ឯកឧត្តមរដ្ឋមន្ត្រី និងឯកឧត្តមអភិបាលខេត្ត បានអញ្ជើញមកពិនិត្យដំណាំស្រូវរបស់ប្រជាកសិករនៅភូមិគក ឃុំអង្គទ្រេត ដែលកសិករនៅតំបន់នេះភាគច្រើនប្រើពូជ ស្រូវផ្ការំដួល

ចេញ​ផ្សាយ​ ២៦ សីហា ២០១៩ 4799

-កម្មវិធីទី០៥÷ 
ក្នុងស្រុកស្វាយអន្ទរដដែល ឯកឧត្តមរដ្ឋមន្ត្រី និងឯកឧត្តមអភិបាលខេត្ត បានអញ្ជើញមកពិនិត្យដំណាំស្រូវរបស់ប្រជាកសិករនៅភូមិគក ឃុំអង្គទ្រេត ដែលកសិករនៅតំបន់នេះភាគច្រើនប្រើពូជ ស្រូវផ្ការំដួល។ វាលស្រែធំល្វឹងល្វើយពណ៌បៃតងខ្ចី កំពុងដណ្តើមគ្នាដុះលូតលាស់យ៉ាងប្រឹង ប្រែង ធ្វើឲ្យម្ចាស់ស្រែមានអារម្មណ៍សប្បាយរីករាយ លាយឡំនឹងក្តីសង្ឃឹមថានឹងទទួលបានផលល្អនាពេលខាងមុខឆាប់ៗនេះ។ ម្ចាស់ស្រែគ្រប់ៗគ្នាបានលាន់មាត់សរសើរពីការរីកចម្រើនលើវិស័យកសិកម្ម ជាក់ស្តែងបច្ចុប្បន្ននេះ ពួកគាត់ឈប់ប្រើសត្វពាហន:ជាកំលាំងអូសទាញ មកប្រើគ្រឿងចក្រវិញ ហើយយកគោ ក្របីទាំងនោះទៅចិញ្ចឹមបំបង់យកសាច់វិញដែលទីផ្សារត្រូវការខ្ពស់ទាំងទីផ្សារក្នុង និងក្រៅស្រុក។

ចេញពីវេលស្រែ ឯកឧត្តមរដ្ឋមន្ត្រីបានមកពិនិត្យរោងចក្រកិនស្រូវឈុនធំ នៅមិនឆ្ងាយពីតំបន់ផលិតស្រូវ។ លោកឧកញ៉ា ឈុន ធំ ម្ចាស់រោងចក្រ បានជម្រាបជូនឯកឧត្តមជ្រាបថា រោងចក្រមាន លទ្ធភាពប្រមូលទិញស្រូវសំណីបានជាង ៣ម៉ឺនតោនក្នុង ១ឆ្នាំ ពីកសិករ និងពី១៦ សហ គមន៍ដែលបានចុះកិច្ចសន្យាផលិតទាំងស្រូវចំណីសែនក្រអូប និងស្រូវពូជ ដោយទិញក្នុងតម្លៃ ១២០០រៀល/គីឡូក្រាម។ បច្ចុប្បន្នក្រុមហ៊ុនបានទទួលគោលការណ៍នាំចេញទៅទីផ្សារចិន និងទីផ្សារអឺរ៉ុបមួយចំនួនទៀត។ នាឱកាសនេះ លោកឧកញ៉ា តាមរយ:ឯកឧត្តមរដ្ឋមន្ត្រី និងឯកឧត្តមអភិបាលខេត្ត បានស្នើសុំឲ្យក្រសួងថាមពលពិនិត្យពិចារណាលើតម្លៃអគ្គីសនី ព្រោះវាជាធាតុចូលយ៉ាងសំខាន់ក្នុងវិស័យកែច្នៃស្រូវអង្ករដែលអាចជួយកាត់បន្ថយថ្លៃដើម។

ទន្ទឹមនឹងនេះ ឯកឧត្តមរដ្ឋមន្ត្រីក៏បានសំណូមពរឲ្យលោកឧកញ៉ាបង្កើនទុក សម្រាប់ប្រមូលទិញស្រូវស្តុកទុកនៅរដូវប្រមូលផលខាងមុខ ចៀសវាងស្រូវហូរចេញក្រៅប្រទេស ច្រើនដែលធ្វើឲ្យយើងខាតប្រយោជន៍ច្រើន ជាពិសេសអាចជួយដល់កសិករក្នុងការរក្សាតម្លៃស្រូវបានល្អផងដែរ។