Other News
ឯកឧត្ដមអនុរដ្ឋលេខាធិការ ឡឹក សុធារ អញ្ជើញចុះពិនិត្យការអនុវត្ត:កម្មវិធី «ផ្ដល់អាហារតាមសាលារៀនដោយប្រើប្រាស់កសិផលក្នុងសហគមន៍» នៅស្រុកទឹកផុស ខេត្តកំពង់ឆ្នាំង
ចេញផ្សាយ ៥ មីនា ២០២៥ 3333
នៅថ្ងៃទី០៤ ខែមីនា ឆ្នាំ២០២៥ ឯកឧត្ដម ឡឹក សុធារ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អមដំណើរដោយជនបង្គោលថ្នាក់ខេត្ត និងមន្រ្តីកសិកម្មឃុំ ក្នុងស្រុកទឹកផុស បានចុះពិនិត្យការដាំដុះបន្លែរបស់កសិករ ប៊ុន លឹម និងកែ រស់ ស្ថិតនៅភូមិអលង្កែរ ឃុំចោងម៉ោង ស្រុកទឹកផុស ខេត្តកំពង់ឆ្នាំង។
កសិករ កែ រស់ បង្ហាញក្តីរីករាយ ដែលបានដាំបន្លែផ្គត់ផ្គង់ សម្រាប់កម្មវិធីផ្ដល់អាហារតាមសាលារៀនចំនួន៣ នៅក្នុងឃុំ និងបច្ចុប្បន្នមាន០៧គ្រួសារ ប៉ុន្តែពួកគាត់មិនទាន់មានជារចនាសម្ព័ន្ធក្រុមផលិតជាក់លាក់នៅឡើយទេ។ គាត់បានបញ្ជាក់ទៀតថា «គាត់បានប្រាក់ចំណូលសម្រាប់គ្រួសារ និងអាចផ្គត់ផ្គង់បន្លែសុវត្ថិភាពដល់កុមារ ដោយទទួលបានអាហារស្រស់ៗចេញពីស្នាដៃរបស់គាត់»។ បន្លែដែលពួកគាត់ដាំដុះរួមមាន៖ សណ្ដែកកួរ ត្រឡាច និងប៉េងប៉ោះ ជាដើម។
ឆ្លៀតក្នុងឱកាសនោះ ឯកឧត្តមអនុរដ្ឋលេខាធិការ បានវាយតម្លៃខ្ពស់ពីការចូលរួមរបស់កសិករ ដើម្បីលើកកម្ពស់អាហារូបត្ថម្ភដល់កុមារ និងបង្កើនជីវភាពរបស់ខ្លួន ហើយបានលើកទឹកចិត្ត ឱ្យកសិករប្រើប្រាស់នូវធាតុចូលកសិកម្មឱ្យបានសមស្រប ចៀសវាងនូវសារធាតុដែលប៉ះពាល់ដល់សុខភាព។ ឯកឧត្តម ណែនាំដល់មន្រ្តីកសិកម្មឃុំ បន្តចុះប្រឹក្សាយោបល់បច្ចេកទេសដល់កសិករដាំបន្លែ ដើម្បីបន្តផលិតប្រកបដោយគុណភាព និងសុវត្ថិភាព។
ជាចុងបញ្ចប់ ឯកឧត្ដមអនុរដ្ឋលេខាធិការ ក៏បានផ្តល់អនុសាសន៍ដល់ជនបង្គោលមន្ទីរកសិកម្មខេត្ត សម្របសម្រួលរៀបចំចងក្រងក្រុមផលិតឱ្យបានច្បាស់លាស់ ដើម្បីជំរុញផលិតកម្ម បង្កើនគុណភាព ធានានូវសុវត្ថិភាព និងស្វែងរកទីផ្សារជូនកសិករ៕
