ឯកឧត្ដមអនុរដ្ឋលេខាធិការ ឃី វិបុលបុត្រា អញ្ជើញជាអធិបតីក្នុងការពង្រឹងសមត្ថភាពដល់មន្រ្តីកសិកម្មឃុំស្ដីពីការត្រៀមបង្ការគ្រោះមហន្តរាយក្នុងវិស័យកសិកម្ម នៅខេត្តក្រចេះ

ចេញ​ផ្សាយ​ ៨ មករា ២០២៦ 663

នៅថ្ងៃទី៨​ ខែមករា​ ឆ្នាំ២០២៦ ឯកឧត្ដម ឃី វិបុលបុត្រា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានលេខាធិការដ្ឋានគ្រប់គ្រងគ្រោះមហន្តរាយប្រចាំក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងការពង្រឹងសមត្ថភាពដល់មន្ត្រីកសិកម្មឃុំ ស្តីពីការគ្រប់គ្រងគ្រោះមហន្តរាយក្នុងវិស័យកសិកម្ម សរុបចំនួន ៦១នាក់ នៅក្នុងខេត្តក្រចេះ។
ក្នុងកម្មវិធីនេះក៏មានការអញ្ជើញចូលរួមពីលោកអនុប្រធានមន្ទីរកសិកម្មខេត្តក្រចេះ និងមន្ត្រីរាជការ ព្រមទាំងលោកគ្រូបង្គោល ដែលអញ្ជើញមកពីអគ្គនាយកដ្ឋានកសិកម្ម អគ្គនាយកដ្ឋានសុខភាពសត្វនិងផលិតកម្មសត្វ និងនាយកដ្ឋានផ្សព្វផ្សាយកសិកម្ម។
ការរៀបចំឡើងនេះ ក្នុងគោលបំណង ពង្រឹងសមត្ថភាព ដល់មន្ត្រីកសិកម្មឃុំលើការងារ សំខាន់ៗដូចជា ការត្រៀមបង្ការ និងតាមដានគ្រោះមហន្តរាយ ការប្រមូលទិន្នន័យ និងរាយការណ៍ អំពីគ្រោះមហន្តរាយក្នុងឃុំគោលដៅ ការកសាងសមត្ថភាពគាំទ្រកសិករ ក្នុងការត្រៀមបង្ការ និងបន្ធូរបន្ថយផលប៉ះពាល់ពីគ្រោះមហន្តរាយ។
ក្នុងឱកាសនោះ ឯកឧត្ដមអនុរដ្ឋលេខាធិការ បានណែនាំដល់មន្ត្រីកសិកម្មឃុំ ឱ្យយកចិត្តទុកដាក់ តាមដានជាប្រចាំ នូវសភាពការណ៍នានា ពាក់ព័ន្ធនឹងគ្រោះមហន្តរាយ រួមមាន ទឹកជំនន់ គ្រោះរាំងស្ងួត ជំងឺសត្វ សត្វល្អិតបំផ្លាញដំណាំ និងតម្លៃកសិផល។ ទន្ទឹមនឹងនេះ ឯកឧត្ដមបានសង្កត់ធ្ងន់លើការរាយការណ៍ព័ត៌មានឱ្យបានទាន់ពេលវេលា ដើម្បីឱ្យអន្តរាគមន៍នានាមានប្រសិទ្ធភាពនិងប្រសិទ្ធផលខ្ពស់។ ក្រៅពីនេះ ឯកឧត្ដមក៏បានលើកឡើងពីសារៈសំខាន់នៃការ រាយការណ៍បញ្ហាប្រឈម និងការចងក្រងទិន្នន័យកសិកម្ម ឱ្យបានត្រឹមត្រូវនិងជាក់លាក់៕