អគ្គលេខាធិការរងក្រសួងកសិកម្ម លោក ម៉ឹក គឹមស្រូយ ទទួលជួបសំណេះសំណាលនិងស្តាប់បទបង្ហាញអំពីសេវាដឹកជញ្ជូន និងចែកចាយបញ្ញើប្រៃសណីយ៍

ចេញ​ផ្សាយ​ ១៧ កញ្ញា ២០២៥ 226

នៅថ្ងៃទី១៧ ខែកញ្ញា ឆ្នាំ២០២៥ លោក ម៉ឹក គឹមស្រូយ អគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ បានសម្របសម្រួលជួបសំណេះសំណាល និងស្តាប់បទបង្ហាញ អំពីសេវាដឹកជញ្ជូន និងចែកចាយបញ្ញើប្រៃសណីយ៍ ជាមួយនឹងលោកអគ្គនាយក និងមន្រ្តីនៃប្រៃសណីយ៍កម្ពុជា ព្រមទាំងមានការអញ្ជើញចូលរួមពីតំណាងអគ្គនាយកដ្ឋានទាំង៥ គ្រឹះស្ថានសាធារណៈរដ្ឋបាលទំាង៥ និងអង្គភាពពាក់ព័ន្ធក្រោមឱវាទក្រសួងកសិកម្ម នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
ជំនួបនេះ ធ្វើឡើងក្នុងគោលបំណង ផ្តល់ឱកាសឱ្យប្រៃសណីយ៍កម្ពុជាចូលរួមសហការជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការផ្តល់សេវាដឹកជញ្ជូន ចែកចាយ លិខិត ឯកសារ និងសម្ភារៈផ្សេងៗ ដែលត្រូវបញ្ជូនទៅកាន់មន្ទីរ និងស្ថាប័នពាក់ព័ន្ធផ្សេងៗ និងផ្តល់ជម្រើសជូនប្រជាពលរដ្ឋប្រើប្រាស់សេវាប្រៃសណីយ៍ក្នុងការទទួលយកផលិតផលសម្រេចលើសេវាសាធារណៈដែលប្រជាពលរដ្ឋមកស្នើសុំពីក្រសួង។
ក្នុងឱកាសនៃជំនួប លោកអគ្គនាយក បានបង្ហាញថាសេវាប្រៃសណីយ៍កម្ពុជា(ប.ក.) ជាសហគ្រាសរដ្ឋ ដែលបម្រើសេវាប្រៃសណីយ៍ (បញ្ជូន ចែកចាយ លិខិត និងកញ្ចប់បញ្ញើដល់គោលដៅចុងក្រោយ) ទាំងក្នុងប្រទេស និងក្រៅប្រទេស។ លោកបន្ថែមថា បច្ចុប្បន្ននេះ ប្រៃសណីយ៍កម្ពុជា កំពុងផ្តល់សេវាប្រៃសណីយ៍ជូនក្រសួង មន្ទីរ ស្ថាប័នរាជរដ្ឋាភិបាល ក្រុមហ៊ុន ធនាគារ និងអង្គការក្រៅរដ្ឋាភិបាលផ្សេងៗ និងផ្តល់សេវាចែកចាយលិខិត និងឯកសារដែលចេញដោយសាលាដំបូង សាលាឧទ្ធរណ៍ តុលាការកំពូល និងអង្គភាពច្រកចេញចូលតែមួយរបស់រដ្ឋបាលរាជធានី ខេត្តដល់ទីតាំងអ្នកទទួល។
សូមជម្រាបថា ប្រៃសណីយ៍កម្ពុជា ជាប្រតិបត្តិកររបស់ជាតិ ហើយជាសមាជិករបស់សហភាពប្រៃសណីយ៍សកល ដែលមានសមាជិករហូត ដល់ ១៩៣ ប្រទេស។ ប្រៃសណីយ៍កម្ពុជា មានសាខានៅគ្រប់ទូទាំងរាជធានី ខេត្ត-ក្រុង និងមានដៃគូចែកចាយបញ្ញើក្រៅប្រទេសជាង២០០ប្រទេស៕