ឯកឧត្តមរដ្ឋមន្រ្តី វេង សាខុន រួមដំណើរដោយមន្រ្តីជាន់ខ្ពស់ក្រសួង បានអញ្ជើញចូលរួមពិធីបើកកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន ក្រោមអធិបតីភាព ឯកឧត្តម ត្រិញ ឌិញហ្សូង (Trinh Dinh Dung) ឧបនាយករដ្ឋមន្រ្តីនៃសាធារណៈរដ្ឋសង្គមនិយមវៀតណាម នៅឯទីក្រុងហាណូយ

ចេញ​ផ្សាយ​ ១១ តុលា ២០១៨ 3841

ដោយមានការអនុញ្ញាតដ៏ខ្ពង់ខ្ពស់ពី សម្តេចអគ្គមហាសេនាបតីតេជោ នាយករដ្ឋមន្រ្តីនៃព្រះរាជាណាចក្រកម្ពុជា នៅព្រឹកថ្ងៃព្រហស្បតិ៍ ០២កើត ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែតុលា ឆ្នាំ២០១៨ ឯកឧត្តមរដ្ឋមន្រ្តី វេង សាខុន រួមដំណើរដោយមន្រ្តីជាន់ខ្ពស់ក្រសួង បានអញ្ជើញចូលរួមពិធីបើកកិច្ចប្រជុំលើកទី៤០ នៃរដ្ឋមន្រ្តីកសិកម្ម និងព្រៃឈើអាស៊ាន ក្រោមអធិបតីភាព ឯកឧត្តម ត្រិញ ឌិញហ្សូង (Trinh Dinh Dung) ឧបនាយករដ្ឋមន្រ្តីនៃសាធារណៈរដ្ឋសង្គមនិយមវៀតណាម នៅឯទីក្រុងហាណូយ។ កិច្ចប្រជុំនេះរៀបចំឡើងក្នុងគោលបំណងពិនិត្យមើលរួមគ្នានូវវឌ្ឍនៈភាព និងសមិទ្ធិផល នៃការអនុវត្តក្របខណ្ឌគោលនយោបាយដែលពាក់ព័ន្ធនឹងកិច្ចសហប្រតិបត្តិការស្បៀង កសិកម្ម និងព្រៃឈើអាស៊ាន ដើម្បសម្រេចបាននូវចក្ខុវិស័យកសិកម្មអាស៊ានក្នុងឆ្នាំ២០៣០ ជាកសិកម្មទំនើប មានលក្ខណៈប្រកួតប្រជែង បរិយាប័ន្ន ធន់នឹងការប្រែប្រួលអាកាសធាតុ និងនិរន្តភាព ដែលនាំដល់ការកើនឡើងប្រាក់ចំណួលគ្រួសារកសិករ វិបុលភាព និងសុខុមាលភាពប្រជាពលរដ្ឋតំបន់។ បន្ទាប់មកគណៈប្រតិភូបានអញ្ជើញទស្សនាការដាក់តាំងពិពរណ៌ផលិតផលកសិកម្មរបស់អាស៊ាន។