ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ លោក ឡាន ហួយយេន អគ្គនាយក ក្រុមហ៊ុនសហប្រតិបត្តិការអន្តរជាតិ បច្ចេកវិទ្យាកសិកម្ម ហ្វ័រវេដ ខេត្តក្វាងស៊ី ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ១៦ កុម្ភៈ ២០១៨ 3715

នៅវេលាម៉ោង ៣រសៀល ថ្ងៃទី១០ ខែវិច្ជិកា ឆ្នាំ២០១៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ លោក ឡាន ហួយយេន អគ្គនាយក ក្រុមហ៊ុនសហប្រតិបត្តិការអន្តរជាតិ បច្ចេកវិទ្យាកសិកម្ម ហ្វ័រវេដ ខេត្តក្វាងស៊ី ចូលជួបសម្តែងការគួរសម និងពិភាក្សាការងារលើផ្នែកបច្ចេកទេសជុំវិញគម្រោងអាជីវកម្មដំណើរការស្ថានីយចិញ្ចឹមជ្រូកពូជបង្ហាញកម្ពុជា-ចិនតាមទម្រង់BOT។ ឯកឧត្តមរដ្ឋមន្រ្តី បានសម្តែងការស្វាគមន៏ចំពោះវត្តមាននៃការជួបពិភាក្សាការងារ និងថ្លែងអំណរគុណចំពោះក្រុមហ៊ុនដែលបាន មកវិនិយោគលើ ការចិញ្ចឹមជ្រូកពូជ នៅប្រទេសកម្ពុជា។ ឯកឧត្តមរដ្ឋមន្រ្តីបានបញ្ជាក់ថាការចិញ្ចឹមជ្រូកពូជនៅកម្ពុជា ជាកត្តាវិជ្ជមានមួយសម្រាប់កម្ពុជាក្នុងការពង្រីកសក្តានុពលចិញ្ចឹមក្នុងស្រុក និងឈានទៅធ្វើការនាំចេញនាពេលអនាគត។ ឯកឧត្តមរដ្ឋមន្រ្តី បានស្នើអោយក្រុមហ៊ុនពិនិត្យមើលនូវលទ្ធភាពក្នុងការផលិតចំណីក្នុងស្រុក ហើយចំណី សត្វទាំងនោះ គួរប្រើប្រាស់នូវផលិតផលដែលបានមកពីដំណាំកសិកម្ម។ ទន្ទឹមនឹងនេះ ក្រសួងកសិកម្ម រុក្ខាប្រមាញ់ និងនេសាទ មានបំណងជំរុញការ វិនិយោគទាំងឡាយអោយបំពេញនូវខ្សែសង្វាក់ផលិតកម្មទាំងស្រុង ដើម្បីធ្វើការគាំទ្រដល់ប្រជាកសិករ។ ឯកឧត្តមរដ្ឋមន្រ្តី បានលើកឡើងបន្ថែមថា តាមរយៈ នៃកិច្ចជំនួបរវាងក្រសួងកសិកម្មចិន និងកម្ពុជាកន្លងមក រាជរដ្ឋាភិបាលបានត្រៀមលក្ខណៈ រួចជាស្រេចក្នុង ការសហការជាមួយបណ្តាក្រុមហ៊ុន វិនិយោគទុនមក ពីប្រទេសចិន ដើម្បីរួមគ្នាលើកកម្ពស់វិស័យកសិកម្មនៅកម្ពុជា។លោក ឡាន ហួយយេន បានថ្លែងអំណរគុណ ដល់ឯកឧត្ដមរដ្ឋមន្ត្រី ថ្នាក់ដឹកនាំ ក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជា ដែលបានផ្តល់កិច្ចសហប្រតិបត្តិការល្អជាមួយក្រុមហ៊ុន និងបានគាំទ្រដល់ដំណើរការវិនិយោគរបស់ក្រុមហ៊ុន។ លោក ឡាន ហួយយេន បានលើកឡើងថាក្រុមហ៊ុនរបស់លោកមានសមត្ថភាពគ្រប់គ្រាន់ក្នុងការចិញ្ចឹមជ្រូក មាន់ គោ ត្រី និងផលិតនូវចំណីសត្វ។ លោកបានបញ្ជាក់ថា ការវិនិយោគរបស់ក្រុមហ៊ុនលោក មិនផ្តោតតែលើការអភិវឌ្ឍន៏វិស័យកសិកម្ម និងការចិញ្ចឹមសត្វប៉ុណ្ណោះទេ តែគម្រោងនេះក៏ចូលរួមក្នុងការ ថែរក្សានូវធនធានធម្មជាតិផងដែរ។ ម្យ៉ាងទៀតក្រុមហ៊ុនក៏នឹងនាំមកនូវក្រុមហ៊ុនវិនិយោគធំៗដទៃទៀត អោយមកវិនិយោគនូវកម្ពុជា ជាពិសេសក្រុមហ៊ុនទាំងនោះ នឹងនាំមកនូវបច្ចេកវិទ្យាទំនើបៗ ក្នុងការអភិវឌ្ឍដំណាំកសិកម្ម និងការចិញ្ចឹមសត្វផងដែរ។ ឆ្លៀតក្នុងឱកាសនោះលោក ឡាន ហួយយេន បានបង្ហាញនូវផែនការ វិនិយោគរបស់ក្រុមហ៊ុនដែលមានដូចជា៖ ១. ជួយកម្ពុជាបង្កើតមជ្ឈមណ្ឌលចំនួន២ គឺមជ្ឈមណ្ឌលត្រួតពិនិត្យបក្សី និងមជ្ឈមណ្ឌលត្រួតពិនិត្យអនាម័យសត្វ ដោយចាប់ដំណើរការជាមួយ ស្ថានីយចិញ្ចឹមជ្រូកបង្ហាញ ជាមួយតម្រូវការដីទំហំ ៣០០០ម៉ែត្រការ៉េ

