ឯកឧត្តមរដ្ឋលេខាធិការ គង់ ច័ន្ទវាសនា អញ្ជើញសម្ពោធដាក់ឱ្យដំណើរការខ្សែច្រវាក់ផ្គត់ផ្គង់ចេកស្រស់ របស់ក្រុមហ៊ុន ខេមបូឌា បាណាណា អេហ្គ្រីខលឆឺរ៉ល

ចេញ​ផ្សាយ​ ៦ មិថុនា ២០២៥ 2736

នៅរសៀលថ្ងៃទី៦ ខែមិថុនា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីសម្ពោធដាក់ឱ្យដំណើរការខ្សែច្រវាក់ផ្គត់ផ្គង់ចេកស្រស់របស់ក្រុមហ៊ុន ខេមបូឌា បាណាណា អេហ្គ្រីខលឆឺរ៉ល ដោយមានការចូលរួមពីថ្នាក់ដឹកនាំក្រសួង តំណាងសភាពាណិជ្ជកម្មកម្ពុជា-ចិន ប្រធានក្រុមហ៊ុន អាជ្ញាធរមូលដ្ឋាន និងបុគ្គលិកក្រុមហ៊ុនចំនួនប្រមាណជិត១០០នាក់។ 
ជាកិច្ចចាប់ផ្តើម ឯកឧត្តមរដ្ឋលេខាធិការ បានអបអរសាទរក្រុមហ៊ុន ចំពោះលទ្ធផលដ៏ល្អប្រសើរដែលសម្រេចបាន ចាប់តាំងពីការសម្រេចបោះទុនវិនិយោគលើដំណាំចេកនៅកម្ពុជា កាលពីឆ្នាំ២០២០ ដែលជារួមចំណែកក្នុងការបង្កើនល្បឿនអភិវឌ្ឍន៍វិស័យកសិកម្មកម្ពុជា។ ជាមួយគ្នានេះ ឯកឧត្តមបានក៏កោតសរសើរ និងវាយតម្លៃខ្ពស់ចំពោះក្រុមហ៊ុនផងដែរ ដែលបានផ្តល់ការងារដល់បុគ្គលិក និងកម្មករខ្មែរជាង៩០០នាក់ ព្រមទាំងបានចូលរួមកសាងហេដ្ឋារចនាសម្ព័ន្ធរូបវ័ន្ត និងផ្សារភ្ជាប់ជាមួយប្រជាពលរដ្ឋនៅមូលដ្ឋានបានយ៉ាងល្អប្រសើរ។ ឯកឧត្តមបានលើកឡើងថា ក្រុមហ៊ុនបាននឹងកំពុងប្រមូលផលផ្លែចេកអំបូងលឿង នៅលើផ្ទៃដី ៥០០ហិកតា និងកំពុងដាំនៅលើផ្ទៃដីចំនួន ២០០ហិកតាបន្ថែមទៀត ដោយរំពឹងថា នឹងទទួលផល នៅឆ្នាំ២០២៦។ បច្ចុប្បន្ន ក្រុមហ៊ុនកំពុងផ្គត់ផ្គង់ផ្លែចេកស្រស់នៅតាមផ្សារទំនើបនៅកម្ពុជា និងវេចខ្ចប់នាំចេញទៅប្រទេសចិនផងដែរ ដោយបាននាំចេញចំនួន ២ម៉ឺនតោន ក្នុងឆ្នាំ២០២៤ និងគ្រោងបង្កើនដល់ ៣ម៉ឺនតោន ក្នុងឆ្នាំ២០២៥នេះ។ 
ឯកឧត្តមរដ្ឋលេខាធិការមានប្រសាសន៍បន្ថែមថា វិស័យកសិកម្មកម្ពុជាសម្រេចបានលទ្ធផលគួរជាទីមោទនៈ ដោយធានាបាននូវសន្តិសុខស្បៀងពេញលេញ និងបាននាំចេញផលិតផលកសិកម្ម ១២លានតោន ទៅកាន់ទិសដៅ ៩៥ប្រទេស គិតជាទឹកប្រាក់ប្រមាណ ៥,៣ពាន់លានដុល្លារអាមេរិក ក្នុងឆ្នាំ២០២៤ ក្នុងនោះ ចំនួនជាង៨០ម៉ឺនតោន ទៅកាន់ប្រទេសចិន ដែលជាការរួមចំណែកគាំទ្រដល់កំណើនសេដ្ឋកិច្ចជាតិ និងលើកកម្ពស់ជីវភាពប្រជាកសិករ។ 
កម្ពុជាមានផ្ទៃដីដាំចេកអំបូងលឿងចំនួន ២១ពាន់ហិកតា និងផ្ទៃដីប្រមូលផលចំនួន ១៥ពាន់ហិកតា ដោយទទួលបានបរិមាណផលសរុបចំនួន ៤០ម៉ឺនតោន ជាមួយនឹងទិន្នផលជាមធ្យម ២៥តោន/ហិកតា។ បច្ចុប្បន្ន ចម្ការចេកចំនួន២៤ និងទីតាំងវេចខ្ចប់ផ្លែចេកស្រស់ចំនួន៣៦ ត្រូវបានចុះបញ្ជី និងទទួលស្គាល់ជាផ្លូវការ សម្រាប់ការនាំចេញផ្លែចេកស្រស់ទៅកាន់ ប្រទេសចិន។ ក្នុងឆ្នាំ២០២៤ កម្ពុជាបាននាំចេញផ្លែចេកស្រស់ចំនួន ២៦ម៉ឺនតោន ក្នុងនោះ ២៥ម៉ឺនតោន ស្មើនឹង៩៥% ទៅកាន់ទីផ្សារប្រទេសចិន ខណៈដែល៥%ផ្សេងទៀត ទៅកាន់ប្រទេសវៀតណាម កូរ៉េខាងត្បូង និងម៉ាឡេស៊ី។ តួលេខនេះបង្ហាញថា ប្រទេសចិនគឺជាគោលដៅ និងទីផ្សារនាំចេញផ្លែចេកស្រស់ធំជាងគេរបស់កម្ពុជា។ 
មុននឹងបញ្ចប់ ឯកឧត្តមរដ្ឋលេខាធិការ បានអំពាវនាវដល់ក្រុមហ៊ុនចិនដទៃទៀត ឱ្យមកបោះទុនវិនិយោគនៅកម្ពុជា ជាពិសេស ក្នុងវិស័យកសិកម្ម ដើម្បីប្រមូលវេចខ្ចប់ កែច្នៃ និងនាំចេញផលិតផលកសិកម្មប្រកបដោយគុណភាព និងឱជារសជាច្រើនទៀតរបស់កម្ពុជា ទៅកាន់ទីផ្សារប្រទេសចិន និងពិភពលោក ហើយក្រសួងកសិកម្ម រុក្ខាប្រមាញ់ និងនេសាទ ត្រៀមលក្ខណៈរួចជាស្រេចក្នុងការជួយគាំទ្រ និងផ្តល់ការសម្របសម្រួល ដើម្បីធានាឱ្យក្រុមហ៊ុនទទួលបានជោគជ័យ៕