Other News
ថ្នាក់ដឹកនាំជាន់ខ្ពស់ក្រសួងកសិកម្ម អញ្ជើញដឹកនាំកិច្ចប្រជុំគណៈកម្មាធិការតម្រង់ទិសលើកទី៣ នៃគម្រោង «ភាពជាដៃគូកម្ពុជាសម្រាប់កសិកម្ម ប្រកបដោយចីរភាព និងប្រព័ន្ធស្បៀងអាហារ»
ចេញផ្សាយ ៥ មិថុនា ២០២៦ 2692
នៅថ្ងៃទី៤ ខែមិថុនា ឆ្នាំ២០២៦ ឯកឧត្តម តូច ប៊ុនហួរ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងលោក Bryan Fornari ប្រធានកិច្ចសហប្រតិបត្តិការ នៃគណៈប្រតិភូសហអឺរ៉ុបប្រចាំនៅកម្ពុជា ជាសហប្រធានគណៈកម្មាធិការតម្រង់ទិសគម្រោង(EU-German CAPSAFE) បានដឹកនាំកិច្ចប្រជុំពិភាក្សាពីវឌ្ឍនភាព បញ្ហាប្រឈម និងទិសដៅបន្តរបស់គម្រោង «ភាពជាដៃគូកម្ពុជា សម្រាប់កសិកម្មប្រកបដោយចីរភាព និងប្រព័ន្ធស្បៀងអាហារ»។
កិច្ចប្រជុំរៀបចំឡើង នៅទីស្តីការក្រសួងកសិកម្ម មានការចូលរួមពីឯកឧត្តម មាស ពិសិដ្ឋ រដ្ឋលេខាធិការ ឯកឧត្តម វ៉ា រុតសាន រដ្ឋលេខាធិការ ក្រសួងពាណិជ្ជកម្ម Dr. Gidon Windecker អនុប្រធានសហប្រតិបត្តិការអភិវឌ្ឍអាល្លឺម៉ង់ រួមទាំងសមាជិកក្រុមការងារគណៈកម្មាធិការតម្រង់ទិស EU-German CAPSAFE។
ជាសមិទ្ធផលសំខាន់ៗដែលសម្រេចបាន៖ គម្រោងបានបញ្ចប់របាយការណ៍ពាក់កណ្តាលអាណត្តិនៃគោលនយោបាយស្វាយចន្ទី សេចក្តីព្រាងគោលនយោបាយជាតិដំណាំម្រេច និងរៀបចំស្តង់ដារគ្រាប់ស្វាយចន្ទីឆៅពូជ M23។ ទន្ទឹមនឹងនេះ ប្រព័ន្ធវិញ្ញាបនបត្រភូតគាមអនាម័យអេឡិចត្រូនិក (ePhyto) ត្រូវបានធ្វើតេស្តដោយជោគជ័យនៅប្រទេសឥណ្ឌូនេស៊ី។ គម្រោងក៏បានបណ្តុះបណ្តាលមន្ត្រីឃុំ ១,៦០០នាក់ លើកម្មវិធី Farmbook App បណ្តុះបណ្តាលកសិករ ៣,២០០នាក់ សម្របសម្រួលកិច្ចសន្យាលក់ស្វាយចន្ទី ៦,៦០០តោន និងម្រេច ១៥០តោន ព្រមទាំងគាំទ្រក្រុមហ៊ុនចំនួន១៨ ក្នុងការបង្កើនសមត្ថភាពកែច្នៃដើម្បីនាំចេញ។
ជាចុងក្រោយ អង្គប្រជុំបានសម្រេចដាក់ទិសដៅអាទិភាពក្នុងឆមាសទី២ ឆ្នាំ២០២៦ រួមមាន៖ រៀបចំវេទិកាថ្នាក់ជាតិស្តីពីស្វាយចន្ទី និងម្រេច នៅខែវិច្ឆិកា និងភ្ជាប់ទំនាក់ទំនងក្រុមហ៊ុនក្នុងស្រុកទៅកាន់វិនិយោគិនអឺរ៉ុប។ ជំរុញការដាក់ឱ្យដំណើរការផ្លូវការនូវប្រព័ន្ធ ePhyto នៅខែកញ្ញា និងដោះស្រាយបញ្ហាហត្ថលេខាអេឡិចត្រូនិកជាមួយក្រសួងប្រៃសណីយ៍។ ពង្រីកការបណ្តុះបណ្តាល «សាលាអាជីវកម្មកសិករ» និង បន្តស្វែងរកដំណោះស្រាយហិរញ្ញវត្ថុសម្រាប់សហគ្រាសកែច្នៃជាដើម។
សូមបញ្ជាក់ថា គម្រោង(EU-German CAPSAFE) ទទួលបានការគាំទ្រថវិកាពីសហភាពអឺរ៉ុប ក្រសួងពាក់ព័ន្ធ និងBMZ អាល្លឺម៉ង់ អនុវត្តដោយ GIZ សហការជាមួយក្រសួងកសិកម្ម រុក្ខាប្រមាញ់ និងនេសាទ ដោយផ្តោតលើខ្សែច្រវាក់តម្លៃ «ស្វាយចន្ទី និងម្រេច»៕
