ឯកឧត្តមរដ្ឋលេខាធិការ តូច ប៊ុនហួរ អញ្ជើញដឹកនាំក្រុមការងារចុះពិនិត្យ និងវាយតម្លៃពីការអនុវត្តន៍ទស្សនវិស័យនៃការអភិវឌ្ឍលើវិស័យវារីវប្បកម្ម នៅខេត្តតាកែវ

ចេញ​ផ្សាយ​ ២៨ សីហា ២០២៥ 638

នៅថ្ងៃទី២៧ ខែសីហា ឆ្នាំ២០២៥ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ  រួមដំណើរដោយឯកឧត្តម សុខ វិសាល អនុរដ្ឋលេខាធិការ ដោយមានការអញ្ជើញចូលរួមពី លោក ញ៉ិប ស្រ៊ន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តតាកែវ អាជ្ញាធរស្រុក-ឃុំ មន្ត្រីកសិកម្មឃុំ បានអញ្ជើញចុះពិនិត្យ តាមដាន និងវាយតម្លៃទស្សនវិស័យនៃការអភិវឌ្ឍវិស័យវារីវប្បកម្មនៅក្នុងខេត្តតាកែវ។

ក្នុងដំណើរនេះ ឯកឧត្តមរដ្ឋលេខាធិការ បានជំរុញលើកទឹកចិត្ត និងការផ្តល់បច្ចេកទេសពីមន្ត្រីជំនាញរបស់ក្រសួង និងមន្ទីរកសិកម្មខេត្ត ក៏ដូចជាដៃគូអភិវឌ្ឍន៍នានា ម្ចាស់កសិដ្ឋានចិញ្ចឹមត្រីប្រា នៅភូមិពួនកក ឃុំបាស្រែ ស្រុកអង្គរបូរី បានពង្រីកស្រះទឹកបន្ថែមទៀត និងបានលើកទឹកចិត្តឱ្យរៀបចំសិប្បកម្មកែច្នៃត្រីប្រា ដើម្បីដាក់លក់នៅផ្សារទំបនានានៅរាជធានីភ្នំពេញ ដើម្បីទទួលបានតម្លៃបន្ថែម។  បន្ទាប់មក ក្រុមការងារបានបន្តចុះពិនិត្យកសិដ្ឋានភ្ញាស់កូនបង្កង របស់កសិករ ព្រំ វ៉ាត នៅភូមិព្រៃសំបួរ ឃុំអង្គរបូរី និងបានចុះពិនិត្យមើលកសិករចិញ្ចឹមបង្កងចំនួន២គ្រួសារ ដែលគាំទ្រដោយគម្រោងស្តារវិស័យទេសចរណ៍ក្រោយកូវីដ១៩ នៅឃុំអង្គរបូរី និងឃុំគោកធ្លកស្រុកអង្គរបូរី។

ឯកឧត្តមរដ្ឋលេខាធិការ បានគូសបញ្ជាក់ថា កសិដ្ឋានចិញ្ចឹមត្រីប្រា មានចំនួន៤ស្រះ ដោយក្នុង១ស្រះទំហំ ១០០០ម២ (១០ម x ១០០ម) មានត្រីប្រាចំនួន១០ ០០០ក្បាល រយៈពេលចិញ្ចឹម១ឆ្នាំ អាចចាប់លក់បានដោយក្នុង១ថ្ងៃ អាចលក់បានពី៣០០ ទៅ៤០០គីឡូក្រាម។ សម្រាប់គម្រោងស្តារវិស័យទេសចរណ៍ ក្រោយកូវីដ១៩ ដែលអនុវត្តដោយរដ្ឋបាលជលផល បានផ្តល់កូនបង្កងប្រមាណ ៤០ ០០០ក្បាល និងសម្ភារៈផ្សេងៗ ដល់កសិករចំនួន៦គ្រួសារ សម្រាប់ចិញ្ចឹមបង្ហាញ ក្នុងនោះមានកសិកដ្ឋានភ្ញាស់បង្កងចំនួន១កន្លែង។

ទន្ទឹមនឹងនេះ ឯកឧត្តមក៏បានណែនាំបន្ថែមពីការភ្ញាស់បង្កង គួរគិតគូរយ៉ាងណាឱ្យកូនបង្កងដែលកសិករយកទៅចិញ្ចឹមមានអត្រាលូតលាស់លឿន និងរស់បានច្រើន។ ជាទីបញ្ចប់ ឯកឧត្តមរដ្ឋលេខាធិការ បានផ្តាំផ្ញើដល់មន្ទីរកសិកម្មខេត្ត ក៏ដូចជាមន្ត្រីកសិកម្មឃុំ ត្រូវបន្តយកចិត្តទុកដាក់តាមដាន និងជួយដោះស្រាយបញ្ហាប្រឈម និងផ្តល់បច្ចេកទេសដល់ពួកគាត់បន្ថែមទៀត៕