ដំណើរទស្សនកិច្ចរោងចក្រផលិតដំណាប់ស្វាយចំណិត

ចេញ​ផ្សាយ​ ៥ តុលា ២០១៩ 27831

នារសៀលថ្ងៃសុក្រ​ ៦កើត ខែអស្សុជ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី០៤ ខែតុលា ឆ្នាំ២០១៩  ឯកឧត្តម នុត ច័ន្ទសុខា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយអង្គភាពក្រោមឧវាទក្រសួង បានទស្សនកិច្ចរោងចក្រផលិតដំណាប់ស្វាយចំណិត ទី១ របស់ក្រុមហ៊ុន គ្រីន លិឌ័រ (Green Leader) ស្ថិតនៅភូមិ ពងទឹក ឃុំដំណាក់អំពិល ស្រុកអង្គស្នូល ខេត្តកណ្តាល មានផ្ទៃដីជិត១០ ០០០ ម៉ែត្រក្រឡា ដែលមានសមត្ថភាពផលិតប្រមាណជា ២ ០០០តោន/១ឆ្នាំ និងមានគោលដៅនាំចេញទៅទីផ្សារប្រទេសចិន។

តាមការផ្តល់ព័ត៌មានដោយលោក Michael Tse ជា CEO & Executive Director របស់ក្រុមហ៊ុន គ្រីន លិឌ័រ(Green Leader) បានឧ្យដឹងថា រោងចក្របានដាក់ឧ្យដំណើរការកាលពីខែមករា ឆ្នាំ២០១៨ ព្រមទាំងបានផ្តល់ការងារដល់កម្មករក្នុងស្រុកចំនួនជាង៥០០នាក់ផងដែរ ដោយបម្រើការងារចែកចេញជា៣ វេន។ ក្រុមហ៊ុនបានបណ្តុះបណ្តាលមុខជំនាញផ្សេងៗទាក់ទងទៅនឹងមុខជំនាញដែលជាតម្រូវការរបស់ ក្រុមហ៊ុនជូនដល់កម្មករផងដែរ។

បច្ចុប្បន្ននេះ ក្រុមហ៊ុនបានធ្វើកិច្ចសន្យាជាមួយកសិករដាំស្វាយ ដើម្បីប្រមូលទិញផ្លែស្វាយស្រស់លេខ២ ផ្គត់ផ្គង់រោងចក្រកែច្នៃទៅជាដំណាប់ស្វាយចំណិតស្ងួត និងបាននាំចេញបានប្រមាណជាង៥០០ តោន ទៅទីផ្សារប្រទេសចិន។

បន្ថែមពីនេះទៀតលោក Michael Tse បានឱ្យដឹងទៀតថា រោងចក្រទី២បាននិងកំពុងដំណើរការផងដែរស្ថិតនៅភូមិដំបងវិញ ឃុំត្រពាំជោរ ស្រុកឧរាល់ ខេត្តកំពង់ស្ពី មានផ្ទៃដីជិត១៥ ០០០ម៉ែត្រក្រឡា ដែលមានសមត្ថភាពផលិតចប្រមាណជា២ ០០០តោន/១ឆ្នាំ។ ទន្ទឹមនឹងនេះផងដែរ សម្រាប់រយៈពេលខ្លីខាងមុខក្រុមហ៊ុននឹងបន្តស្វែងរកទីតាំងដែលមានសក្តានុពលដំណាំស្វាយ ដើម្បីសាងសង់រោងចក្របន្ថែមក្នុងគោលបំណងផលិតដំណាប់ស្វាយចំណិតស្ងួតឱ្យបានប្រមាណជាង ១០ ០០០តោន/១ឆ្នាំ សម្រាប់នាំចេញទៅទីផ្សារប្រទេសចិនផងដែរ។ ដូច្នេះក្រុមហ៊ុន គ្រោងនឹងសាងសង់រោងចក្រទី៣ នៅស្រុកតំបែរ ខេត្តត្បូងឃ្មុំក្នុងឆ្នាំ២០២០ ដែលមានសមត្ថភាពផលិតប្រមាណជា៥ ០០០តោន/១ឆ្នាំ។

សម្រាប់រយៈពេលវែង ក្រុមហ៊ុន មានផែនការបង្កើតរោងចក្រកែច្នៃដើម្បីបង្កើនតម្លៃបន្ថែម (value added) សម្រាប់ផលិតផលផ្លែស្វាយ ដូចជា ភេសជ្ជៈទឹកស្វាយ (mango juice) និងស្វាយសុទ្ធ (mango puree) ដើម្បីបំពេញតម្រូវការឧស្សាហកម្មដុតនំ(baking industry) របស់ប្រទេសចិនផងដែរ។ សូមជម្រាបជូនផងដែរថា ផ្លែស្វាយស្រស់ ៧តោន អាចផលិតដំណាប់ស្វាយចំណិតបាន១ តោន។

ក្នុងឱកាសនោះដែរ ឯកឧត្តម នុត ច័ន្ទសុខា បានថ្លែងអំណរគុណចំពោះ ក្រុមហ៊ុន គ្រីន លិនឌ័រ ( Green Leader) ដែលបានបោះទុនវិនិយោគនៅព្រះរាជាណាចក្រកម្ពុជា ដោយក្រុមហ៊ុនមានយុទ្ធសាស្រ្ត និងផែនការច្បាស់លាស់ក្នុងការវិនិយោគលើវិស័យកសិកម្ម គឺស្របតាមគោលនយោបាយផ្តួចផ្តើមផ្លូវមួយ ខ្សែក្រវាត់មួយរបស់រដ្ឋាភិបាលនៃសាធារណរដ្ឋប្រជាមានិតចិន ហើយក៏ជាការចូលរួមចំណែកជាមួយរាជរដ្ឋាភិបាលកម្ពុជា ក្នុងការជម្រុញកំណើនសេដ្ឋកិច្ចជាតិ ជាពិសេសបានផ្តល់អត្ថប្រយោជន៍ដល់ប្រជាកសិករដាំស្វាយក្នុងស្រុក និងកម្មករបម្រើការងារក្នុងរោងចក្រ ដើម្បីបង្កើនប្រាក់ចំណូលរបស់ពួកគាត់ផងដែរ។
ទន្ទឹមនឹងនេះ ឯកឧត្តម សំណូមពរដល់ក្រុមហ៊ុនឱ្យមានការទំនាក់ទំនង ជាមួយមន្ទីរកសិកម្ម រុក្ខាប្រមាញ់ និងនេសាទ ទាក់ទងនឹងការធ្វើផលិតកម្មកសិកម្មតាមកិច្ចសន្យាជាមួយកសិករដាំស្វាយ ក៏ដូចជា ព័ត៌មានស្វែងរកទីតាំងដែលមានសក្តានុពលដំណាំស្វាយ ដើម្បីសាងសង់រោងចក្របន្ថែមទៀតផងដែរ។