយកែលម្អការគ្រប់គ្រងផ្ទៃរងទឹកភ្លៀង ឬអាងស្ទឹង និងបង្កើនសមត្ថភាពរក្សាទឹករបស់អាង ព្រមទាំងបានទទួលស្គាល់វិភាគទានដ៏សំខាន់របស់គម្រោងក្នុងការអភិវឌ្ឍវិស័យកសិកម្ម ជាពិសេសការធ្វើឱ្យវិស័យនេះកាន់តែមានភាពធន់នឹងការប្រែប្រួលអាកាសធាតុ ហើយកសិករ និងសហគមន៍កសិកម្មទទួលបានប្រាក់ចំណេញសមស្រប៕