ឯកឧត្តមអនុរដ្ឋលេខាធិការ ប៉ុល សុផា អញ្ជើញដឹកនាំគណៈប្រតិភូ ចុះជួបសួរសុខទុក្ខកងទ័ពការពារព្រំដែនលេខ៥០៣ នៃតំបន់ប្រតិបត្តិការសឹករង ខេត្តបន្ទាយមានជ័យ

ចេញ​ផ្សាយ​ ៤ មេសា ២០២៥ 2934

នៅព្រឹកថ្ងៃទី៣ ខែមេសា ឆ្នាំ២០២៥ ឯកឧត្តម ប៉ុល សុផា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយឯកឧត្តមស្រី សុទ្ធា តំណាងដ៏ខ្ពង់ខ្ពស់ ឯកឧត្តមរដ្ឋមន្ត្រី ឌិត ទីណា បានអញ្ជើញដឹកនាំគណៈប្រតិភូ ចុះជួបសួរសុខទុក្ខ មេបញ្ជាការ មេបញ្ជាការរង នាយទាហាន និងពលទាហាន ក្នុងកងការពារព្រំដែនលេខ៥០៣ នៃតំបន់ប្រតិបត្តិការសឹករង ខេត្តបន្ទាយមានជ័យ។ ក្នុងឱកាសនោះ ឯកឧត្តមអនុរដ្ឋលេខាធិការ បាននាំនូវការផ្តាំផ្ញើសួរសុខទុក្ខពីសំណាក់ឯកឧត្តមរដ្ឋមន្ត្រី ឌិត ទីណា និងបាននាំយកអំណោយរបស់ឯកឧត្តមរដ្ឋមន្ត្រី ជូនដល់បងប្អូនកងទ័ពទាំងអស់ សម្រាប់ឱកាសបុណ្យចូលឆ្នាំថ្មីប្រពៃណីជាតិ ខ្មែរ ខាងមុខនេះ ដើម្បីដឹងសុខទុក្ខគ្នាទៅវិញទៅមក និងលើកទឹកចិត្តដល់កងទ័ពដែលនៅជួរមុខ ឱ្យកាន់តែមានកម្លាំងចិត្ត ឆន្ទៈនិងស្មារតីស្នេហាជាតិកាន់តែខ្លាំងថែមទៀត ក្នុងការការពារបូរណភាពដែនដី និងអធិបតេយ្យភាពជាតិកម្ពុជា។

ក្នុងពិធីសំណេះសំណាល ឯកឧត្តមអនុរដ្ឋលេខាធិការ បានរំលឹកពីប្រវត្តិនៃការចងសម្ព័ន្ធមេត្រីភាពនេះគឺក្រោមការយកចិត្តទុកដាក់ និងណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជាហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃព្រះរាជណាចក្រកម្ពុជា សម្តេចផ្ដួចផ្ដើមឱ្យមានការចងមេត្រីភាពរវាងក្រសួងស្ថាប័នស៊ីវិលជួរក្រោយ ជាមួយកងអង្គភាពកងយោធពលខេមរភូមិន្ទជួរមុខ តាំងពីយូរមកហើយ ពិសេសចាប់ពីឆ្នាំ២០០៤មក។ រហូតបន្តមកដល់ក្រោមការដឹកនាំដ៏ឈ្លាសវៃ ម៉ឹងមាត់និងប្រាកដប្រជារបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាកម្ពុជា កិច្ចការនេះ នៅតែបន្តយកចិត្តទុកដាក់ខ្ពស់និងកាន់តែសកម្មថែមផងដែរ ពិសេសឱ្យតែជិតដល់រដូវបុណ្យប្រពៃណីជាតិធំៗ ឬពេលមានការចាំបាច់ តែងតែមានការចុះមកសួរសុខទុក្ខ និងនាំយកនូវអំណោយ មកឧបត្ថម្ភជាប្រចាំក្នុងគោលបំណង ដើម្បីបង្កើនចំណងស្មារតីសាមគ្គីជាតិជាធ្លុងមួយ និងដឹងសុខទុក្ខគ្នារវាងកម្លាំងជួរមុខនិងជួរក្រោយ។

ជាមួយគ្នានោះដែរ លោកវរសេនីយ៍ទោ រឿង សារិត មេបញ្ជាការកងការពារព្រំដែន លេខ៥០៣ បានថ្លែងអំណរគុណយ៉ាងជ្រាលជ្រៅ ដល់ឯកឧត្តមឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលតែងតែ យកចិត្តទុកដាក់គិតគូរដល់សុខទុក្ខ និងជួយឧបត្ថម្ភគាំទ្រជានិច្ច ដល់អង្គភាព និងកងកម្លាំងយោធិនទាំងអស់ និងអរគុណដល់ឯកឧត្តមអនុរដ្ឋលេខាធិការ និងគណៈប្រតិភូអមដំណើរទាំងអស់ ដែលបានចុះមកផ្ទាល់នៅក្នុងថ្ងៃនេះ និងបានប្តេជ្ញាចិត្តយ៉ាងមុតមាំក្នុងការការពារបូរណភាពដែនដី អធិបតេយ្យភាពជាតិ និងរក្សាសន្តិសុខជាតិ ពិសេសការពារនិងជឿជាក់គាំទ្រយ៉ាងដាច់ខាតចំពោះរាជរដ្ឋាភិបាលកម្ពុជាស្របច្បាប់និងការពារសន្តិភាពដែលរកបានដោយកម្រនិងលំបាកនេះ ឱ្យបានស្ថិតស្ថេរជានិរន្តរ ជាដាច់ខាត ទោះក្នុងតម្លៃណាក៏ដោយ៕