ក្រសួងកសិកម្ម និងដៃគូអភិវឌ្ឍ ចុះពិនិត្យ និងវាយតម្លៃការអនុវត្តគម្រោងគាំទ្រកសិករ សហគមន៍ កសិកម្ម និងក្រុមហ៊ុនកសិកម្ម ក្នុងខេត្តកំពង់ស្ពឺ និងកំពង់ធំ

ចេញ​ផ្សាយ​ ២១ ឧសភា ២០២៦ 2612

ចាប់ពីថ្ងៃទី១៩ ដល់២០ ខែឧសភា ឆ្នាំ ២០២៦ ឯកឧត្តម មាស ពិសិដ្ឋ ឯកឧត្តម កែវ អូម៉ាលីស្ស រដ្ឋលេខាធិការ ឯកឧត្តម សៀក ឡេង អនុ​រដ្ឋ​លេខាធិការ ក្រសួងកសិកម្ម រុក្ខាប្រមាញ់ និងនេសាទ បានសហការ​ជាមួយដៃគូអភិវឌ្ឍរួមមាន៖ សហភាពអឺរ៉ុប (EU) អង្គការអាល្លឺម៉ង់​សម្រាប់​អភិវឌ្ឍន៍អន្តរជាតិ (GIZ) អង្គការ People In Need (PIN) អង្គការ Farmer and Nature Net (FNN) ក្រុមហ៊ុន HUSK និងក្រុមហ៊ុន OLAM ចុះពិនិត្យ និងវាយតម្លៃការអនុវត្ត​គម្រោង​អភិវឌ្ឍន៍ ដើម្បីគាំទ្រកសិករ សហគមន៍កសិកម្ម និងក្រុមហ៊ុនកសិកម្ម ក្នុងខេត្តកំពង់ស្ពឺ និងកំពង់ធំ។
នាដំណើរចុះពិនិត្យនោះ ក្រុមការងារបានវាយតម្លៃការផលិត និងការ​បញ្ចូលប្រើប្រាស់ធ្យូងអង្កាម (Biochar) ជី និងថ្នាំកសិកម្ម​ដែលផ្សំពី​ធ្យូងអង្កាម ការដាំដុះដំណាំចង្ក្រង់ស្វាដើម្បីកែលម្អគុណភាព ឬ ជីជាតិដី ការពិសោធន៍ប្រៀបធៀបប្រសិទ្ធភាពនៃការគ្រប់គ្រង និង​ថែទាំ​ដំណាំ លើទិន្នផល និងគុណភាពគ្រាប់ស្រូវ និងគ្រាប់​ស្វាយ​ចន្ទី។ ព្រមទាំងដំណើរការរបស់រោងសម្ងួតកសិផល និងម៉ាស៊ីនបូម​ទឹក​ដែលប្រើថាមពលព្រះអាទិត្យ។
ទន្ទឹមនឹងនោះ ក្រុមការងារក៏បានជួបជាមួយមន្ត្រីសាកលវិទ្យាល័យ​ភូមិន្ទកសិកម្ម មន្ទីរកសិកម្មខេត្ត និងទីប្រឹក្សាដៃគូអភិវឌ្ឍ និងក្រុមហ៊ុន​ខាងលើ ដោយបានលើកអំពីគោលនយោបាយថ្មីរបស់រាជរដ្ឋា​ភិបាល​កម្ពុជា យុទ្ធសាស្ត្រ និងសកម្មភាពសំខាន់ៗរបស់ក្រសួងកសិកម្ម។ 
ជាមួយគ្នានោះដែរមានបានផ្តល់ការណែនាំ ដើម្បីកែលម្អការផ្សព្វ​ផ្សាយ​បញ្ចូល និងការប្រើប្រាស់បច្ចេកវិទ្យាខាងលើ សំដៅ​អភិវឌ្ឍ​វិស័យ​កសិកម្មជាតិ ពោលគឺធ្វើឱ្យកសិករ សហគមន៍កសិកម្ម និង​ក្រុមហ៊ុន​កសិកម្មផលិតស្បៀងអាហារដែលមានតម្លៃសមរម្យ និង​មានសុវត្ថិភាព កើនប្រាក់ចំណូល។ ការថែរក្សាធនធានធម្មជាតិ​កសិកម្ម ដូចជា៖ ដី ទឹក និងព្រៃឈើ ព្រមទាំងបង្កើនភាពធន់ និង​បន្ថយ​ការបង្កបញ្ហាដែលធ្វើឱ្យមានការប្រែប្រួលអាកាសធាតុជាដើម៕