២. ជួយកម្ពុជាបង្កើតប្រព័ន្ធចំនួនបីគឺ ប្រព័ន្ធបង្កាត់ពូជជ្រូកនៅកម្ពុជា បង្កើតប្រព័ន្ធគ្រប់គ្រងនិងបង្ការជំងឺសត្វ និងប្រព័ន្ធផ្សព្វផ្សាយបច្ចេកទេសចិញ្ចឹមជ្រូក។

៣. ជួយជំរុញការអភិវឌ្ឍវិស័យឧស្សាហកម្មចំនួន៦ គឺឧស្សាហកម្មបង្ហាញចិញ្ចឹមនិងផលិតពូជជ្រូក ឧស្សាហកម្មផលិតវ៉ាក់សាំង ឧស្សាហកម្មផលិតពូជត្រី ឧស្សាហកម្មផលិតនិងចិញ្ចឹមបក្សីពូជ បំពាក់រោងចក្រផលិតជីសិរីរាង្គ និងរោងចក្រកែច្នៃសាច់។ ឯកឧត្តមរដ្ឋមន្រ្តី បានធ្វើការកត់សម្គាល់ទៅលើផែនការនៃការវិនិយោគរបស់ក្រុមហ៊ុន និងបានវាយតម្លៃខ្ពស់លើជំហាននៃការអភិវឌ្ឍនេះ។ ឯកឧត្តមរដ្ឋមន្រ្តី សង្ឃឹមថាតាមរយៈនៃការវិនិយោគរបស់ក្រុមហ៊ុន វិស័យកសិកម្មនៅកម្ពុជានឹងមានការវិវឌ្ឍលឿន និងជំរុញកំណើនសេដ្ឋកិច្ចជាតិ ព្រមទាំងចូលរួម ចំណែក លើកកម្ពស់សមត្ថភាពកសិករខ្មែរអោយកាន់តែប្រសើរឡើងនាពេលខាងមុខ។ ជាចុងក្រោយ ក្រុមហ៊ុនបានស្នើអោយរាជរដ្ឋាភិបាលកម្ពុជា (១)ជួយផ្តល់នូវការលើកលែងពន្ធក្នុងការនាំចូលពូជជ្រូកបីប្រភេទYorksahire Landrace និង Duroc (២)លើកលែងពន្ធនាំចូលចំណី វ៉ាក់សាំង និងថ្នាំ (៣)លើកលែងពន្ធនាំចូលឧបករណ៏ និងសម្ភារៈសាងសង់ និង (៤)ពង្រីកDemo នៅខេត្តគោលដៅចំនួនពី ៥ ទៅ ៨ខេត្ត ដែលអាចចិញ្ចឹមបាន ១០០ ០០០ក្បាល ក្នុងមួយកន្លែង ២០ហិកតា។ ឯកឧត្តមរដ្ឋមន្រ្តី បានស្នើអោយតំណាងក្រុមហ៊ុន និងសហការីនៃក្រសួងកសិកម្ម រុក្ខាប្រមាញ់ និងនេសាទ បន្តរៀបចំកិច្ចប្រជុំ ដើម្បីពិភាក្សាលម្អិតពីគម្រោងផែន ការវិនិយោគរបស់ក្រុមហ៊ុន ដើម្បីឈានទៅដាក់ឲ្យដំណើរការបានឆាប់រហ័សក្នុងពេលដ៏ខ្លីខាងមុខ។