Other News
ឯកឧត្តមរដ្ឋមន្រ្តីរំលឹកកសិករឱ្យរៀបចំដីទុកមុនកុំចាំទឹកភ្លៀង
ចេញផ្សាយ ២២ មករា ២០១៨ 3764
កាលពីថ្ងៃទី០២ ខែកក្កដា ឆ្នាំ២០១២ ឯកឧត្តមបណ្ឌិត ច័ន្ទ សារុន បានជួបជាមួយកសិករជាច្រើននាក់ នៅភូមិដំរីឆ្លង ឃុំសង្វើយ ស្រុកជីក្រែង ខេត្តសៀមរៀប។ ក្នុងឱកាសនោះ ឯកឧត្តមរដ្ឋមន្រ្តី បានប្រាប់កសិករ ក៏ដូចជាការផ្ញើរសារ ទៅកសិករ នៅតំបន់ផ្សេងទៀត ទូទាំងប្រទេសថា ទោះបីជាតំបន់ខ្លះពុំទាន់មានភ្លៀងធ្លាក់គ្រប់គ្រាន់ សម្រាប់ការបង្កបង្កើនផលក្តី តែត្រូវភ្ជួររាស់រៀបចំដីស្រែ ឱ្យបានរួចជាស្រេច ពោលគឺត្រូវរៀបចំដីដោយកុំចាំបាច់រង់ចាំទឹកភ្លៀង។
ឯកឧត្តមរដ្ឋមន្ត្រី បានបន្តថាតាម ទម្លាប់របស់កសិករ នៅពេលពុំទាន់ធ្លាក់ភ្លៀង រមែងតែងតែមិនធ្វើការភ្ជួររាស់ដាស់ដីទេ ដូចនេះទម្លាប់នេះត្រូវតែប្តូរចេញ។ ការរៀបចំដីទុកជាមុន មិនត្រឹមតែជួយដល់គុណភាពដីប៉ុណ្ណោះទេ តែជាការត្រៀមលក្ខណៈ ឈ្នះរួចជាស្រេច នៅក្នុងការធ្វើកសិកម្ម ពោលគឺមានភ្លៀងធ្លាក់ គឺអ្វីៗបានត្រៀមរួចជាស្រេចដូចនេះការដាំដុះអាចចាប់ផ្តើមភ្លាមដែរ។
ឯកឧត្តមរដ្ឋមន្ត្រី បានអញ្ជើញទៅកាន់ភូមិដំរីឆ្លង ដើម្បីពិនិត្យមើលសកម្មភាព ការអនុវត្តន៍កសិកម្មចម្រុះ របស់កសិករគំរូឈ្មោះ ឃឹម នៅ ដែលគាត់បានធ្វើព្រមៗគ្នា នូវការចិញ្ចឹមត្រីផង និងការដាំដុះបន្លែផង។ ជាការលើកទឹកចិត្ត ឯកឧត្តមរដ្ឋមន្ត្រី បានផ្តល់ជូននូវម៉ាស៊ីនបូមទឹកមួយគ្រឿងដល់កសិកររូបនេះ។
ឯកឧត្តមរដ្ឋមន្ត្រី បានជំរុញការិយាល័យកសិកម្មស្រុក មន្ទីរកសិកម្មខេត្ត ត្រូវតែបន្តសកម្មថែមទៀត ក្នុងការចុះមកជួយបង្ហាត់បង្រៀន ដល់កសិករអំពីវិធី ក្នុងការធ្វើស្រូវបង្កើនរដូវ ការបញ្ជ្រាបការប្រើប្រាស់ពូជស្រូវទាំងដប់មុខ ឱ្យបានដល់កសិករប្រយោជន៍ ដើម្បីបង្កើនទិន្នផលស្រូវ និងចំណូល ពិសេសឆ្លើយតបបាន ចំពោះគោលនយោបាយនាំអង្ករចេញនាឆ្នាំ២០១៥។
ជាមួយនេះដែរ ឯកឧត្តមរដ្ឋមន្រ្តី ក៏បានជំរុញអគ្គនាយកដ្ឋានកសិកម្ម និងវិទ្យាស្ថានស្រាវជ្រាវ និងអភិវឌ្ឍន៍ដំណាំស្រូវកម្ពុជា ពិភាក្សាគ្នាឱ្យបានច្បាស់លាស់ ក្នុងការរៀបចំជាកម្មវិធីការងារ ចុះជួយផ្សព្វផ្សាយដល់កសិករ ដើម្បីប្រើប្រាស់ពូជស្រូវ ឱ្យបានសមស្របតាមលក្ខណៈភូមិសាស្ត្រ ស្ថានភាពដី និងពីវីធីអនុវត្តដែលទទួលបានទិន្នផល។
ទន្ទឹមនឹងការជួបជុំកសិករ នឹងស្តាប់កសិករនិយាយ ពីការងាររបស់គេនោះ ឯកឧត្តមរដ្ឋមន្ត្រី ក៏បានរៀបចំដំណើរទស្សនកិច្ចរយៈពេលខ្លីមួយ ដល់កសិករដែលចូលរួមទាំងអស់ ឱ្យទៅទស្សនាសហគមន៍ព្រៃឈើត្បែងខាងលិច ភូមិត្បែង ឃុំត្បែងខាងលិច ស្រុកបន្ទាយស្រី ដែលនៅទីនោះ សមាជិកសហគមន៍ បាននិងកំពុងអនុវត្តប្រព័ន្ធកសិកម្មចម្រុះ ប្រកមដោយផ្លែផ្កា។
ឯកឧត្តមរដ្ឋមន្ត្រី បានប្រាប់កសិករថា ឯកឧត្តមចង់ឱ្យកសិករបានឃើញនូវការអនុវត្តន៍របស់កសិករដូចគ្នា បានទទួលជោគជ័យ ដើម្បីធ្វើការកែប្រែនិងអភិវឌ្ឍន៍មូលដ្ឋានរបស់ខ្លួនវិញ។
