ឯកឧត្តមរដ្ឋមន្រ្តី វេង សាខុន បានអនុញ្ញាតអោយ លោកស្រី ដាសា សេដឌុន អ្នកសម្របសម្របគម្រោង និងលោក យូហ្គូ បាគ្រេស្វិន នាយកគម្រោង និងជាតំណាងក្រុមហ៊ុន Fortune Chin នៃធុរកិច្ចពិភពលោក ចូលជួបសម្តែងការគួរសម

ចេញ​ផ្សាយ​ ១៦ កុម្ភៈ ២០១៨ 3840

នៅវេលាម៉ោង ៩ព្រឹក ថ្ងៃទី១១ ខែវិច្ជិកា ឆ្នាំ២០១៦ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្រ្តី វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតអោយ លោកស្រី ដាសា សេដឌុន អ្នកសម្របសម្របគម្រោង និងលោក យូហ្គូ បាគ្រេស្វិន នាយកគម្រោង និងជាតំណាងក្រុមហ៊ុន Fortune China នៃធុរកិច្ចពិភពលោក ចូលជួបសម្តែងការគួរសម និងពិគ្រោះយោបល់លើចក្ខុវិស័យរបស់ក្រសួងកសិកម្ម រុក្ខាប្រមាញ់ និងនេសាទ។ ឯកឧត្តមរដ្ឋមន្រ្តី បានសម្តែងការស្វាគមន៏ និងថ្លែងអំណរគុណចំពោះតំណាងក្រុមហ៊ុន Fortune China ដែលបានចាប់អារម្មណ៏លើវិស័យកសិកម្មនៅកម្ពុជា។ ឯកឧត្តមរដ្ឋមន្រ្តី បានមានប្រសាសថា វិស័យកសិកម្ម នៅកម្ពុជានៅតែជាវិស័យអាទិភាព ក្នុងការជំរុញសេដ្ឋកិច្ចជាតិ។ ដោយឡែកការវិវឌ្ឍន៏នៃវិស័យកសិកម្មនៅកម្ពុជា នៅពុំទាន់អាចឆ្លើយតបទៅនឹងសភាពការណ៏ជាក់ស្តែង នៃការវិវឌ្ឍន៏សេដ្ឋកិច្ចក្នុងតំបន់នៅឡើយ។ ឯកឧត្តមរដ្ឋមន្រ្តី បានបញ្ជាក់ថាបច្ចុប្បន្នវិស័យកសិកម្មនៅកម្ពុជាកំពុងជួបប្រទះនូវបញ្ហាប្រឈមមួយចំនួនដូចជា ការគ្រប់គ្រងតុល្យ ភាពទីផ្សារ ការគ្រប់គ្រងគុណភាពនិងសុវត្ថិភាពចំណីអាហារ ចំណេះដឹងផ្អែកបច្ចេកទេសនិងទំនើបកម្មបច្ចេកវិទ្យាកសិកម្ម ហេដ្ឋារចនាសម្ព័ន្ធកសិកម្ម ភាពប្រកួត ប្រជែងនៃតំលៃ ផលិតកម្ម និងការគ្រប់គ្រងប្រព័ន្ធនៃការដឹកជញ្ជូន។ ទន្ទឹមនឹងនេះ ឯកឧត្តមរដ្ឋមន្រ្តី បានបញ្ជាក់ថាកម្ពុជាកំពុងជំរុញ និងលើកទឹកចិត្តដល់វិស័យឯកជន ក្នុងការមកវិនិយោគ លើការផលិតជីចំណីសត្វ និងថ្នាំកសិកម្ម ដើម្បីជួយកាត់បន្ថយចំណាយរបស់ប្រជាកសិករ។ លោកស្រី ដាសា សេដឌុន បានជម្រាបជូនឯកឧត្តមរដ្ឋមន្រ្តី នូវសកម្មភាពនៃ Fortune China ដែលផ្សារភ្ជាប់ទៅនឹងធុរកិច្ចពិភពលោក។ លោកស្រី បានបញ្ជាក់ថាគោលបំណងដែលលោកស្រី និងតំណាងក្រុមហ៊ុនចូលជួបសម្តែងការគួរសមគឺ ដើម្បីស្វែងយល់នូវ បញ្ហាប្រឈម និងឱកាសវិនិយោគនៅកម្ពុជា ដើម្បីក្រុមហ៊ុនមានមូលដ្ឋានក្នុងការផ្សព្វផ្សាយ និងចែកចាយនូវព័ត៌មាន ក្នុងគោលដៅទាក់ទាញអ្នកវិនិយោគទុន នៅលើពិភពលោក អោយងាកមកចាប់អារម្មណ៏លើការវិនិយោគលើវិស័យកសិកម្មនៅកម្ពុជា។ លោក យូហ្គូ បាគ្រេស្វិន បានមានប្រសាសថា នៅក្នុងឆ្នាំ២០១៧ ខាងមុខកម្ពុជានឹងធ្វើជាម្ចាស់ផ្ទះក្នុង ការរៀបចំវេទិកាសេដ្ឋកិច្ចពិភពលោក ហើយក្រុមហ៊ុនរបស់លោកបានចាប់អារម្មណ៏លើចំណុចមួយចំនួនដូចជា ការធានាសន្តិសុខស្បៀងអាហារនៅក្នុងតំបន់អាស៊ាន ការទាក់ទាញ វិនិយោគទុនក្នុងវិស័យកសិកម្ម និងការផ្ទេរចំណេះដឹងអំពីបច្ចេកទេស និងបច្ចេកវិទ្យាកសិកម្មពីប្រទេសចិនមកកម្ពុជា។ ជាការឆ្លើយតប ឯកឧត្តមរដ្ឋមន្រ្តី បានមានប្រសាសន៏ថា ក្រសួងកសិកម្ម រុក្ខាប្រមាញ់ និងនេសាទកម្ពុជាមានទិសដៅជំរុញផលិតភាពកសិកម្ម តាមរយៈការបញ្ជូលនូវបច្ចេកវិទ្យាទំនើប ស្រាវជ្រាវនូវបច្ចេកទេសថ្មី និងបន្ថែមការសាងសង់ ហេដ្ឋា រចនាសម្ព័ន្ធកសិកម្ម ដើម្បីបង្កើនបរិមាណទិន្នផលនាពេលខាងមុខដើម្បីរួមចំណែកក្នុងការធានានូវសន្តិសុខស្បៀង។ចំពោះយុទ្ធសាស្រ្តនៃការទាក់ទាញអ្នកវិនិយោគ ក្រសួងបាននិងកំពុងអនុវត្តនូវគោលនយោបាយភាពជាដៃគូ រវាងវិស័យឯកជននិងរដ្ឋ និងបន្តលើកទឹកចិត្តដល់វិស័យឯកជនក្នុងការវិនិយោគនៅក្នុងកម្ពុជាជាពិសេស ការវិនិយោគលើបច្ចេកវិទ្យាកសិកម្ម និងការផលិតជី ថ្នាំ និងចំណីសត្វ។ ទន្ទឹមនឹងនេះនាពេលថ្មីៗនេះ ក្រសួងបានទទួលការគាំទ្រពីរដ្ឋាភិបាល ចិនក្នុងការផ្តល់នូវវគ្គ បណ្តុះ បណ្តាលពីបច្ចេកទេស និងបច្ចេកវិទ្យាកសិកម្ម ទាំងការដំាដុះ និងចិញ្ចឹមសត្វ ដល់មន្រ្តីក្រសួង និងកសិករដើម្បីទៅបណ្តុះបណ្តាលនៅប្រទេសចិន។ ឯកឧត្តមរដ្ឋមន្រ្តី ក៏សង្ឃឹមផង ដែរ ថាវេទិកាសេដ្ឋកិច្ចពិភពលោក នឹងផ្តល់នូវឱកាសពិសេសសម្រាប់កម្ពុជាក្នុងការបង្ហាញពិភពលោកនូវសក្តានុពលវិស័យកសិកម្ម ដែលអាចឈានទៅធ្វើការប្រកួតប្រជែង លើទីផ្សារអន្តរជាតិ។