Other News
ឯកឧត្តមបណ្ឌិតរដ្ឋលេខាធិការ ហ៊ាន វណ្ណហន និងឯកឧត្តម អាន ពេជ្រហត្ថដា អញ្ជើញជួបសំណេះសំណាលជាមួយសហគមន៍កសិកម្មទំនើប២ ក្រោមក្របខ័ណ្ឌកិច្ចអន្តរាគមន៍អន្តរវិស័យកសិកម្ម-ទឹក-ជនបទ នៅខេត្តកំពង់ធំ
ចេញផ្សាយ ២១ តុលា ២០២៥ 203
នៅថ្ងៃទី២១ ខែតុលា ឆ្នាំ២០២៥ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ឯកឧត្តម អាន ពេជ្រហត្ថដា រដ្ឋលេខាធិការក្រសួងធនធានទឹក និងឧតុនិយម សហប្រធាននៃក្រុមការងារត្រី-វិស័យ រួមជាមួយឯកឧត្ដម ឃឹម ហ្វីណង់ អនុរដ្ឋលេខាធិការ និងសមាជិកអចិន្រ្ដៃយ៍ សមាជិកក្រុមការងារត្រី-វិស័យ និងក្រុមលេខាធិការដ្ឋាន ក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹក និងឧតុនិយម និងក្រសួងអភិវឌ្ឍន៍ជនបទ បានជួបសំណេះសំណាល ពិភាក្សាជាមួយប្រធាន អនុប្រធាន សមាជិកសមាជិកាសហគមន៍កសិកម្មទំនើបចំនួន២ នៅខេត្ដកំពង់ធំ ។
ជាដំបូងក្រុមការងារនៃដំណើរបេសកកម្មបានជួបប្រជុំ នៅសហគមន៍កសិកម្មទំនើបអភិវឌ្ឍន៍ដំណាំស្រូវកំពង់ធំ ដែលស្ថិតនៅសង្កាត់អូរកន្ធរ ស្រុកស្ទឹងសែន។ សហគមន៍នេះបង្កើតឡើងថ្ងៃទី២៥ ខែមីនា ឆ្នាំ២០២៥ មានសមាជិកសរុប ១៨០ នាក់ (ស្រី ០៨នាក់) សហគមន៍នេះធ្វើផលិតកម្មដំណាំស្រូវសែនក្រអូប ២.២២២ ហិកតា និងស្រូវស្រង៉ែស្រាល ១.៤១៨ហិកតា ស្មើនឹងផ្ទៃដីសរុប ៣.៦៤០ ហិកតា។
បន្ទាប់មកក្រុមការងារបានបន្ត ជួបសហគមន៍កសិកម្មទំនើបសំបូររុងរឿង ស្ថិតនៅឃុំគោល ស្រុកប្រាសាទសំបូរ។ សហគមន៍នេះបង្កើតឡើងនៅថ្ងៃទី១៩ ខែកក្កដា ឆ្នាំ២០២៤ មានសមាជិកសរុបចំនួន ១៥៣នាក់(ស្រី ៦១នាក់) មានមុខរបរ២សំខាន់ គឺការផ្គត់ផ្គង់ធាតុចូលកសិកម្មដល់សមាជិកសហគមន៍ និងប្រមូលផលិតផលគ្រាប់ស្វាយចន្ទីពីសមាជិកលក់ទៅក្រុមហ៊ុនដៃគូសហការ។
នាឱកាសនៃជំនួបនោះ ឯកឧត្ដមសហប្រធាន បានគូសបញ្ជាក់ពីគោលបំណងរួមរបស់ក្រសួងទាំងបី លើការពិនិត្យវាយតម្លៃលក្ខណៈសម្បត្តិរបស់សហគមន៍កសិកម្មទំនើបទាំង២ ដើម្បីបញ្ចូលក្នុងក្របខ័ណ្ឌត្រី-វិស័យ នាឆ្នាំ២០២៦។ ឯកឧត្ដមសហប្រធាន បន្ថែមថា ក្នុងក្របខ័ណ្ឌត្រី-វិស័យ សហគមន៍នឹងទទួលបានការគាំទ្របន្ថែមពីក្រសួងទាំង៣ លើការជំរុញបង្កើនផលិតភាពកសិកម្ម ការប្រើប្រាស់ធនធានទឹកពហុបំណងប្រកបដោយប្រសិទ្ធភាព ការគាំទ្រលើហេដ្ឋារចនាសម្ព័ន្ធរួមមាន៖ ប្រព័ន្ធធារាសាស្រ្ដ ផ្លូវថ្នល់ និងផ្សារសហគមន៍ជាដើម៕
