Other News
ឯកឧត្តម គង់ ច័ន្ទវាសនា អញ្ជើញចុះពិនិត្យចម្ការដូងក្រអូប នៅស្រុកព្រៃនប់ ខេត្តព្រះសីហនុ
ចេញផ្សាយ ២៨ មីនា ២០២៥ 2544
នៅថ្ងៃពុធ ទី២៦ ខែមីនា ឆ្នាំ២០២៥ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកជំទាវ ហ៊ូ សុពណ៌ អនុរដ្ឋលេខាធិការ លោកបណ្ឌិត សេង វ៉ាង ប្រធាននាយកដ្ឋានគ្រប់គ្រងធនធានដីកសិកម្ម លោក យស ចន្ថាណា អនុប្រធានមន្ទីរកសិកម្មខេត្ត និងមន្ត្រីជំនាញនៃអគ្គនាយកដ្ឋានកសិកម្ម បានអញ្ជើញចុះពិនិត្យ និងផ្តល់ការគាំទ្រផ្នែកបច្ចេកទេស ដល់ម្ចាស់ចម្ការដូងក្រអូប នៅឃុំសាមគ្គី ស្រុកព្រៃនប់ ខេត្តព្រះសីហនុ។
ចម្ការដូងនេះមានផ្ទៃដីទំហំ ២០០ហិកតា ជាមួយនឹងដំណាំដូងកំពុងឱ្យផលចំនួន ៥ ០០០ដេីម និងដូងកំពុងលូតលាស់ និងដាំបន្តជាង ២០ ០០០ដេីមទៀត។ ម្ចាស់ចម្ការបានលេីកឡេីងពីបញ្ហាប្រឈមមួយចំនួន ដូចជា ការបំផ្លាញដោយសត្វកណ្តុរ និងដំណុះមិនសូវល្អ។
ក្រោយកិច្ចសំណេះសំណាល ឯកឧត្តមរដ្ឋលេខាធិការ បានណែនាំឱ្យអង្គភាពជំនាញ និងមន្ទីរកសិកម្មខេត្តព្រះសីហនុ ផ្តល់ការគាំទ្រ និងដំណោះស្រាយសមស្រប ជូនដល់ម្ចាស់ចម្ការ។ ឯកឧត្តមក៏បានផ្តាំផ្ញេីដល់ម្ចាស់ចម្ការឱ្យសហការផ្តល់ព័ត៌មានឱ្យបានត្រឹមត្រូវ និងពេញលេញ ដេីម្បីមន្ត្រីជំនាញអាចពិនិត្យវាយតម្លៃ និងរកដំណោះស្រាយជូនបានទាន់ពេលវេលាផងដែរ។ ម្ចាស់ចម្ការបានបង្ហាញក្តីរីករាយ និងថ្លែងអំណរគុណដល់ក្រសួង និងមន្ទីរកសិកម្ម ចំពោះការយកចិត្តទុកដាក់ និងការគាំទ្រដ៏ចាំបាច់នេះ។
ឯកឧត្តមរដ្ឋលេខាធិការមានក្តីសង្ឃឹមថា ចម្ការដូងដ៏ធំនេះ នឹងក្លាយជាប្រភពផ្គត់ផ្គង់ផ្លែដូងក្នុងស្រុក កាត់បន្ថយការនាំចូលពីបរទេស និងឈានទៅដល់ការវេចខ្ចប់ដេីម្បីនាំចេញទៅទីផ្សារបរទេសទៀតផង នាពេលខាងមុខ៕
